1 Cronica 21:1-30
21 Maʉ̃ ewariɗe diauruba israelerãra biẽ́ osia. Idjia Davia crĩchabisia Israelɗebema sordaorãra juachaida.
2 Maʉ̃ bẽrã Daviba Joáa, waabema sordao bororãa biɗa nãwã jarasia:
–Jũma Israel druaɗe umaquĩrã djõ cawa ɓeada juachaɗe wãnadua Beersebá puruɗeba aɓa Daʉ̃ puruɗaa. Juachaɗapeɗa mʉ̃́a jaraɗe zeɗadua cawai carea jũmasãwã panʉda.–
3 Baribʉrʉ Joába jarasia:
–Mʉ̃ boro, ¡Ãcõrẽba idji puru Israelda ɓarima cien auɗu yõbibʉrʉ bio bia ɓaya! ¿Jũma ãdjirãra bʉare panʉẽ́ca? ¿Cãrẽ cãrẽã bʉa mãwã juachabi ɓʉ? ¿Cãrẽã dadji israelerãra nẽbʉraɗe ɓʉ́ quĩrĩã ɓʉ?–
4 Joába mãwã jaraɗamĩna Daviba waɗibiɗa juachabisia. Ara maʉ̃da Joába jũma Israel druaɗe juachaɗe wãpeɗa jẽda Jerusaleʉ̃naa zesia.
5 Maʉ̃be Davia jarasia Juda druaɗe 470 mil sordaorãda panʉda idjaɓa waabema israelerã druaɗe miyoʉ̃ auɗu cien mil panʉda.
6 Baribʉrʉ Joába Leviɗeba yõpeɗaɗara, Benjamiʉ̃neba yõpeɗaɗarã siɗa juachaẽ́ basía, Daviba juachabi jaraɗara bia ũrĩnaẽ́ bẽrã.
7 Ãcõrẽ biɗa Daviba juachabiɗara bia unuẽ́ basía. Maʉ̃ carea israelerãra cawa osia.
8 Maʉ̃ bẽrã Daviba Ãcõrẽa nãwã jarasia:
–Wãrãda mʉ̃a sordaorã juachabiɗara cadjirua basía. Baribʉrʉ mʉ̃ quĩrã djuburia maʉ̃ cadjirua oɗara quĩrãdoadua. Mʉ̃a wãrãda crĩcha neẽ́ ɓʉ quĩrãca osia.–
9 Maʉ̃ ewariɗe Ga abadaba Davia Ãcõrẽneba beɗeabadjia. Ãcõrẽba Gaa nãwã jarasia:
10 –Davimaa wãpeɗa jaradua mʉ̃a cawa oida. Mʉ̃a cawa oi crĩchada ũbea eroɓʉa. Maʉ̃gʉɗebemada idjia aɓa edaida ɓʉa.–
11 Ara maʉ̃da Gara Davimaa wãpeɗa nãwã jarasia:
–Ãcõrẽba nãwã jara ɓʉa: “Mʉ̃a cãrẽneba cawa oida bʉabʉrʉ jaraida ɓʉa. Naʉ̃nebemada aɓa edadua:
12 poa ũbea jarraba zeida, jeɗeco ũbea dji quĩrũba bãrãra poya pananida, wa ewari ũbea Ãcõrẽba bãrãra cacua biẽ́ ɓʉida. Maʉ̃ ewari ũbeaɗe bajãnebema nezocaba jũma Israel druaɗe ẽberãrãda quinibiya.” Maʉ̃gʉɗebemada aɓa edadua mʉ̃a Ãcõrẽa jarai carea.–
13 Maʉ̃ne Daviba Gaa panusia:
–¡Mʉ̃ra nẽbʉra dromane ɓʉa! Baribʉrʉ Ãcõrẽra quĩrã djuburiaiɗa ɓʉ bẽrã, biara ɓʉa mʉ̃ra idji jʉwaɗe ɓaeida ẽberãrã jʉwaɗe ɓaei cãyãbara.–
14 Daviba mãwã jaraɗa bẽrã Ãcõrẽba israelerãra cacua biẽ́ ɓʉsia. Maʉ̃ne setenta mil quinisiɗaa.
15 Maʉ̃be Ãcõrẽba bajãnebema nezocada Jerusaleʉ̃nebemarã quenane diabuesia. Mãwã quena ɓʉda Ãcõrẽba acʉ ɓasia. Maʉ̃ne sopuapeɗa waa quenabiẽ́ basía. Bajãnebema nezocaa nãwã jarasia:
–¡Ɓesia! ¡Waa quenarãdua!–
Mãwã jarasiɗe bajãnebema nezocara jebuseo Ornaʉ̃ba trigo cʉrʉbarima ɓasia.
16 Daviba ʉ̃taa acʉbʉrʉɗe unusia bajãnebema nezocara ʉ̃tʉ jira ɓʉda. Djõbada necoda idji jʉwaɗe eroɓasia. Maʉ̃ necora Jerusaleʉ̃ puruɗaa wa nũmasia. Maʉ̃ unubʉrʉɗe Davira, idjiare ɓea dji dromarã siɗa chĩrãboroɗe ɓarru copanesiɗaa. Ãdjirãba sopua careabema jʉ̃badara jʉ̃ panasiɗaa.
17 Maʉ̃be Daviba Ãcõrẽa nãwã jarasia:
–Mʉ̃abʉrʉ sordaorãra juachabisia. Mʉ̃abʉrʉ maʉ̃ cadjiruara osia. Naʉ̃ beɗea neẽ́ queɗeaba ¿cãrẽ cadjiruada osiɗa?* Mʉ̃ Boro Ãcõrẽ, mʉ̃ quĩrã djuburia mʉ̃ra, mʉ̃ ẽberãrã siɗa cawa odua. Waa bʉ puruda quinibirãdua.–
18 Maʉ̃ne Ãcõrẽ nezoca bajãnebemaba Gaa nãwã jarasia:
–Davia jaradua jebuseo Ornaʉ̃ba trigo cʉrʉbarima animarã babue diabadada mʉ̃ itea omãrẽã.–
19 Ara maʉ̃da Gaba Ãcõrẽ trʉ̃neba jaraɗara Daviba oɗe wãsia.
20 Ornaʉ̃ba trigo cʉrʉ ɓʉɗe jẽda acʉpeɗa bajãnebema nezocara unusia. Idji warrarã quĩmãrẽ panʉ biɗa ununapeɗa mĩrũsiɗaa.
21 Davi Ornaʉ̃ma jũẽbʉrʉɗe Ornaʉ̃ba idjira unusia. Maʉ̃ bẽrã idji trigo cʉrʉbarimaʉba Davimaa wãpeɗa chĩrãboroɗe ɓarru coɓesia.
22 Maʉ̃ne Daviba Ornaʉ̃a jarasia:
–Bʉ trigo cʉrʉbari ẽjũãra mʉ̃́a nẽdobuedua animarã babue diabadada Ãcõrẽ itea oi carea. Mʉ̃a mãwã oibʉrʉ dai israelerãra waa quininaẽ́a. Dji ẽjũã nẽbʉara mʉ̃a jũma diaya.–
23 Ornaʉ̃ba panusia:
–Mʉ̃ boro, ara jãwã bari edadua. Maʉ̃be bʉa quĩrĩã ɓʉ quĩrãca odua. Mʉ̃a pacada diaya Ãcõrẽa babue diamãrẽã. Maʉ̃ awara tʉbʉ carea dji trigo cʉrʉbari bacuruda diaya. Trigo siɗa diaya Ãcõrẽa babue diamãrẽã. Maʉ̃gʉra mʉ̃a jũma bari diaya.–
24 Baribʉrʉ israelerã boro Daviba panusia:
–Mãwãẽ́a. Mʉ̃a bari edaẽ́a ãtebʉrʉ dji nẽbʉa daucha diaya. Mʉ̃a bʉreda Ãcõrẽa diai carea bari edaẽ́a. Animarã bari edaɗara mʉ̃a Ãcõrẽa babue diaẽ́a.–
25 Maʉ̃ bẽrã Daviba Ornaʉ̃ ẽjũãbari oroda quince libra diasia.*
26 Mama Daviba animarã babue diabadada Ãcõrẽ itea osia. Maʉ̃be Ãcõrẽa animarãda jũma babue diacuasia idjaɓa Ãcõrẽ ume necai ɓai carea animarã dragada babue diacuasia. Maʉ̃ne Ãcõrẽa quĩrã djuburiada iwiɗisia. Ãcõrẽba maʉ̃ra bia ũrĩna bẽrã bajãneba tʉbʉ uruada animarã babue diabada ʉ̃rʉ̃ ɓaebisia.
27 Maʉ̃be Ãcõrẽba bajãnebema nezocaa jarasia idji djõbari necoda wagamãrẽã.
28 Maʉ̃ unubʉrʉɗe Daviba cawasia Ãcõrẽba idji beɗeara ũrĩsida. Maʉ̃ carea jebuseo Ornaʉ̃ba trigo cʉrʉ ɓaɗama animarãda Ãcõrẽa babue diacuasia.
29 Maʉ̃ ewariɗe Ãcõrẽ wua de Moiseba ẽjũã põãsa ewaraga ɓʉɗe oɗara, animarã babue diabada siɗa Gabaoʉ̃ puru caita ɓʉ eyaɗe panasiɗaa.
30 Baribʉrʉ Daviba Ãcõrẽa iwiɗi carea mamaa poya wãẽ́ basía. Ãcõrẽ nezocara idji djõbada neco bara ununa bẽrã mamaa wãida bio waya ɓasia.
