1 Reye 18:1-46
18 Poa ũbea cue zeẽ́ ɓasia. Maʉ̃be Ãcõrẽba Elíaa nãwã jarasia:
–Israel boro Acaboda acʉɗe wãdua. Maʉ̃bebʉrʉ idji druaɗe mʉ̃a cue zebiya.–
2 Ara maʉ̃da Elíara Acabo acʉɗe wãsia. Maʉ̃ ewariɗe Samaria druaɗe jarrabara wetara nũmasia.
3 Maʉ̃ carea Acaboba idji deɗebema boro Abdíada trʉ̃sia. (Maʉ̃ Abdíaba Ãcõrẽra bio waya ɓasia.
4 Maʉ̃ carea Acabo quima Jezabelba Ãcõrẽneba beɗeabadarã quenabisiɗe Abdíaba ãdjirãnebemada cien edapeɗa eya uria umé panʉne mĩrũbicuasia. Uriaza cincuenta mĩrũbicuapeɗa baidoda, coɗi siɗa diasia.)
5 Acaboba Abdíaa nãwã jarasia:
–Dadji druaɗe do zaqueza idjaɓa baido ʉ̃taa bogadrʉ ɓeaza wãnia. Chiruada ununisicada dadji cawayoba, mula biɗa coɗamãrẽã. Mãwã dadji animarãra jũma quininaẽ́a.–
6 Ãdjiza jarasiɗaa sãma wãnida. Acabora o aɓaare wãsia. Abdíara dewara óare wãsia.
7 Oɗe nĩne Abdíara Elía ume quĩrãdjusiɗaa. Abdíaba Elíada jãwã ɓʉda cawasiɗe idji quĩrãpita chĩrãboroɗe ɓarru coɓepeɗa nãwã jarasia:
–Mʉ̃ boro Elía, ¿bʉda jãwã ɓʉca?
8 Elíaba panusia:
–Mãẽ, mʉ̃da jãwã ɓʉa. Bʉ boro Acaboa jaraɗe wãdua mʉ̃ra nama ɓʉda.–
9 Maʉ̃ne Abdíaba panusia:
–¿Mʉ̃a cãrẽ cadjiruada oɗa bẽrã bʉa Acaboa mãwã jaraɗe wãbi ɓʉ? Mãwã jaraɗe wãibʉrʉ idjia mʉ̃ra beaya.
10 Bʉ Ãcõrẽ zocai ɓʉ quĩrãpita mʉ̃a wãrãneba jaraya: mʉ̃ boro Acaboba druaza bʉra jʉrʉbibadjia. Baribʉrʉ jũmarãba jarabadjiɗaa bʉra ãdjirã druaɗe neẽ́da. Maʉ̃ne Acaboba ãdjirãa wãrãneba jarabibadjia bʉra wãrãda ãdjirã druaɗe neẽ́da.
11 Maʉ̃da ¿bʉ nama ɓʉda mʉ̃ boro Acaboa jaraɗe wãbi ɓʉca?
12 Mʉ̃ wãnacarea Ãcõrẽ Jaureba bʉra mʉ̃a adua ɓʉmaa edeisicada. Bʉ nama ɓʉda Acaboa jarasira maʉ̃ne idjia bʉda unune zeẽ́bʉrʉ, mʉ̃ra beaya. Quĩrãnebadua warra eɗaʉba mʉ̃a Ãcõrẽra bio waya ɓʉda.
13 ¿Mʉ̃a oɗara bʉ́a jaraɗaẽ́ panʉca? Acabo quima Jezabelba Ãcõrẽneba beɗeabadarã quenabisiɗe mʉ̃a eya uria umé panʉne ãdjirãnebemada cien mĩrũbicuasia. Uriaza cincuenta mĩrũbicuapeɗa baidoda, coɗi siɗa ãdjirãa diasia.
14 Maʉ̃da ¿bʉ nama ɓʉda mʉ̃ boro Acaboa jaraɗe wãbi ɓʉca? Mãwã jaraɗe wãibʉrʉ, idjia mʉ̃ra beaya.–
15 Baribʉrʉ Elíaba panusia:
–Mʉ̃ra Ãcõrẽ jũma poya ɓʉ nezocaa. Idji quĩrãpita wãrãneba jaraya: iɗi mʉ̃ra Acabo ume beɗeaya.–
16 Ara maʉ̃da Abdíaba Acabora jʉrʉɗe wãsia. Acabo unupeɗa jarasia Elíara sãma unuida ɓʉda. Ara maʉ̃da Acaboba Elíara acʉɗe wãsia.
17 Acaboba Elía unusiɗe nãwã jarasia:
–Israelerã mĩgabibari, ¿bʉra nama ɓʉca?–
18 Elíaba panusia:
–Mʉ̃a israelerãra mĩgabiẽ́ ɓʉa. Ãtebʉrʉ bʉabʉrʉ, bʉ ẽberãrã biɗa israelerãra bia mĩgabi panʉa. Ãcõrẽba obi jaraɗara bãrãba igaraɗapeɗa Baalda ẽpẽ panʉa.
19 Jãʉ̃be israelerãra jũma trʉ̃bidua Carmelo eyaɗe ãbaa dji jʉreɗi carea. Idjaɓa Baalɗeba beɗeabadarã 450 panʉda trʉ̃bidua. Ãdjirã awara Aseráɗeba beɗeabadarã 400 panʉ siɗa trʉ̃bidua. Bʉ quima Jezabelba jũma ãdjirãra ne cobibaria.–
Elíaba wãrã Ãcõrẽ cawabiɗa
20 Maʉ̃be Acaboba israelerãra Carmelo eyaɗaa jũma trʉ̃bicuasia. Baalɗeba beɗeabadarã siɗa mama ãbaa dji jʉresiɗaa.
21 Maʉ̃ne Elíara jũmarã quĩrãpita piradrʉpeɗa nãwã jarasia:
–¿Aɓa sãʉ̃be crĩcha umé eropanani? Baalda wãrã Ãcõrẽ baibʉrʉ, idjidrʉ ẽpẽnadua. Baribʉrʉ Ãcõrẽda dji wãrã araa baibʉrʉ, idjidrʉ ẽpẽnadua.–
Baribʉrʉ ẽberãrãba ni cãrẽ siɗa jaraɗaẽ́ basía.
22 Maʉ̃ne Elíaba jarasia:
–Ãcõrẽneba beɗeabarira aɓabe mʉ̃drʉ ɓesia. Maʉ̃ne Baalɗeba beɗeabadarãda 450 panʉa.
23 Paca zaque dji umaquĩrãda umé dairãa diaɗadua. Baalɗeba beɗeabadarãba aɓa edaɗapeɗa beaɗia. Tʉcuaɗapeɗa tʉbʉ ʉ̃rʉ̃ ɓʉɗia Baalea babue diaɗi carea. Baribʉrʉ tʉbʉra coaɗaẽ́a. Dewarabema paca zaquera mʉ̃a biɗa beapeɗa, tʉcuapeɗa, tʉbʉ ʉ̃rʉ̃ ɓʉya Ãcõrẽa babue diai carea. Mʉ̃a biɗa tʉbʉra coaẽ́a.
24 Maʉ̃ne Baalɗeba beɗeabadarãba iwiɗiɗia Baalba ãdji tʉbʉra jidabimãrẽã. Mʉ̃a biɗa Ãcõrẽa iwiɗiya mʉ̃ tʉbʉra jidabimãrẽã. Dji tʉbʉ jidabibʉrʉdrʉ dji wãrã Ãcõrẽa.–
Maʉ̃ne jũmarãba bia ɓʉaɗa asiɗaa.
25 Elíaba Baalɗeba beɗeabadarãa nãwã jarasia:
–Bãrãra zocãrã panʉ bẽrã bãrãbʉrʉ paca zaqueda naãrã edaɗadua. Beaɗapeɗa, tʉcuaɗapeɗa, tʉbʉ ʉ̃rʉ̃ ɓʉɗadua Baalea babue diaɗi carea. Baribʉrʉ tʉbʉra coarãnadua. Maʉ̃be Baalea iwiɗiɗadua bãrã tʉbʉra jidabimãrẽã.–
26 Ara maʉ̃da israelerãba paca zaque diapeɗaɗara ãdjirãba edasiɗaa. Beaɗapeɗa, tʉcuaɗapeɗa, tʉbʉ ʉ̃rʉ̃ ɓʉsiɗaa Baalea babue diaɗi carea. Maʉ̃be diapeɗaʉba aɓa umatipa ãdjirãba Baalea iwiɗi panesiɗaa ãdji tʉbʉra jidabimãrẽã. Nãwã jarasiɗaa: “Baal, dairã beɗeara panudua.” Baribʉrʉ panuẽ́ basía. Chupea nũmasia. Maʉ̃be ãdjia animarã babue diaɗi carea opeɗaɗa icawa carisiɗaa.
27 Umatipa babʉrʉɗe Elíaba ãdjirãa nãwã ipiɗa jarasia:
–Wetara ɓiaɗadua. ¿Idjira bãrã ãcõrẽẽ́ca? Ne crĩcha ɓʉba ũrĩẽ́ ɓʉsicada. Ãĩbẽrã doeɗa wã ɓʉsicada wa ãyã wã ɓʉsicada. Ãĩbẽrã cãĩ ɓʉ bẽrã ʉ̃rʉ̃manida panʉsicada.–
28 Maʉ̃ carea ãdjirãba wetara Baalea ɓia iwiɗi duanesiɗaa. Necoba, mĩãsu biɗa ara ãdjiduɓa cõcuasiɗaa ãdjia Baal itea obada quĩrãca. Maʉ̃ba ãdjirãra oa purega duanesiɗaa.
29 Umatipa eɗaʉba aɓa quewara ãdjirã cari duanʉne Baalea ɓia iwiɗi panesiɗaa. Baribʉrʉ quewara israelerãba Ãcõrẽa animarã babue diabada horaca waɗibiɗa Baalba panuẽ́ ɓasia ni ũrĩẽ́ ɓasia.* Chupea ɓasia.
30 Maʉ̃be Elíaba israelerãa nãwã jarasia:
–Mʉ̃maa zeɗadua.–
Ara maʉ̃da caita wãsiɗaa. Maʉ̃ne Elíaba mõgara ʉ̃tʉ pã bue ɓaɗada waya bia osia paca zaqueda Ãcõrẽa babue diai carea.
31 18:31-32 Mõgarada doce edapeɗa dji animarã babue diabadada bia osia. (Maʉ̃ doce mõgaraba jara ɓʉa Jacoboɗeba yõpeɗaɗa puru doce panʉda. Ãcõrẽba Jacobora trʉ̃ ɓʉsia Israel.) Elíaba maʉ̃ animarã babue diabada icawa pʉrrʉa corosia. Maʉ̃ coroɗaɗe baidoda galoʉ̃ ũbea auɗu poyaida ɓasia.*
33 Maʉ̃be tʉbʉra cajẽrãpeɗa paca zaquera beasia. Tʉcuapeɗa tʉbʉ ʉ̃rʉ̃ coɓʉsia.
34 Maʉ̃ne Elíaba jarasia:
–Baidoda zoco quĩmãrẽ jue enenadua. Maʉ̃ baidora paca tʉcuaɗa ʉ̃rʉ̃ weaɗadua. Tʉbʉra jũma ɓeguea oɗadua.–
Mãwã opeɗaɗacarea Elíaba jarasia:
–Wayacusa ara maʉ̃ quĩrãca oɗadua.–
Ara maʉ̃da mãwã osiɗaa. Elíaba wayacusa jarasia ara maʉ̃ quĩrãca oɗamãrẽã. Ara maʉ̃da wayacusa mãwã osiɗaa.
35 Mãwã o panʉne baidora ãyã wea nũmesia. Aɓeɗa dji animarã babue diabada icawa pʉrrʉa coroɗara baidoba bira ũmesia.
36 Quewara israelerãba Ãcõrẽa animarã babue diabada horaca Elíara animarã babue diabada caita wãpeɗa Ãcõrẽa nãwã iwiɗisia: “Ãcõrẽ, bʉdrʉ Abrahaʉ̃, Isa, idjaɓa Israel Ãcõrẽa. Iɗi unubidua bʉra wãrãda israelerã Ãcõrẽda idjaɓa mʉ̃ra bʉ nezocada. Unubidua bʉabʉrʉ mʉ̃́a nãwã obi ɓʉda.
37 Mʉ̃ beɗeara panudua, Ãcõrẽ, mʉ̃ beɗeara panudua. Mãwã naʉ̃ ẽberãrãba cawaɗia bʉdrʉ wãrã Ãcõrẽda idjaɓa bʉabʉrʉ nãwã obi ɓʉda ãdjirãba wayacusa ĩjãnamãrẽã.”
38 Mãwã iwiɗi ɓʉɗe Ãcõrẽba tʉbʉ uruada bajãneba dji animarã babue diabada ʉ̃rʉ̃ ɓaebisia. Maʉ̃ba dji animarã tʉcuaɗara, tʉbʉra, mõgarara, egoro siɗa jũma bá wãsia. Dji icawa coroɗaɗe baido ũmana siɗa tʉbʉ jʉ̃wʉ̃rʉ̃ãba jũma põãsasia.
39 Maʉ̃ unusiɗaɗe israelerãra chĩrãboroɗe ɓarru copanenapeɗa nãwã jĩgua jarasiɗaa:
–Naʉ̃ Ãcõrẽdrʉ dji wãrã araa. Naʉ̃ Ãcõrẽdrʉ dji wãrã araa.–
40 Maʉ̃be Elíaba ãdjirãa jarasia:
–Baalɗeba beɗeabadarãda jũma jidaɗadua. Ni aɓaʉda idu mĩrũ wãbirãnadua.–
Ara maʉ̃da israelerãba ãdjirãra jidacuaɗapeɗa Elíaba Quisoʉ̃ do zaqueɗaa edebisia. Mama idjia jũma quenasia.
Elíaba Ãcõrẽa iwiɗiɗa cue zebimãrẽã
41 Maʉ̃be Elíaba Acaboa nãwã jarasia:
–Ne coɗe wãdua. Mʉ̃a cue droma zebʉrʉda ũrĩ ɓʉa.–
42 Ara maʉ̃da Acabora ne coɗe wãsia. Baribʉrʉ Elíara Carmelo eyaɗe ʉ̃taa wãsia. Mama chĩrãboroɗe coɓepeɗa dratura egoroɗaa tẽũ coɓesia.
43 Maʉ̃be Elíaba idji nezocaa nãwã jarasia:
–Ʉ̃taara wãpeɗa pusaɗaa acʉdua.–
Ara maʉ̃da idji nezocara ʉ̃taara wãpeɗa pusaɗaa acʉsia. Jẽda zepeɗa Elíaa jarasia:
–Ni cãrẽ siɗa unuẽ́ basía.–
Elíaba wayacusa jarasia acʉɗe wãmãrẽã. Ara maʉ̃ quĩrãca ɓarima siete mãwã osia.
44 Ɓarima siete wãbʉrʉɗe Elía nezocaba jẽda zepeɗa nãwã jarasia:
–Mʉ̃a unusia jʉ̃rãrã maãrĩ jʉwajã quĩrãca quiruda pusaareba zebʉrʉda.–
Elíaba jarasia:
–Acaboa jaraɗe wãdua idji carretaɗe ɓadopeɗa isabe diguiɗaa wãmãrẽã. Isabe wãẽ́bʉrʉ cueba poya wãẽ́a.–
45 Acaboba maʉ̃ ũrĩsiɗe idji carretaɗe ɓadopeɗa Jezreel puruɗaa wãsia. Mãwã ɓʉɗe ewarira pãĩmaga bueasia. Nãũrã bara zesia. Maʉ̃ne cuera dji cãbãyã ze nũmesia.
46 Ãcõrẽba Elíaa idji ʉɓʉada diaɗa bẽrã Elíaba cacuaɗe jʉ̃ ɓʉra bio trãjʉ̃peɗa Acabo na pira wãsia Jezreel puruɗaa.
