1 Corinto 9:1-27
9 ¿Mʉ̃djia o quĩrĩã ɓʉ quĩrãca ocara ɓʉca? ¿Mʉ̃ra Jesucritoba diabueɗaẽ́ca? ¿Mʉ̃a biɗa dadjirã Boro Jesura unusiẽ́ca?* ¿Bãrãba mʉ̃neba dadjirã Borora ĩjãsiɗaẽ́ca?
2 Ʉ̃cʉrʉ djabarãba mʉ̃ra Jesucritoba diabueɗada crĩchaɗaẽ́ panʉmĩna bãrãba cawaɗida panʉa mʉ̃ra wãrãda idjia diabueɗada mãwã ɓʉda. Mʉ̃a jaradiaɗaɗeba bãrãba dadjirã Boroda ĩjãsiɗa bẽrã maʉ̃gʉra ebuɗa ɓʉa.
3 Mʉ̃ biẽ́ jarabadarãa mʉ̃a naʉ̃gʉda iwiɗiya:
4 ¿mʉ̃a jaradia ɓʉbari ne coi carea edaiẽ́ ɓʉca? ¿Doi carea biɗa edaiẽ́ ɓʉca?
5 Waabema Jesuba diabueɗarãda, dadjirã Boro Jesu djabarãda, Pedro siɗa ãdji quima ume ãbaa nĩbabadaa.* Ara ãdjirã quĩrãca ¿mʉ̃ra Jesu ĩjã ɓʉ wẽrã ume dji edapeɗa mʉ̃ ume ãbaa eronĩbaiẽ́ ɓʉca?
6 Bernabeba, mʉ̃a biɗa Ãcõrẽ beɗea jaradia nĩnane dewara traju siɗa obadaa ne eropanani carea. Baribʉrʉ ¿waabemarã quĩrãca daiba jaradia panʉneba ne edaɗida panʉẽ́ca?
7 ¿Sordaora ara idji parataba djõne wãbarica? ¿Uva uɗa eroɓʉba idji uvara jõcaca? ¿Oveja wagabariba oveja juɓara docaca?
8 ¿Jũma maʉ̃gʉra aɓabe mʉ̃dji crĩchaɗeba jara ɓʉca? ¿Ãcõrẽba Moisea diaɗa leyba aɓari quĩrãca jaracaca?
9 Maʉ̃ leyɗe nãwã ɓʉ́ ɓʉa: “Bʉa pacaa ne cʉradʉgabi ɓʉɗe idji itera jʉ̃rãdua.”* Ãcõrẽba maʉ̃ beɗea jarasiɗe ¿aɓabe pacaɗebemada crĩcha ɓasica?
10 ¿Dadjirãnebema siɗa crĩcha ɓasiẽ́ca? Wãrãda dadjirã careabʉrʉ Ãcõrẽba maʉ̃ leyra diasia. Ẽjũã o ɓʉra, dji ewa ɓʉ siɗa trajabadaa maʉ̃neba ne eroɓeaɗida cawa panʉ bẽrã.
11 Ara maʉ̃ quĩrãca daiba bãrãa Ãcõrẽ beɗeara jaradiasiɗa bẽrã ¿bia ɓʉẽ́ca daiba bãrãneba ne edaɗida?
12 Dewararãba bãrãneba ne edaɗida panʉbʉrʉ, daiba ãdjirã cãyãbara biara ne edaɗida panʉa.
Mãwãmĩna ne iwiɗiɗacaa. Ãtebʉrʉ jũma droa panʉa ẽberãrãba beɗea bia Critoɗebemada biẽ́ crĩcharãnamãrẽã.
13 Bãrãba cawa panʉa Ãcõrẽ de dromane trajabadarãba ãdjia o panʉneba coɗira edabadada. Animarã babue diabadarãba maʉ̃ djaraɗebemada edabadaa coɗi carea.
14 Aɓari quĩrãca dadjirã Boro Jesuba jarasia beɗea bia idjiɗebema jaradia nĩnaba maʉ̃neba coɗira edaɗida panʉda.*
15 Mãwãmĩna mʉ̃a edacaa. Idjaɓa maʉ̃gʉɗebemada naʉ̃ cartaɗe ɓʉẽ́ ɓʉa bãrãba ne diaɗamãrẽã. Mʉ̃a jaradia ɓʉbari ne edaca bẽrã ɓʉsriɗa ɓʉa. Mʉ̃a quĩrĩãẽ́a ni aɓaʉba ne dia ɓʉɗeba maʉ̃ ɓʉsriɗara jõbida. Mʉ̃maarã bãrãneba ne edai cãyãbara beuida biara ɓʉa.
16 Mʉ̃a beɗea bia Critoɗebemada jaradia ɓʉmĩna mʉ̃ra dji dromaana acaa, Ãcõrẽbʉrʉ jaradiabi ɓʉ bẽrã. Wãrãda beɗea bia Critoɗebemada jaradiaẽ́bʉrʉ, mʉ̃ra mĩã djuburi ɓeya.
17 Mʉ̃djiareba jaradia ɓaibʉrʉ, ne edaida ɓʉa. Baribʉrʉ mʉ̃djiareba jaradiaẽ́ ɓʉa. Ãcõrẽbʉrʉ mʉ̃ra ɓʉsia jaradia ɓamãrẽã. Maʉ̃ bẽrã mʉ̃a jaradia ɓaida ɓʉa.
18 Mãwãra ¿mʉ̃a jaradia ɓʉbari cãrẽda edai? Ne edaẽ́a. Aɓabe ɓʉsriɗa ɓaya ne iwiɗiẽ́ne beɗea bia Critoɗebemada jaradia ɓʉ bẽrã. Mʉ̃a jaradia ɓʉbari ne edaida ɓʉmĩna iwiɗicaa.
19 Mʉ̃ra djãrã nezocaẽ́mĩna ara mʉ̃djida jũmarã nezocada ɓesia zocãrãba mʉ̃neba Jesucritoda ĩjãnamãrẽã.
20 Mʉ̃ra judiorã tãẽna ɓʉɗe judiorã quĩrãca ɓabaria mʉ̃neba Jesucritoda ĩjãnamãrẽã. Ãcõrẽba Moisea diaɗa leyɗeba ɓea tãẽna ɓʉɗe mʉ̃ra maʉ̃ leyɗeba ɓʉẽ́mĩna maʉ̃neba ɓʉ quĩrãca ɓabaria. Mãwã ɓabaria ãdjirãba mʉ̃neba Jesucritoda ĩjãnamãrẽã.
21 Idjaɓa Ãcõrẽba Moisea diaɗa ley adua ɓea tãẽna ɓʉɗe mʉ̃ra ãdjirã quĩrãca ɓabaria mʉ̃neba Jesucritoda ĩjãnamãrẽã. Baribʉrʉ mʉ̃a Ãcõrẽ leyra igaracaa. Jũma Critoba obi ɓʉra ẽpẽbaria.
22 Mʉ̃ra djabarã wãrã beɗea mãcua adua ɓea tãẽna ɓʉɗe ãdjirã quĩrãca ɓabaria mʉ̃neba Jesucritoɗebemada biara cawaɗamãrẽã. Mʉ̃ wãbʉrʉza ẽberãrã tãẽna ɓʉɗe ãdjirã quĩrãca ɓabaria mʉ̃neba ʉ̃cʉrʉba Critoda ĩjãnapeɗa cadjiruaɗebemada ẽdrʉɗamãrẽã.
23 Mʉ̃a jũma maʉ̃ quĩrãca obaria beɗea bia Critoɗebemada cawabi carea. Mãwã mʉ̃a biɗa Ãcõrẽneba ne biada edaya.
24 Bãrãba cawa panʉa ẽberãra pirabadada caida jĩrũ mẽsrãara ɓʉ cawaya. Maʉ̃ne zocãrã pirabadamĩna aɓabe dji naãrã jũẽnabʉrʉ ne edabaria. Bãrã siɗa isabe pirabʉda quĩrãca jũma bia oɗadua Ãcõrẽba diai jaraɗada edaɗi carea.
25 Jemenebadarãba ãdji cacuara quĩrãcuita wagabadaa zarea ɓeaɗi carea. Mãwã obadaa dewararã cãyãbara biara jemenenapeɗa boroɓarida edaɗi carea. Maʉ̃ boroɓarira isabe ãrĩbaria. Baribʉrʉ dadjirãba ne jũmada bia obadaa Ãcõrẽba diai jaraɗa ãrĩcada edaɗi carea.
26 Maʉ̃ bẽrã ẽberã baridua pira wãbʉrʉ quĩrãca mʉ̃a ocaa. Idjaɓa ẽberã djõ ɓʉɗe baridua djõbari quĩrãca ocaa.
27 Ãtebʉrʉ mʉ̃ cacua zarea o ɓʉ quĩrãca idjaɓa mʉ̃ cacuaba o ama ɓʉda obi ɓʉ quĩrãca jũma o ɓʉa Ãcõrẽba diai jaraɗara edai carea. Mãwã oẽ́bʉrʉ, mʉ̃a ẽberãrãa jaradia ɓaɗamĩna mʉ̃abʉrʉ Ãcõrẽba diai jaraɗara poya edaẽ́a.
