1 Pedro 1:1-25
1 Mʉ̃ra Pedroa, Jesucritoba diabueɗaa. Mʉ̃a naʉ̃ cartara ɓʉbʉrʉa Ãcõrẽba edaɗarã Ponto druaɗe, Galacia druaɗe, Capadocia druaɗe, Asia druaɗe, Bitinia druaɗe biɗa ãĩbemarã quĩrãca panabada itea.
2 Dadjirã Zeza Ãcõrẽba bãrãra edasia idjia naẽnaeɗa crĩcha ɓaɗa quĩrãca. Ãcõrẽ Jaureba bãrãra idji itea ɓʉsia Jesucritoda ĩjãnamãrẽã idjaɓa idji oaɗeba Ãcõrẽ quĩrãpita cadjirua neẽ́ ɓeaɗamãrẽã. Mʉ̃a quĩrĩã ɓʉa Ãcõrẽba idji biaɗeba bãrãra careba ɓaida, necai ɓai siɗa bãrãa dia ɓaida.
Pedroba Ãcõrẽa bia beɗeaɗa
3 Dadjirã Boro Jesucrito Zeza Ãcõrẽa bia beɗeaɗida panʉa. Idjia dadjirãra bio quĩrã djuburiaɗa bẽrã Jesucrito beu ɓaɗa ʉ̃rẽbaɗaɗeba zocai ɓai djiwiɗida diasia. Maʉ̃ bẽrã idji ume bajãne pananida jʉ̃ã panʉa.
4 Ãcõrẽba zocai ɓai djiwiɗida diaɗa bẽrã idjia dadjirã itea bajãne waga eroɓʉra jũma edaɗia. Maʉ̃gʉra ãrĩcaa, jõcaa, idjaɓa cadjirua neẽ́ ɓʉa.
5 Jesucritoda ĩjã panʉ bẽrã Ãcõrẽba idji ʉɓʉaɗeba bãrãra waga eroɓaya aɓa jĩrũarebema ewariɗe ẽdrʉ edabʉrʉɗaa.
6 Maʉ̃ carea ara nawena ne quĩrãtanoaneba bãrãra bia mĩga panʉmĩna bio ɓʉsriɗa panʉa.
7 Mãwã bia mĩgaɗida panʉa maʉ̃ droa panʉneba unubiɗi carea Jesucritora wãrãda ĩjã panʉda. Bãrãba ĩjã panʉra oro quĩrãca ɓʉa. Orora jʉ̃wʉ̃rʉ̃ãba dorraɓaribibadaa idji awa ɓemãrẽã. Ara maʉ̃ quĩrãca bãrã bia mĩga panʉ droa panʉneba unubi panʉa Jesucritora wãrãda ĩjã panʉda. Maʉ̃gʉra oro cãyãbara biara ɓʉa orora ãrĩbari bẽrã. Bãrãba Jesucritora wãrãda ĩjã panʉda unubi panʉ bẽrã, idji unubʉdaɗe Ãcõrẽba bãrãra bia unuya, bia jaraya idjaɓa dji dromarãda ɓʉya.
8 Bãrãba ununacamĩna Jesucritora quĩrĩã panʉa. Nawena ununaẽ́ panʉmĩna idjida ĩjã panʉa. Idji carea bio ɓʉsriɗa panʉa. Jãcua ɓʉsriɗa panʉ bẽrã maʉ̃ ɓʉsriɗara sãwãbʉrʉ ɓʉda poya cawa jaraɗaẽ́a.
9 Mãwã ɓʉsriɗa panʉa Jesucrito ĩjã panʉneba Ãcõrẽba ẽdrʉ edai bẽrã.
10 Ãcõrẽneba beɗeabadarãba naẽnaeɗa jarabadjiɗaa Ãcõrẽba idji biaɗeba bãrã ẽdrʉ edaida. Maʉ̃gʉɗebema cawaɗi carea ãdjirãba quĩrãcuita crĩchabadjiɗaa idjaɓa iwiɗibadjiɗaa.
11 Crito Jaure ãdji soɗe ɓʉba beɗeabibadjia Crito bia mĩgapeɗa Ãcõrẽba bia ɓʉiɗebemada. Beɗeapeɗaɗacarea cawa quĩrĩã panasiɗaa caiɗebemada Crito Jaureba ãdjirãa beɗeabisida idjaɓa sãʉ̃be jũma maʉ̃gʉra mãwãida.
12 Baribʉrʉ Ãcõrẽba cawabisia ãdjia beɗeapeɗaɗara ãdji ewariɗe mãwãẽ́da, ãtebʉrʉ nocoarebema ewariɗe mãwãida jũma dadjirã carebai carea. Ãdjia beɗeapeɗaɗara iɗira beɗea bia Critoɗebema jaradia panʉba dadjirãa ebuɗa cawabi panʉa Ãcõrẽ Jaure bajãneba diabueɗaɗeba. Maʉ̃gʉra bajãnebema nezocarã biɗa cawa quĩrĩã panʉa.
Ãcõrẽ itea bia ɓeaɗadua
13 Maʉ̃ bẽrã bia oɗi carea crĩcha cawaaɗeba ɓeaɗadua. Quĩrãipa ɓeaɗadua. Sẽnaẽ́ jʉ̃ã pananadua Jesucrito unubʉda ewariɗe Ãcõrẽba idji biaɗeba bãrãra bia edamãrẽã.
14 Warra cʉwʉrʉ ĩjã ɓʉ quĩrãca ɓeaɗadua. Naʉ̃ cacuaba cadjirua o quĩrĩã ɓʉra waa orãnadua Ãcõrẽ adua ɓeasiɗe obadapeɗaɗa quĩrãca.
15 Ãcõrẽba bãrãra trʉ̃sia. Idjira ne jũmane jipa ɓʉa. Maʉ̃ bẽrã bãdjia obʉdaza jipa ɓeaɗadua.
16 Ãcõrẽ Beɗeaɗe nãwã ɓʉ́ ɓʉa: “Jipa ɓeaɗadua mʉ̃ra jipa ɓʉ bẽrã.”*
17 Bãrãba Ãcõrẽa beɗeabʉdaɗe bãrã Zeza abadaa. Dadjia opeɗaɗa quĩrãca idjia jũmarãda cawa oya. Maʉ̃ bẽrã waɗi naʉ̃ ẽjũãne ãĩbemarã quĩrãca panʉmisa ewariza idji waya panʉneba jipa nĩbaɗadua.
18 1:18-19 Bãrãra naẽna siriẽ́ ɓea crĩchaɗeba nĩbabadjiɗaa bãrã drõã naẽnabemarãba mãwã jaradiabadjiɗa bẽrã. Baribʉrʉ cawa panʉa Ãcõrẽba bãrãra maʉ̃nebemada ẽdrʉ edasida. Idjia bãrãra nẽdoẽ́ basía oro ãrĩda ɓʉba wa parata ãrĩda ɓʉba, ãtebʉrʉ Crito oaba nẽbʉa nẽdosia. Critora dji biara ɓʉ oveja zaque Ãcõrẽa babue diaɗa quĩrãca ɓasia.
20 Naʉ̃ ẽjũã oi naẽna Ãcõrẽba Critora edapeɗa naʉ̃ jĩrũarebema ewariɗe diabuesia bãrãra bia ɓeaɗamãrẽã.
21 Critoɗeba bãrãba Ãcõrẽra ĩjã panʉa. Ãcõrẽba idjira beu ɓaɗada ʉ̃rẽbabipeɗa dji dromada ɓʉsia. Maʉ̃ bẽrã bãrãba Ãcõrẽra wãrãda ĩjã panʉa idjaɓa jʉ̃ã panʉa Ãcõrẽba jaraɗara jũma omãrẽã.
22 Wãrã beɗeada ĩjã o panʉ bẽrã bãrãra cadjirua neẽ́ panesiɗaa. Maʉ̃ bẽrã djabarãra wãrãda quĩrĩã panʉa. Soɗeba wãrãda bio dji quĩrĩã ɓeaɗadua.
23 Naʉ̃ djara beuida ɓʉɗeba bãrãra djiwiɗida toɗaẽ́ basía, ãtebʉrʉ Ãcõrẽ beucaɗeba djiwiɗida tosiɗaa. Ãcõrẽ beɗea jõcaba zocai ɓaida diabaria. Maʉ̃ beɗeaɗeba bãrãra djiwiɗida tosiɗaa.
24 Ãcõrẽ Beɗeaɗe nãwã ɓʉ́ ɓʉa:
Jũmarãda chirua quĩrãca ɓeaa. Ãdji quĩrãwãrẽãra nepõnõ quĩrãca ɓʉa.
Chiruara purrubapeɗa dji põnõra jurrubaria.
25 Baribʉrʉ dadjirã Boro beɗeara jõcaa.*
Maʉ̃ beɗea jõcara beɗea bia Critoɗebemaa. Maʉ̃gʉra djabarãba bãrãa jarasiɗaa.
