1 Reye 12:1-32
12 Jũma israelerãra Siqueʉ̃ puruɗaa wãsiɗaa Roboaʉ̃da ãdjirã boroda ɓʉɗi carea. Maʉ̃ bẽrã Roboaʉ̃ siɗa wãsia.
2 Nabat warra Jeroboaʉ̃ba maʉ̃ ũrĩsiɗe waɗibiɗa Egiptoɗe ɓasia. Idjira mama ɓabadjia Israelɗebema boro Salomoʉ̃ carea mĩrũ wãna bẽrã.
3 Maʉ̃ne israelerãba idjira trʉ̃bisiɗaa. Zeɗacarea idjira jũma israelerã siɗa Roboaʉ̃maa wãnapeɗa nãwã jarasiɗaa:
4 –Bʉ zeza Salomoʉ̃ba dairãra jũmawãyã mĩgabisia. Maʉ̃ bẽrã dairãba iwiɗi panʉa bʉa idji quĩrãca waa orãmãrẽã. Paratada waiɓʉa diabiẽ́bʉrʉ idjaɓa jũmawãyã trajabiẽ́bʉrʉ dairãra bʉare panenia.–
5 Roboaʉ̃ba panusia:
–Diguiɗaa wãnadua. Ewari ũbeaɗe wayacusa zebʉdaɗe mʉ̃a sãwã oida jaraya.–
Ara maʉ̃da ãdjirãra wãsiɗaa.
6 Maʉ̃be Roboaʉ̃ba idji zeza Salomoʉ̃are panana drõãrãa iwiɗisia:
–Bãrãmaarã puruba iwiɗi ɓʉra ¿mʉ̃a sãwã panui?–
7 Ãdjirãba panusiɗaa:
–Iɗi bʉda ãdjirã nezoca quĩrãca ɓeibʉrʉ, idjaɓa ãdjia iwiɗi panʉda bia ɓʉaɗa aibʉrʉ, ãdjirãra ewariza bʉare panenia.–
8 Baribʉrʉ maʉ̃ drõãrãba jarapeɗaɗara Roboaʉ̃ba ĩjãẽ́ basía, ãtebʉrʉ cũdra idjiare ɓearãa aɓarida iwiɗisia. Maʉ̃ cũdrarãra idji daucha waripeɗaɗa basía.
9 Idjia nãwã iwiɗisia:
–Bãrãmaarã puruba iwiɗi ɓʉra ¿mʉ̃a sãwã panui? Mʉ̃́a iwiɗi panʉa mʉ̃ zezaba ãdjirã bia mĩgabiɗa quĩrãca orãmãrẽã.–
10 Cũdrarã idji daucha waripeɗaɗaba panusiɗaa:
–Bʉ zezaba ãdjirã bia mĩgabiɗa quĩrãca orãmãrẽã iwiɗi panʉ bẽrã ãdjirãa nãwã jaradua: “Mʉ̃ zezaba o ɓaɗa cãyãbara mʉ̃a wetara oya.*
11 Mʉ̃ zezaba bãrãra bio mĩgabisia, baribʉrʉ mʉ̃a wetara oya. Mʉ̃ zezaba bãrãra soaba ubibadjia, baribʉrʉ mʉ̃a bãrãra soa quiɗa bara ɓʉba ubiya.”–*
12 Ewari ũbeaɗe Jeroboaʉ̃ra, jũma israelerã siɗa ãdji boro Roboaʉ̃maa wayacusa wãsiɗaa idjia jaraɗa quĩrãca.
13 Maʉ̃ne drõãrãba jarapeɗaɗara ĩjãnaẽ́ bẽrã Roboaʉ̃ra israelerã ume idarra beɗeasia.
14 Idjiare ɓea cũdrarãba jarapeɗaɗa quĩrãca nãwã jarasia:
–Mʉ̃ zezaba bãrãra bio mĩgabisia, baribʉrʉ mʉ̃a wetara oya. Mʉ̃ zezaba bãrãra soaba ubibadjia, baribʉrʉ mʉ̃a bãrãra soa quiɗa bara ɓʉba bãrãra ubiya.–
15 Puruba iwiɗiɗara Roboaʉ̃ba ĩjãẽ́ basía Ãcõrẽba mãwã quĩrĩãna bẽrã. Idjia Silo puruɗebema Ahíaɗeba Nabat warra Jeroboaʉ̃a jaraɗara jũma mãwãbisia.
16 Israelerãba ãdji boro Roboaʉ̃ba ĩjãẽ́da cawasiɗaɗe idjía nãwã jarasiɗaa:
Dairãra Daviɗeba yõpeɗaɗaẽ́a.Jesé warra Daviba eroɓaɗaɗebemada edaɗaẽ́a.Israelerã, ¡diguiɗaa wãnadrʉ!Daviɗeba zeɗa Roboaʉ̃, ¡ara bʉdji puruda acʉ ɓadua!
Ara maʉ̃da israelerãra diguiɗaa wãbʉrʉsiɗaa.
17 Baribʉrʉ israelerã Juda druaɗebema puruɗe ɓeara Roboaʉ̃ba waɗi pe eroɓesia.
18 Roboaʉ̃ba traju õgo obibari boro Adoraʉ̃da israelerã dji awara wãpeɗaɗamaa edesia. Baribʉrʉ idjira mõgaraba taɓari beasiɗaa. Maʉ̃ carea ne wayaaba Roboaʉ̃ra idji carretaɗe isabe ɓadopeɗa Jerusaleʉ̃naa wãsia.
19 Maʉ̃be israelerã Davi ẽberãrãare pananada awara panesiɗaa. Iɗi biɗa ara mãwã panʉa.
20 Dji awara wãpeɗaɗa israelerãba Jeroboaʉ̃ Egiptoɗeba jẽda zesida cawasiɗaɗe idjira trʉ̃napeɗa ãdjirã boroda ɓʉsiɗaa. Ãdjirãnebema ni aɓaʉda Daviɗeba zeɗa boroare ɓeẽ́ basía. Aɓabe Judaɗeba yõna purudrʉ idjiare ɓesia.
21 Salomoʉ̃ warra Roboaʉ̃ra Jerusaleʉ̃ne jũẽpeɗa Judaɗebema idjaɓa Benjamiʉ̃nebema dji mẽsrãara ɓea sordaorãda jũma jʉresia awara wãpeɗaɗa israelerã ume djõne wãnamãrẽã. 180 mil jʉresia. Idjia crĩcha ɓasia poyasiɗara jũma israelerãra wayacusa idji jʉwaeɗa eroɓaida.
22 Baribʉrʉ Ãcõrẽba idjiɗeba beɗeabari Semaya abadaa nãwã jarasia:
23 –Juda druaɗebema boro Salomoʉ̃ warra Roboaʉ̃a, Judaɗebemarãa, Benjamiʉ̃nebemarãa, waabema israelerã ãdji tãẽna ɓeaa biɗa nãwã jaradua:
24 “Ãcõrẽba nãwã jara ɓʉa: bãrã djabarã israelerã ume djõne wãrãnadua. Mʉ̃abʉrʉ ãdjirãra awara wãbisia. Maʉ̃ bẽrã jũmarãda diguiɗaa wãnadua.”–
Ara maʉ̃da Ãcõrẽba jaraɗara jũmarãba ĩjãsiɗaa. Ãdjirãra diguiɗaa wãsiɗaa Ãcõrẽba jaraɗa quĩrãca.
Jeroboaʉ̃ba israelerãa jʉwaba oɗa ãcõrẽ ẽpẽbiɗa
25 Epraiʉ̃ eyaiɗa ɓʉ druaɗe Jeroboaʉ̃ba Siqueʉ̃ puruda biara opeɗa mama ɓabadjia. Mamaʉba wãpeɗa Penuel puru siɗa biara osia.
26 Maʉ̃ ewariɗe Jeroboaʉ̃ba crĩchasia: “Israelerãra wayacusa Daviɗeba zeɗa boroare wãnisicada.
27 Ãdjirãba Ãcõrẽa animarãda babue diaɗi carea Jerusaleʉ̃ne Ãcõrẽ de dromanaa wãnibʉrʉ, wayacusa Juda druaɗebema boro Roboaʉ̃are panenia. Maʉ̃be mʉ̃ra beaɗapeɗa idjidrʉ ẽpẽnia.”
28 Maʉ̃ carea idjiare ɓeaa iwiɗisia sãwã oida ɓʉ cawaya. Maʉ̃be ãdjia jarapeɗaɗa quĩrãca idjia paca zaque oroɗeda umé obisia. Opeɗaɗacarea israelerãa nãwã jarasia:
–Bãrã israelerãra ara cadrʉa Jerusaleʉ̃naa wãniẽ́ panʉa animarãda Ãcõrẽa babue diaɗi carea. Naʉ̃ paca zaquerãda bãrã ãcõrẽa. Ãdjiabʉrʉ bãrãra Egiptoɗeba ẽdrʉ enesiɗaa.–
29 Maʉ̃ oro oɗa paca zaquera Jeroboaʉ̃ba Betel puruɗe aɓa ɓʉsia, dewarabemada Daʉ̃ puruɗe ɓʉsia.
30 Maʉ̃ba israelerãba cadjiruada o panesiɗaa. Ãdjirãra Betel puruɗaa idjaɓa Daʉ̃ puruɗaa wãbadjiɗaa paca zaquea bia beɗeaɗi carea.*
31 Maʉ̃ umébema puru caita ɓea eya boroɗe Jeroboaʉ̃ba deda paca zaquerã itea obisia. Maʉ̃be idjia bariduada levitarãẽ́ siɗa ɓʉsia paca zaque sacerdoterãda ɓeaɗamãrẽã.
32 12:32-33 Eya boro Betel puru caita ɓʉɗe maʉ̃ sacerdoterãra ɓʉsia animarãda oro oɗa paca zaquea babue diaɗamãrẽã. Maʉ̃ awara ara idji crĩchaɗeba ochobema jeɗecoɗe quince ewariɗe ewari dromada Betel puruɗe obisia Juda druaɗe sietebema jeɗecoɗe obada quĩrãca. Maʉ̃ne idjiabʉrʉ incienso querada oro oɗa paca zaquea bá diasia. Mamaʉba ʉ̃taa idjia ɓʉɗa ewari dromara israelerãba poaza obadjiɗaa.
