1 Reye 10:1-29
10 Wẽrãda Sabá druaɗebema boro basía. Maʉ̃ wẽrãba ũrĩsia Salomoʉ̃ra Ãcõrẽneba trʉ̃ ɓʉga ɓʉda. Maʉ̃ carea idjia Salomoʉ̃a ne cawaiẽ́ ɓeada iwiɗiɗe wãsia poya panui cawaya.
2 Idji ume zocãrã wãsiɗaa. Cameyo zocãrãne quera ɓeada, mõgara biya queɗea nẽbʉa ɓea siɗa edesia. Idjaɓa oroda waiɓʉa edesia. Jerusaleʉ̃ne jũẽpeɗa Salomoʉ̃ ume beɗeaɗe wãsia. Maʉ̃ne idjia iwiɗi quĩrĩã ɓaɗara jũma iwiɗisia.
3 Idjia iwiɗiɗara Salomoʉ̃ba jũma ariɗe panusia. Idjia poya panuẽ́ra neẽ́ basía.
4 10:4-5 Mãwã Sabáɗebema boro wẽrãba cawasia Salomoʉ̃ra wãrãda bio ne cawa ɓʉda. Maʉ̃ awara Salomoʉ̃ de dromada, idjia coi carea eroɓʉda, idjiare ɓea chũmebadada, idji nezocarãda ãdji djio bara, idji nezocarã dji dromarãda, idjia Ãcõrẽ de dromane animarã babue diabari siɗa unupeɗa cawa crĩchaẽ́ basía.*
6 Maʉ̃ne idjia Salomoʉ̃a nãwã jarasia:
–Bʉ necawaaɗebemada, bʉa oɗaɗebema siɗa mʉ̃ druaɗe ũrĩsia. Iɗibʉrʉ cawasia maʉ̃ra wãrãda.
7 Zei naẽna mʉ̃a ĩjãẽ́ ɓasia. Baribʉrʉ ara mʉ̃dji dauba ununa bẽrã ĩjãsia. Wãrãda bʉɗebema jarapeɗaɗara ni ẽsidra biɗa mʉ̃́a jaraɗaẽ́ basía. Mʉ̃a ũrĩna cãyãbara bʉra ne cawaara ɓʉa idjaɓa baraara ɓʉa.
8 ¡Bʉ ẽberãrãra bio ɓʉsriɗa ɓeaɗida panʉa!* Bʉare ɓea siɗa bio ɓʉsriɗa ɓeaɗida panʉa ewariza bʉ quĩrãpita panʉne bʉ necawaada ũrĩ panʉ bẽrã.
9 Bʉ Ãcõrẽra bio bia ɓʉa. Idjia bʉra bia unupeɗa israelerã boroda ɓʉsia. Idjia israelerãra ewariza bio quĩrĩã ɓʉ bẽrã, bʉda ãdjirã boroda ɓʉsia bia pe eroɓamãrẽã idjaɓa jipa cawa o ɓamãrẽã.–
10 Sabáɗebema boro wẽrãba Salomoʉ̃a oroda nueve mil libra diasia.* Maʉ̃ awara quera quĩrãtanoa ɓeada, mõgara biya queɗea nẽbʉa ɓea siɗa zocãrã diasia. Maʉ̃ wẽrãba Salomoʉ̃a quera waiɓʉa diaɗa quĩrãca ni aɓaʉba Israel druaɗaa enenacaa.
11 10:11-13 Maʉ̃be Israelɗebema boro Salomoʉ̃ba eroɓʉɗebemada Sabáɗebema boro wẽrãa waiɓʉa diasia. Maʉ̃ awara ne jũma maʉ̃ wẽrãba iwiɗiɗa siɗa diasia. Maʉ̃be Sabáɗebema boro wẽrãra, idji ume zepeɗaɗarã siɗa idji druaɗaa jẽda wãsiɗaa.
Salomoʉ̃ ne bara ɓaɗa
Tiro puruɗebema boro Hiraʉ̃ba barcoda zocãrã eroɓasia. Maʉ̃ barcoba oroda, sándalo bacuruda, idjaɓa mõgara biya queɗea nẽbʉa ɓea siɗa Opir druaɗeba Israel druaɗaa waiɓʉa enebadjiɗaa. Maʉ̃ sándalo bacuruba Salomoʉ̃ba dumene ʉ̃taa jida wãbadada Ãcõrẽ de dromane, idji de dromane biɗa obisia. Maʉ̃ awara arpada, salterio siɗa dji zá cawa ɓea itea obisia. Sándalo bacuru maʉ̃ ewariɗe waiɓʉa enena quĩrãca maʉ̃ naẽna ni maʉ̃are biɗa enenacaa.
14 Poaza Salomoʉ̃ba oroda cincuenta mil libra edabadjia.*
15 Maʉ̃ awara Arabia druaɗebema bororãa, Israelɗebema dji dromarãa biɗa oroda diabibadjia. Ne nẽdobuebadarãa biɗa oroda diabibadjia Israel druaɗe ne nẽdobueɗamãrẽã.
16 Israelɗebema boro Salomoʉ̃ba djõi careabema jũãtrʉbada waiɓʉa ɓeada dosciento berrachi obisia. Maʉ̃za quince libra oro oɗa basía.*
17 Idjaɓa dji caibeada tresciento berrachi obisia. Maʉ̃za libra ũbea auɗu oro oɗa basía.* Jũma maʉ̃ djõi careabema jũãtrʉbadara idji de dromane waga ɓʉsia. Maʉ̃ dera trʉ̃ jarabadjiɗaa “Libanonebema oi.”*
18 10:18-19 Maʉ̃ awara Salomoʉ̃ba bugue waiɓʉada jʉwa tʉɗʉcabari bara obisia. Maʉ̃ra elepante quiɗa oɗa basía. Maʉ̃ buguera oro idji awa quiruba jũma bʉrasia. Dji ẽcarra chũ chũmebarira borogoa ɓasia. Jʉwa acʉare, jʉwa araare biɗa orrocawa imama zaca ɓeada panasiɗaa. Bugueɗe chũmene wãi carea dumeda ɓasia. Maʉ̃ dumera sei quiɗa ɓasia.
20 Dume quiɗaɗe iquiɗaza imama zaca panʉda ɓeasia. Mãwã imama zaca ɓeara doce panasiɗaa. Maʉ̃ bugue quĩrãca ni aɓaʉ dewara druaɗebema boro itea oɗaca basía.
21 Salomoʉ̃ taza ɓeara, epeɗeco ɓea siɗa oro idji awa quiru oɗa basía. Maʉ̃gʉra idji de droma “Libanonebema oi” abadaɗe eroɓasia. Parata oɗara neẽ́ basía. Salomoʉ̃ ewariɗe parata oɗara israelerãmaarã mãcuaẽ́ ɓasia oroda barcoɗe waiɓʉa enebadji bẽrã.
22 Salomoʉ̃ba ne nẽdobada barcoda pe eroɓasia.* Maʉ̃ barcora Tiro puruɗebema boro Hiraʉ̃ barco ɓea ume ne nẽdoɗe wãbadjiɗaa. Poa ũbeaɗe ɓarima aɓa jẽda zebadjiɗaa. Maʉ̃ne oroda, paratada, elepante quiɗada, yarreca ɓeada, idjaɓa ĩbana biya queɗea siɗa enebadjiɗaa.
23 Israelɗebema boro Salomoʉ̃ra baraara ɓasia idjaɓa ne cawaara ɓasia jũma naʉ̃ ẽjũãnebema bororã cãyãbara.
24 Jũma naʉ̃ ẽjũãnebemarãba Salomoʉ̃ra acʉɗe ze quĩrĩã panasiɗaa Ãcõrẽba idjía diaɗa necawaada ũrĩni carea.
25 Poa zebʉrʉza dji acʉɗe ze panʉba Salomoʉ̃ itea ne enebadjiɗaa: oro oɗada, parata oɗada, wua biya queɗeada, djõi careabemada, quera tũãpa ɓeada, cawayoda, mula siɗa.
Salomoʉ̃ba cawayo, carreta siɗa nẽdoɗa
26 Salomoʉ̃ba djõbada carretada, cawayo siɗa zocãrã edasia. Carretara 1,400 edasia idjaɓa cawayoda doce mil edasia. Maʉ̃gʉra idji sordaorã panabada puruza idjaɓa Jerusaleʉ̃ne idji ɓabarima biɗa ɓʉcuasia.
27 Salomoʉ̃ dji boro basiɗe paratada Jerusaleʉ̃ne aɗuba eroɓasia mõgara quĩrãca. Idjaɓa dji biara ɓʉ bacuru Libanonebema enenada aɗuba eroɓasia mẽãbema higojõ eya carraɗe bara quĩrãca.*
28 Salomoʉ̃ itea ne nẽdobadarãba Egiptoɗe idjaɓa Ciliciaɗe cawayoda nẽdobadjiɗaa.*
29 Cawayo aɓa cuatro libra paratabari nẽdobadjiɗaa. Egiptoɗe carreta aɓa quince libra paratabari nẽdobadjiɗaa. Maʉ̃be ãdjirãba hititarã bororãa, Siriaɗebema bororãa biɗa cawayoda, carreta siɗa nẽdobuebadjiɗaa.
Beɗea eɗaare
^ 10:4-5 Idjiare ɓea chũmebadada. Hebreo beɗeaɗe maʉ̃ra ebuɗa ɓʉẽ́a. Ʉ̃cʉrʉmaarã jara ɓʉa: “Idjiare ɓea panabadada.”
^ 10:8 Bʉ ẽberãrãra. Hebreo beɗeaɗe mãwã ɓʉ́ ɓʉa. Griego beɗeaɗe, dewara carta drõãne biɗa “bʉ quimarãra” ɓʉ́ ɓʉa.
^ 10:10 Nueve mil libra. Hebreo beɗeaɗe ɓʉ́ ɓʉa “120 talentos.”
^ 10:14 Cincuenta mil libra. Hebreo beɗeaɗe ɓʉ́ ɓʉa “666 talentos.”
^ 10:16 Quince libra. Hebreo beɗeaɗe ɓʉ́ ɓʉa “seiscientos siclos.”
^ 10:17 Libra ũbea auɗu. Hebreo beɗeaɗe ɓʉ́ ɓʉa “tres minas.”
^ 10:17 Salomoʉ̃ de dromarã mãwã trʉ̃ jarabadjiɗaa Libanonebema bacuru oɗa bẽrã.
^ 10:22 Ne nẽdobada barco. Hebreo beɗeaɗe ɓʉ́ ɓʉa “Tarsiɗebema barco.”
^ 10:27 Dji biara ɓʉ bacuru. Hebreo beɗeaɗe ɓʉ́ ɓʉa “cedro” baribʉrʉ ogoẽ́a.
^ 10:28 Egiptoɗe. Ʉ̃cʉrʉmaarã Musriɗe nẽdobadjiɗaa. Musri druara Cilicia drua caita ɓʉa.
