1 Corinto 7:1-40
7 Jãʉ̃bebʉrʉ bãrãba cartaɗeba iwiɗipeɗaɗada mʉ̃a panuya. Wãrãda biara ɓʉa umaquĩrãba wẽrã edaẽ́da.*
2 Baribʉrʉ bãrã tãẽna auɗua obadara bara bẽrã umaquĩrãba idji quimada eroɓaida ɓʉa, idjaɓa wẽrãba idji quimada eroɓaida ɓʉa.
3 Umaquĩrãda idji quima ume cãĩda ɓʉa. Wẽrã siɗa idji quima ume cãĩda ɓʉa.
4 Wẽrãra ara idji cacua djibariẽ́a, ãtebʉrʉ dji quimadrʉ djibaria. Ara maʉ̃ quĩrãca umaquĩrãra ara idji cacua djibariẽ́a, ãtebʉrʉ idji quimadrʉ djibaria.
5 Bãrã cacuara bãrã quimaa wãgarãnadua. Baribʉrʉ bãrãba ãbaa cãĩnaẽ́da beɗea auɗibʉrʉ, mãwã pananira bia ɓʉa. Baribʉrʉ dãrã mãwã pananiẽ́ panʉa idjaɓa aɓabe Ãcõrẽa iwiɗiɗi carea mãwã pananida panʉa. Mãwãnacarea wayacusa ãbaa cãĩnida panʉa bãrã cacuaba quĩrĩã ɓʉra droaɗaẽ́ne diauruba auɗua obirãmãrẽã.
6 Mʉ̃a jaraya: bãrãba mãwã o quĩrĩã panʉbʉrʉ, bia ɓʉa. Baribʉrʉ mʉ̃a õgo obiẽ́a.
7 Mʉ̃maarã jũmarãda mʉ̃ quĩrãca poya deu ɓeaɗibara bia ɓacasia. Baribʉrʉ Ãcõrẽba dadjiza diasia sãwã ɓaida. Ãcõrẽba ʉ̃cʉrʉa dia ɓʉa poya deu ɓeaɗamãrẽã. Idjaɓa ʉ̃cʉrʉa dia ɓʉa quima edaɗamãrẽã.
8 Mʉ̃a deu ɓearãa, pẽdrarãa biɗa jaraya: biara ɓʉa mʉ̃ quĩrãca quima neẽ́ ɓeaɗida.
9 Baribʉrʉ bãrã cacuaba quĩrĩã ɓʉda poya droaɗaẽ́bʉrʉ, quima edaɗida panʉa. Bãrã cacuaba quĩrĩã ɓʉɗebemada jũmawãyã crĩcha ɓai cãyãbara biara ɓʉa quima edaɗida.
10 Quima bara ɓearãa mʉ̃a naʉ̃da jaraya. Naʉ̃ beɗeara mʉ̃reẽ́a, ãtebʉrʉ dadjirã Boroɗea.* Wẽrãba idji quimara amaiẽ́ ɓʉa.
11 Baribʉrʉ idji quimara amaibʉrʉ, dewara umaquĩrãda edaiẽ́ ɓʉa. Ãtebʉrʉ deu ɓaida ɓʉa wa dji quima ume waya beɗeaida ɓʉa. Aɓari quĩrãca umaquĩrãba idji quimara amaiẽ́ ɓʉa.
12 Waabema djabarãa mʉ̃a naʉ̃da jaraya. Naʉ̃gʉra dadjirã Boro Jesuba jaradiaɗaẽ́a: djababa wẽrã Jesu ĩjãẽ́ ɓʉda eroɓʉbʉrʉ, idjaɓa maʉ̃ wẽrãra idji ume ɓa quĩrĩã ɓʉbʉrʉ, maʉ̃ djababa idjira amaiẽ́ ɓʉa.
13 Djabawẽrãba quima Jesu ĩjãẽ́ ɓʉda eroɓʉbʉrʉ, idjaɓa maʉ̃ umaquĩrãba idjida ama quĩrĩãẽ́bʉrʉ, maʉ̃ djabawẽrãba idjira amaiẽ́ ɓʉa.
14 Maʉ̃ umaquĩrã Jesu ĩjãẽ́ ɓʉra Ãcõrẽ itea ɓesia idji quimaba ĩjã ɓʉ bẽrã. Aɓari quĩrãca wẽrã Jesu ĩjãẽ́ ɓʉra Ãcõrẽ itea ɓesia idji quimaba ĩjã ɓʉ bẽrã. Mãwãẽ́bara bãrã warrarãra Ãcõrẽ itea ɓeaɗaẽ́ bacasia. Baribʉrʉ djibarirãra Ãcõrẽ itea panʉ bẽrã ãdjirã siɗa Ãcõrẽ itea panʉa.
15 Jesu ĩjãẽ́ ɓʉba idji quimada ama quĩrĩã ɓʉbʉrʉ, amaida ɓʉa. Mãwã djabada wa djabawẽrãda mĩã amaiẽ́ ɓʉ leyɗebemada ẽdrʉya. Ãcõrẽba dadjirãra necai ɓeaɗamãrẽã trʉ̃sia.
16 Djabawẽrã, bʉa adua ɓʉa. Ãĩbẽrã bʉ quimaba bʉɗeba Jesura ĩjãisicada Ãcõrẽba ẽdrʉ edamãrẽã. Djaba, bʉa biɗa adua ɓʉa. Ãĩbẽrã bʉ quimaba bʉɗeba Jesura ĩjãisicada Ãcõrẽba ẽdrʉ edamãrẽã.
17 7:17-18 Ãcõrẽba dadjirã trʉ̃siɗe ara dadji panana quĩrãca ɓeaɗida panʉa. Cacua wẽãgo ɓasibʉrʉ ara mãwã ɓaida ɓʉa. Cacua wẽãgoẽ́ ɓasibʉrʉ ara mãwã ɓaida ɓʉa. Dadjirãza ɓeaɗida panʉa dadjirã Boro Ãcõrẽba ɓʉɗa quĩrãca. Mʉ̃a Ãcõrẽ ẽberãrã ɓeaza mãwã jaradia ɓʉa.
19 Cacua wẽãgo ɓaida biara ɓʉẽ́a. Cacua wẽãgoẽ́ ɓai siɗa biara ɓʉẽ́a. Ãcõrẽba obi ɓʉra ĩjã o ɓaida biara ɓʉa.
20 Ãcõrẽba dadjirã trʉ̃siɗe ara dadji panana quĩrãca ɓeaɗida panʉa.
21 Ãcõrẽba bʉ trʉ̃siɗe nezocada ɓasibʉrʉ, jũmawãyã sopua ɓarãdua. Baribʉrʉ bʉ nezoca ɓʉɗebemada poya ẽdrʉibʉrʉ, mãwã odua.
22 Nezoca Ãcõrẽba trʉ̃nara dadjirã Boro Critoba cadjiruaɗebemada ẽdrʉ ɓʉsia idji itea ne o ɓamãrẽã. Maʉ̃ne nezocaẽ́ Ãcõrẽba trʉ̃nara Crito nezocaa.
23 Ãcõrẽba bãrãra nẽbʉa nẽdosia. Maʉ̃ carea djãrã nezocada ɓearãnadua.
24 Djabarã, Ãcõrẽba dadjirã trʉ̃siɗe ara dadji panana quĩrãca ɓeaɗida panʉa. Maʉ̃ne ara dadji panʉ quĩrãca Ãcõrẽ quĩrãpita jipa nĩbaɗida panʉa.
25 Maʉ̃ awara quima waɗi edaɗacaɗebemada mʉ̃a jaraya. Dadjirã Boro Jesucritoba maʉ̃gʉɗebemada jaradiaɗaẽ́ bẽrã mʉ̃a crĩcha ɓʉda jaraya. Bãrãba cawa panʉa dadjirã Boroba mʉ̃ra quĩrã djuburiaɗa bẽrã mʉ̃a wãrãda jarabarida.
26 Nãwã jaraya: mʉ̃maarã naʉ̃ ewariɗe bia mĩga panʉ bẽrã dadji umaquĩrã deu ɓeara ara dadji ɓʉ quĩrãca ɓeaɗida panʉa.
27 Baribʉrʉ quima eroɓʉbʉrʉ, bʉ quima amaida crĩcharãdua. Quima neẽ́ ɓʉbʉrʉ, quima edaida crĩcharãdua.
28 Baribʉrʉ quima edaibʉrʉ cadjiruaẽ́a. Wẽrãda quima edaibʉrʉ cadjiruaẽ́a. Baribʉrʉ quima edabʉrʉra naʉ̃ ẽjũãne bia mĩga ɓaya. Bãrã mãwã bia mĩga pananida mʉ̃a quĩrĩãẽ́ ɓʉa.
29 Djabarã, mʉ̃a naʉ̃gʉda jara quĩrĩã ɓʉa: naʉ̃ ewarira jõboɗoa. Maʉ̃ carea djabarã quima eroɓeaba ãdjia Ãcõrẽ ẽpẽ panʉra igaraɗiẽ́ panʉa ãdji quima ume ɓeaɗi carea. Ãtebʉrʉ quima neẽ́ ɓʉba ẽpẽida ɓʉ quĩrãca ẽpẽnida panʉa.
30 Ara maʉ̃ quĩrãca djabarã sopua ɓeara sopuaẽ́ ɓʉ quĩrãca ɓeaɗida panʉa Ãcõrẽda bio ẽpẽni carea. Ɓʉsriɗa ɓeara ɓʉsriɗaẽ́ ɓʉ quĩrãca ɓeaɗida panʉa. Ne nẽdoɗaba idjia nẽdoɗara ewariza eroɓaida crĩcha ɓaiẽ́ ɓʉa.
31 Naʉ̃ ẽjũã dadjia unu panʉra jũma jõboɗo bẽrã ne bara ɓeaba ne neẽ́ ɓʉ quĩrãca crĩcha ɓeaɗida panʉa.
32 Mʉ̃a quĩrĩã ɓʉa bãrãba naʉ̃ ẽjũãnebemada jũmawãyã crĩchaɗaẽ́da. Umaquĩrã quima neẽ́ ɓʉba biara crĩcha ɓabaria dadjirã Boroba quĩrĩã ɓʉda oi carea. Dadjirã Borora ɓʉsriɗabi quĩrĩã ɓʉa.
33 Baribʉrʉ umaquĩrã quima eroɓʉba naʉ̃ ẽjũãne idji quima bia eroɓaida biara crĩcha ɓabaria. Idji quimada ɓʉsriɗabi quĩrĩã ɓʉa.
34 Mãwã quima bara ɓʉba crĩchada umé eroɓabaria.* Aɓari quĩrãca wẽrã quima eroɓʉba naʉ̃ ẽjũãne idji quima bia eroɓaida biara crĩcha ɓabaria. Idji quimada ɓʉsriɗabi quĩrĩã ɓʉa. Baribʉrʉ wẽrã quima neẽ́ ɓʉba dadjirã Boroɗebemada biara crĩcha ɓabaria. Naʉ̃ cacuaɗe, jaureɗe biɗa idji itea bia ɓa quĩrĩã ɓʉa.
35 Maʉ̃gʉra mʉ̃a jaraẽ́ ɓʉa bãrãba quĩrĩã panʉ quĩrãca ɓearãnamãrẽã ãtebʉrʉ bia ɓeaɗamãrẽã. Mʉ̃a aɓabe quĩrĩã ɓʉa bãrãra quĩrãipa ɓeaɗida idjaɓa jũma bãrã soɗeba dadjirã Boroba quĩrĩã ɓʉda oɗida.
36 Aɓaʉ djabada awẽrã djora ume dji edaɗi carea beɗea bia panʉbʉrʉ, dji edaɗi naẽna poya droaẽ́da crĩchaibʉrʉ idjaɓa isabe eda quĩrĩãibʉrʉ, edaida ɓʉa. Maʉ̃ra cadjiruaẽ́a.
37 Baribʉrʉ djabada dji edaɗi carea beɗea ɓʉɗacarea maʉ̃ wẽrãra edaẽ́da idji soɗeba wãrãda crĩcha ɓʉbʉrʉ idjaɓa idji cacuaba quĩrĩã ɓʉra poya droaibʉrʉ, bia ɓʉa maʉ̃ wẽrãra edaẽ́da.
38 Wãrãda quima edabʉrʉba bia o ɓʉa. Baribʉrʉ mʉ̃maarã quima edaẽ́ba biara o ɓʉa.*
39 Djabawẽrã quima bara ɓʉra dji quima zocai ɓʉmisa idji ume ɓaida ɓʉa. Baribʉrʉ dji quimara beuibʉrʉ, dewara umaquĩrãda eda quĩrĩãibʉrʉ, edaida ɓʉa. Baribʉrʉ aɓabe dadjirã Boro Jesucrito ĩjã ɓʉdrʉ edaida ɓʉa.
40 Mʉ̃a crĩcha ɓʉa idjira quima edaẽ́bʉrʉ ɓʉsriɗaara ɓaida. Mʉ̃maarã Ãcõrẽ Jaureba mãwã crĩchabi ɓʉda.
Beɗea eɗaare
^ 7:1. Biara ɓʉa umaquĩrãba wẽrã edaẽ́da. Griego beɗeaɗe nãwã ɓʉ́ ɓʉa: “Bia ɓʉa umaquĩrãba wẽrã tãẽ́da.”
^ 7:10. Luca 16:18.
^ 7:34. Crĩchada umé eroɓabaria. Griego beɗeaɗe ʉ̃cʉrʉ cartaɗe maʉ̃ra neẽ́a.
^ 7:38. Griego beɗeaɗe versículo 36-38 ebuɗa ɓʉẽ́a. Idjaɓa naʉ̃ quĩrãca traducida ɓʉa: 36 Baribʉrʉ djababa idji cau awẽrã djorada quima diaẽ́ ɓʉɗeba biẽ́ o ɓʉda crĩcha ɓʉbʉrʉ, idjimaarã bia ɓʉbʉrʉ, quima diaida ɓʉa. Maʉ̃ra cadjiruaẽ́a. 37 Baribʉrʉ djababa idji caura diaẽ́da soɗeba crĩcha ɓʉbʉrʉ, idjaɓa dewaraʉba jara ɓʉ carea mãwã oẽ́ ɓʉbʉrʉ, bia ɓʉa idji caura quima diaẽ́da. 38 Wãrãda idji cau diabʉrʉba bia o ɓʉa. Baribʉrʉ mʉ̃maarã idji cau diaẽ́ba biara o ɓʉa.
