1 Reye 17:1-24
17 Maʉ̃ ewariɗe Ãcõrẽneba beɗeabari Elíada ɓasia. Idjira Gala druaɗe Tisbé puruɗebema basía. Maʉ̃ Elíaba Israelɗebema boro Acaboa nãwã jarasia:
–Mʉ̃ra israelerã zocai ɓʉ Ãcõrẽ nezocaa. Idji quĩrãpita wãrãneba jaraya iɗiba ʉ̃taa poa zocãrã cue zeẽ́da ni diamasi biɗa ɓegueaẽ́da aɓa mʉ̃a jarabʉrʉɗaa.–
2 Maʉ̃be Ãcõrẽba Elíaa jarasia:
3 –Namaʉba ãyã wãdua. Querit do zaqueɗe mĩrũ ɓaɗe wãdua. Maʉ̃ra Jordaʉ̃ doɗeba ʉ̃mãdau odjabariare ɓʉa.
4 Maʉ̃ do zaque baidoda bʉa do ɓaya. Idjaɓa mʉ̃a jarasia ĩbanaba djicoda bʉ itea edeɗamãrẽã.–*
5 Ara maʉ̃da Ãcõrẽba jaraɗa quĩrãca Elíaba osia. Jordaʉ̃ doɗeba ʉ̃mãdau odjabariare ɓʉ Querit do zaqueɗe ɓaɗe wãsia.
6 Maʉ̃ne diapeɗaza, quewaraza biɗa ĩbanaba paʉ̃da, nedjara siɗa idji itea edebadjiɗaa. Do zaque baidora do ɓabadjia.
7 Baribʉrʉ maʉ̃ druaɗe cue zeẽ́ ɓʉ bẽrã do zaquera poasia.
Elía Sarepta puruɗebema pẽdra wẽrãma ɓaɗa
8 Maʉ̃be Ãcõrẽba Elíaa nãwã jarasia:
9 –Namaʉba Sidoʉ̃ druaɗaa wãpeɗa Sarepta puruɗe ɓedua. Mʉ̃a jãmabema pẽdra wẽrãa jarasia bʉra ne cobimãrẽã.–
10 Ara maʉ̃da Elíara Sarepta puruɗaa wãsia. Maʉ̃ puruɗe eɗa wãbadama jũẽbʉrʉɗe unusia pẽdra wẽrãba tʉbʉda jʉrʉ pe ɓʉda. Maʉ̃ pẽdra wẽrãra trʉ̃peɗa nãwã jarasia:
–Mʉ̃ quĩrã djuburia mʉ̃ itea baidoda enedua doi carea.–
11 Maʉ̃ pẽdra wẽrã baido jueɗe wãbʉrʉɗe Elíaba wayacusa trʉ̃peɗa jarasia:
–Idjaɓa mʉ̃ quĩrã djuburia paʉ̃da maãrĩ mʉ̃ itea enedua.–
12 Pẽdra wẽrãba panusia:
–Bʉ Ãcõrẽ zocai ɓʉ quĩrãpita wãrãneba jaraya: mʉ̃ra paʉ̃ neẽ́ ɓʉa. Aɓabe cuguruɗe harinada jʉwa baratʉma aɓa eroɓʉa idjaɓa zocoɗe nedragada maãrĩ eroɓʉa. Maʉ̃ carea mʉ̃a tʉbʉda maãrĩ jʉrʉ pe ɓʉa diguiɗa edepeɗa maʉ̃ harinara mʉ̃ itea idjaɓa mʉ̃ warra itea biɗa ãbui carea. Maʉ̃da coɗapeɗa daira jarrababa beuɗia.–
13 Elíaba panusia:
–Ne wayarãdua. Bʉa jaraɗa quĩrãca oɗe wãdua. Baribʉrʉ naãrã bʉa eroɓʉ harinaba mʉ̃ itea paʉ̃ zaqueda aɓa ãbu enedua. Maʉ̃be bʉ itea idjaɓa bʉ warra itea biɗa ãbudua.
14 Mãwã odua israelerã Ãcõrẽba nãwã jara ɓʉ bẽrã: “Bʉa harina cuguruɗe eroɓʉra, nedraga zocoɗe eroɓʉ siɗa jõẽ́a aɓa Ãcõrẽba wayacusa naʉ̃ druaɗe cue zebibʉrʉɗaa.”–
15 Ara maʉ̃da Elíaba jaraɗa quĩrãca pẽdra wẽrãba oɗe wãsia. Copeɗaɗacarea waɗibiɗa harinara ɓesia Elíaba, pẽdra wẽrãba, dji warra biɗa ewariza coɗamãrẽã.*
16 Ãcõrẽba Elíaɗeba jaraɗa quĩrãca harina cuguruɗe ɓʉra, nedraga zocoɗe ɓʉ siɗa jõẽ́ basía.
17 Ewari aɓa pẽdra wẽrã warrara cacua biẽ́ ɓesia. Ara maʉ̃ba jũãcãyã nũmepeɗa jaiɗasia.
18 Maʉ̃ carea pẽdra wẽrãba Elíaa jarasia:
–Ãcõrẽneba beɗeabari, ¿cãrẽ cãrẽã mʉ̃ra mĩã sẽne zesi?* ¿Mʉ̃ warra beumãrẽã mʉ̃a cadjirua oɗara Ãcõrẽa quĩrãnebabiɗe zesica?–
19 Elíaba panusia:
–Bʉ warrara mʉ̃́a diadua.–
Ara maʉ̃da warrara pẽdra wẽrã ɓacaraɗe ɓʉda Elíaba bara edapeɗa ʉ̃taarebema dejãne idji cãĩ ɓabarimaa edesia. Mama idji cʉɗaɗe ɓʉsia.
20 Maʉ̃be Elíaba Ãcõrẽa nãwã beɗea djuburiasia:
–Mʉ̃ Boro Ãcõrẽ, naʉ̃ pẽdra wẽrãba mʉ̃ra idji diguiɗa bia eroɓʉa. ¿Bʉa cãrẽ cãrẽã idjira sopua unubi ɓʉ? ¿Cãrẽ cãrẽã idji warrara jaiɗabisi?–
21 Ara maʉ̃da Elíara ɓarima ũbea warra jaiɗaɗa ʉ̃rʉ̃ ɓarruɓari coɓesia. Mãwã o ɓʉɗe Ãcõrẽa nãwã beɗea djuburiasia:
–Mʉ̃ Boro Ãcõrẽ, mʉ̃ quĩrã djuburia, naʉ̃ warrara ʉ̃rẽbabidua.–
22 Elíaba beɗea djuburiaɗada Ãcõrẽba bia ũrĩna bẽrã warrara ʉ̃rẽbabisia.
23 Ara maʉ̃da Elíaba warrara eɗaa dji papamaa diaɗe wãsia. Diabʉrʉɗe nãwã jarasia:
–Acʉdua, bʉ warrara zocai ɓʉa.–
24 Maʉ̃ne dji papaba Elíaa jarasia:
–Iɗibʉrʉ mʉ̃a cawasia bʉra wãrãda Ãcõrẽneba beɗeabarida idjaɓa bʉa jara ɓʉra wãrãda Ãcõrẽneba ze ɓʉda.–
