1 Reye 11:1-43
11 Salomoʉ̃ba ãĩbema wẽrãrãda zocãrã awuasia. Maʉ̃ bẽrã idji quima Egiptoɗebema boro cau awara zocãrã edasia: wẽrãrã Moab druaɗebemada, Amoʉ̃ druaɗebemada, Edoʉ̃ druaɗebemada, Sidoʉ̃ druaɗebemada, idjaɓa hititarãnebema siɗa.
2 Naẽna Ãcõrẽba israelerãa jarasia jũma maʉ̃ ẽberãrã ume mĩã cãĩniẽ́ panʉda. Maʉ̃ ẽberãrã ume mĩã cãĩnibʉrʉ ãdji jʉwaba oɗa ãcõrẽ ɓeada ẽpẽniana asia.* Ãcõrẽba mãwã jaraɗamĩna Salomoʉ̃ba maʉ̃ wẽrãrãra awuapeɗa edacuasia.
3 Dji dromarã cauda seteciento edasia. Dewara wẽrãrã siɗa tresciento eroɓasia. Maʉ̃ wẽrãrã carea Salomoʉ̃ba Ãcõrẽra igarasia.
4 Idji drõã ɓeɗacarea dji quimarãba ãdji ãcõrẽ ɓeada ẽpẽbisiɗaa. Mãwã Salomoʉ̃ba soɗeba Ãcõrẽra ẽpẽẽ́ basía idji zeza Daviba ẽpẽ ɓaɗa quĩrãca.
5 Idjia Sidoʉ̃nebema jʉwaba oɗa ãcõrẽwẽrã Astarteda ẽpẽsia. Maʉ̃ awara amonitarã jʉwaba oɗa ãcõrẽ Milcoʉ̃da ẽpẽsia. Milcoʉ̃ra Ãcõrẽba aɓeɗa quĩrĩãcaa.
6 Mãwã Salomoʉ̃ba Ãcõrẽ quĩrãpita cadjiruada o ɓesia. Idjia Ãcõrẽra ne jũmane ẽpẽẽ́ basía idji zeza Daviba ẽpẽ ɓaɗa quĩrãca.
7 Jerusaleʉ̃neba ʉ̃mãdau odjabariare ɓʉ eya boroɗe Salomoʉ̃ba de zaqueda osia moabitarã jʉwaba oɗa ãcõrẽ Quemoa bia beɗeaɗi carea idjaɓa amonitarã jʉwaba oɗa ãcõrẽ Moloc abadaa bia beɗeaɗi carea. Quemora, Moloc siɗa Ãcõrẽba aɓeɗa quĩrĩãcaa.
8 Ara maʉ̃ quĩrãca jũma idji ãĩbema quimarã itea Salomoʉ̃ba de zaqueda ocuasia ãdji ãcõrẽ ɓeaa querada bá diaɗamãrẽã idjaɓa animarãda babue diaɗamãrẽã.
9 11:9-10 Naẽna israelerã Ãcõrẽra ɓarima umé Salomoʉ̃ma odjapeɗa jarasia ãĩbemarã ãcõrẽ ɓeada ẽpẽrãmãrẽã. Mãwãmĩna Salomoʉ̃ba ĩjãẽ́ basía. Soɗeba Ãcõrẽra ẽpẽẽ́ ɓaɗa bẽrã Ãcõrẽra idji ume quĩrũsia.
11 Maʉ̃ carea Salomoʉ̃a nãwã jarasia:
–Bʉa jãwã o ɓʉ bẽrã idjaɓa mʉ̃a obi jaraɗara igaraɗa bẽrã, mʉ̃a naʉ̃ drua bʉ jʉwaeɗa ɓʉda jãrĩpeɗa aɓa bʉare ɓʉ́a diaya.
12 Bʉ zeza Davi querasi carea mʉ̃a mãwã oẽ́a bʉ waɗi zocai ɓʉɗe. Ãtebʉrʉ bʉ warra jʉwaeɗabemada mʉ̃a naʉ̃ druara jãrĩya.
13 Baribʉrʉ jũma naʉ̃ druara idji jʉwaeɗabemada jãrĩẽ́a. Judaɗeba yõpeɗaɗarã druara idji jʉwaeɗa ɓeya mʉ̃ nezoca Davi querasi carea idjaɓa mʉ̃ de droma ɓamãrẽã edaɗa puru Jerusaleʉ̃ carea.–
26 Nabat warra Jeroboaʉ̃da Salomoʉ̃are dji droma basía. Idjira Epraiʉ̃neba yõna basía. Seredá puruɗebema basía. Dji papa Zeruada pẽdra wẽrã basía. Maʉ̃ Jeroboaʉ̃ba Israelɗebema boro Salomoʉ̃ra ãyã ɓʉ quĩrĩã ɓasia.
27 Maʉ̃ra nãwã basía: Salomoʉ̃ba Jerusaleʉ̃ne idji zeza Davi ɓasi puru mõgaraba auɗu jũrã ca ɓʉra daucha obi ɓasia idjaɓa Milo abadaare dji jogoara egoroba daucha pãrĩbi ɓasia.*
28 Maʉ̃ne cũdra Jeroboaʉ̃da mama traja ɓasia. Idjira bio ʉɓʉa ɓasia.* Salomoʉ̃ba idjira zoquea ɓʉda ununa bẽrã jũma Joseɗeba yõpeɗaɗarã traja panʉ boroda ɓʉsia.
29 Ewari aɓa Jeroboaʉ̃ra Jerusaleʉ̃neba ãyã wãbʉrʉ basía. Maʉ̃ne Ãcõrẽneba beɗeabari Ahíada oɗe unusia. Maʉ̃ Ahíara Siloɗebema basía. Idjia cacuaɗe jʉ̃ ɓʉra djiwiɗi basía. Dji unusiɗaɗe ãduɓa panasiɗaa.
30 Maʉ̃ne Ahíaba djiwiɗi jʉ̃ ɓʉra ẽrãpeɗa pichia cõãcuasia doce jũẽmãrẽã.
31 Maʉ̃be Jeroboaʉ̃a nãwã jarasia:
–Naʉ̃ wua cõãcuaɗara die edadua. Israelerã Ãcõrẽba nãwã jara ɓʉa: “Israelɗeba yõpeɗaɗa doce puruda Salomoʉ̃ jʉwaeɗa panʉa. Baribʉrʉ maʉ̃ doce puruɗebemada mʉ̃a die jãrĩpeɗa bʉ jʉwaeɗa ɓʉya.
32 Maʉ̃be aɓabe Judaɗeba yõna purudrʉ Salomoʉ̃ jʉwaeɗa ɓeya. Maʉ̃ purura idji jʉwaeɗa ɓeya mʉ̃ nezoca Davi querasi carea idjaɓa mʉ̃a edaɗa puru Jerusaleʉ̃ carea. Mʉ̃a jũma Israel druaɗe Jerusaleʉ̃ purudrʉ edasia mʉ̃ de dromada bãrã tãẽna ɓamãrẽã.
33 Mʉ̃a jara ɓʉ quĩrãca oya Salomoʉ̃ba mʉ̃ra igarapeɗa Sidoʉ̃nebema ãcõrẽ Astartea, moabitarã ãcõrẽ Quemoa, amonitarã ãcõrẽ Milcoʉ̃a biɗa bia beɗea ɓʉ bẽrã. Salomoʉ̃ba o ɓʉra mʉ̃ quĩrãpita biẽ́ ɓʉa. Idjira mʉ̃ oɗe jipa nĩbacaa idjaɓa mʉ̃ leyda ĩjãẽ́ ɓʉa idji zeza Daviba ĩjã ɓaɗa quĩrãca.
34 Mãwãmĩna idji zocai ɓʉmisa mʉ̃a israelerãra idji jʉwaeɗabemada jãrĩẽ́a, ãtebʉrʉ idjira waɗi ãdjirã boroda ɓaya mʉ̃a edaɗa nezoca Davi querasi carea. Davi querasibʉrʉ jũma mʉ̃a obi jaraɗara ĩjã obadjia.
35 Baribʉrʉ Salomoʉ̃ warra israelerã boroda ɓebʉrʉɗe mʉ̃a Israelɗeba doce puru yõpeɗaɗaɗebemada die jãrĩya bʉ jʉwaeɗa ɓʉi carea.
36 Maʉ̃be aɓabe Judaɗeba yõna purudrʉ Salomoʉ̃ warra jʉwaeɗa ɓeya. Mãwã oya mʉ̃ nezoca Daviɗeba yõbʉrʉɗebemada aɓa Jerusaleʉ̃ne dji boroda ɓamãrẽã poa zebʉrʉza. Mʉ̃a Jerusaleʉ̃ puruda edasia mʉ̃ de dromada bãrã tãẽna ɓamãrẽã.
37 Baribʉrʉ mʉ̃a bʉra israelerã boroda ɓʉya. Maʉ̃nebʉrʉ bʉa quĩrĩã ɓʉra jũma bʉ jʉwaeɗa ɓaya.
38 Jũma mʉ̃a jara ɓʉda ĩjã odua. Mʉ̃ oɗe jipa nĩbadua. Mʉ̃ quĩrãpita jipa o ɓadua. Idjaɓa mʉ̃ nezoca Davi querasiba ĩjã o ɓaɗa quĩrãca jũma mʉ̃a obi ɓʉda ĩjã odua. Mãwã osira mʉ̃ra bʉ ume ɓaya. Mʉ̃a israelerãra bʉ jʉwaeɗa ɓʉya. Maʉ̃be Daviɗeba yõbʉdarã dji boroda ɓʉbari quĩrãca mʉ̃a bʉra, bʉɗeba yõbʉdarã siɗa poa zebʉrʉza israelerã boroda ɓʉya.
39 Salomoʉ̃ba cadjirua oɗa carea mʉ̃a Daviɗeba yõbʉdara bia mĩgabiya. Baribʉrʉ poa zebʉrʉza mãwã ɓaẽ́a.”–
40 Salomoʉ̃ba maʉ̃nebema ũrĩsiɗe Jeroboaʉ̃ra beai basía. Maʉ̃ carea Jeroboaʉ̃ra Egiptoɗebema boro Sisámaa mĩrũ wãsia. Mama ɓesia aɓa Salomoʉ̃ jaiɗabʉrʉɗaa.
Salomoʉ̃ jaiɗaɗa
41 Ne jũma Salomoʉ̃ba oɗa naʉ̃ cartaɗe ɓʉẽ́ ɓʉra, idji necawaaɗebema siɗa dewara cartaɗe ɓʉ́ ɓʉa. Maʉ̃ carta trʉ̃ra Salomoʉ̃ba oɗaɗebema abadaa.*
42 Salomoʉ̃ba jũma israelerãra cuarenta poa pe eroɓasia. Maʉ̃ne idjira Jerusaleʉ̃ne ɓabadjia.
43 Jaiɗaɗacarea idji zeza Davi querasi puruɗe tʉɓarisiɗaa. Maʉ̃be idji cacuabari idji warra Roboaʉ̃da Israelɗebema boroda ɓesia.
Beɗea eɗaare
^ 11:2 Exodo 34:16.
^ 11:27 Hebreo beɗeaɗe ebuɗa ɓʉẽ́a cãrẽda o panasiɗada.
^ 11:28 Bio ʉɓʉa ɓasia. Hebreo beɗeaɗe ebuɗa ɓʉẽ́a sãwã ɓasida. Hebreoɗe aɓari beɗeaba jara ɓʉa: bio mẽsrã ɓʉda, bio ne bara ɓʉda, bio ne o cawa ɓʉda, idjaɓa bio dji droma ɓʉda.
^ 11:41 Iɗi maʉ̃ carta Salomoʉ̃ba oɗaɗebemara neẽ́a.
