1 Reye 19:1-21
19 Elíaba oɗada, Baalɗeba beɗeabadarã necoba quenana siɗa Acaboba idji quima Jezabelea jũma nẽbʉrʉsia.
2 Maʉ̃ carea Jezabelba aɓa Elíamaa nãwã jaraɗe diabuesia: “Jezabelba idji ãcõrẽ ɓea quĩrãpita wãrãneba jara ɓʉa nu naʉ̃ horaca bai naẽna bʉra beaida bʉa Baalɗeba beɗeabadarã quenana quĩrãca.”*
3 Maʉ̃ ũrĩsiɗe Elíara dauperapeɗa mĩrũ wãsia. Wãne Juda druaɗe Beersebá puruɗe jũẽne wãsia. Mama Elíaba idji nezocara ɓeesia.
4 Maʉ̃be idjira ẽjũã põãsa ewaraga ɓʉɗe ewari aɓa wãsia. Mama bacuru zaque edre chũmepeɗa nãwã crĩchasia: “Biara ɓʉa beuida.” Maʉ̃ bẽrã idjia Ãcõrẽa jarasia:
–Ãcõrẽ, waaẽ́a. Mʉ̃ra beadua. Mʉ̃ drõã naẽnabemarã beupeɗaɗa cãyãbara mʉ̃ra biara ɓʉẽ́a.–
5 Mãwã jarapeɗa Elíara bacuru zaque edre cãĩ coɓesia. Mãwã ɓʉɗe Ãcõrẽ nezoca bajãnebemada idjimaa zepeɗa ʉ̃rʉ̃matasia. Maʉ̃be jarasia:
–Piradrʉpeɗa ne codua.–
6 Elíaba acʉbʉrʉɗe idji boro nocoare paʉ̃ tʉbʉɗe ãbuɗada idjaɓa zocoɗe baidoda unusia. Ne copeɗa, baido siɗa dopeɗa wayacusa cãĩ coɓesia.
7 Ãcõrẽ nezoca bajãnebemada idjimaa wayacusa zepeɗa ʉ̃rʉ̃matasia. Maʉ̃be jarasia:
–Piradrʉpeɗa ne codua. Bʉra tʉmʉ wãida ɓʉa.–
8 Ara maʉ̃da Elíara piradrʉpeɗa ne cosia, baido siɗa dosia. Mãwã ne coɗaba cacua ʉɓʉapeɗa cuarenta ewari, ãsa, diamasi biɗa oɗe nĩbasia aɓa Horeb eyaɗe jũẽbʉrʉɗaa. Maʉ̃ eyara Ãcõrẽ eya abadaa.
9 Jũẽna diamasi Elíara eya uriaɗe cãĩne wãsia.
Maʉ̃ne Ãcõrẽba idjía nãwã jarasia:
–Elía, ¿cãrẽda nama o ɓʉ?–
10 Elíaba panusia:
–Ãcõrẽ jũma poya ɓʉ, mʉ̃ra zoquea ɓasia bʉa quĩrĩã ɓʉra oi carea. Baribʉrʉ bʉa israelerã ume beɗea ɓʉɗada ãdjirãba igarasiɗaa. Maʉ̃ne bʉ itea oɗa animarã babue diabadara jũma ãrĩsiɗaa. Maʉ̃ awara bʉɗeba beɗeabadarãda necoba jũma quenasiɗaa. Aɓabe mʉ̃drʉ ɓʉa baribʉrʉ mʉ̃ siɗa beaɗi carea jʉrʉ panʉa.–
11 Maʉ̃ne Ãcõrẽba Elíaa jarasia:
–Dajadaa mʉ̃ quĩrãpita naʉ̃ eyaɗe nũmane zedua, mʉ̃ra wãyã wãbʉrʉ bẽrã.–
Ara maʉ̃da Ãcõrẽ na nãũrãda dji cãbãyã tʉsia. Maʉ̃ nãũrãba eyara ʉracuasia. Mõgara siɗa toɗozoasia. Baribʉrʉ Ãcõrẽda mãwã ɓaẽ́ basía. Nãũrã wãnacarea de uremiada wãsia. Baribʉrʉ Ãcõrẽda mãwã ɓaẽ́ basía.
12 De uremia wãnacarea tʉbʉ uruada eradrʉ nũmesia. Baribʉrʉ Ãcõrẽda mãwã ɓaẽ́ basía. Tʉbʉ urua quiɗacarea Elíaba nãũrãda pĩãca sʉ̃ga nũmʉda ũrĩsia.
13 Maʉ̃ ũrĩbʉrʉɗe Elíaba jʉ̃ ɓʉba idji quĩrãdarrara jũãtrʉsia. Maʉ̃be dajadaa wãpeɗa eya uria caita nũmesia. Maʉ̃ne beɗeada ũrĩsia. Maʉ̃ba nãwã jarasia:
–Elía, ¿cãrẽda nama o ɓʉ?–
14 Elíaba panusia:
–Ãcõrẽ jũma poya ɓʉ, mʉ̃ra zoquea ɓasia bʉa quĩrĩã ɓʉra oi carea. Baribʉrʉ bʉa israelerã ume beɗea ɓʉɗada ãdjirãba igarasiɗaa. Maʉ̃ne bʉ itea oɗa animarã babue diabadara jũma ãrĩsiɗaa. Maʉ̃ awara bʉɗeba beɗeabadarãda necoba jũma quenasiɗaa. Aɓabe mʉ̃drʉ ɓʉa, baribʉrʉ mʉ̃ siɗa beaɗi carea jʉrʉ panʉa.–
15 Ãcõrẽba Elíaa jarasia:
–Jẽda ẽjũã põãsa ewaraga ɓʉare Damasco puruɗaa wãdua. Mama jũẽpeɗa nedragada Hazael boro ʉ̃rʉ̃ weadua Siriaɗebema boroda ɓʉi carea.
16 Maʉ̃ awara Nimsi wiuzaque Jehúmaa wãpeɗa nedragada idji boro ʉ̃rʉ̃ weadua Israelɗebema boroda ɓʉi carea. Idjaɓa Abel-mehola puruɗebema Sapa warra Eliseomaa wãpeɗa nedragada idji boro ʉ̃rʉ̃ weadua bʉ cacuabari mʉ̃neba beɗeabarida ɓʉi carea.
17 Maʉ̃be Israel druaɗe mʉ̃ igara panʉra Hazaelba necoba zocãrã quenaya. Idjia quenanaẽ́ra Jehúba necoba quenaya. Jehúba quenanaẽ́ra Eliseoba quenaya.
18 Baribʉrʉ Israel druaɗe mʉ̃a ẽberãrãra siete mil waga eroɓʉa. Ãdjirãra Baal quĩrãpita chĩrãboroɗe ɓarru coɓeaɗacaa ni idjira isõnacaa.–
Elíaba Eliseo trʉ̃na
19 Maʉ̃be Elíara Horeb eyaɗeba wãsia. Wãne Sapa warra Eliseoda, once ẽberãrã idji ume ẽjũã o panʉ siɗa unusia. Ãdjirãza pacada umé uméa ãbaa jʉ̃ eropanasiɗaa. Maʉ̃ pacaba bacuru cũmia ɓʉda egoroɗe erreɓari eronĩbasiɗaa egorora bogajuɗapeɗa ne uɗi carea. Elíara Eliseo caita wãpeɗa idjia cacuaɗe jʉ̃ ɓʉra Eliseo ʉ̃rʉ̃ wẽã coɓʉsia acʉbi carea Eliseora idji cacuabari Ãcõrẽneba beɗeabari baida. Maʉ̃be wãsia.
20 Ara maʉ̃da Eliseoba idji pacara amepeɗa Elía caiɗu pira wãsia. Jidapeɗa nãwã jarasia:
–Bʉ ume wãi naẽna idu mʉ̃ djibarirãda isõne wãbidua. Maʉ̃bebʉrʉ mʉ̃ra bʉ ume wãya.–
Elíaba jarasia:
–Wãdua. Mʉ̃a bʉra wãbi ama ɓʉẽ́a.–
21 Ara maʉ̃da Eliseora jẽda wãsia. Jũẽpeɗa idji umébema pacara beapeɗa dji pacaba erreɓari ɓaɗa bacuruda ɓʉá tucuapeɗa tʉbʉ cajẽrãsia. Maʉ̃ne dji paca djarara djupeɗa idji ẽberãrãra ne cobigasia. Mãwãnacarea idjira Elía caiɗu wãpeɗa Elía carebabarida ɓesia.
Beɗea eɗaare
^ 19:2 Griego beɗeaɗe idjaɓa nãwã ɓʉ́ ɓʉa: “Bʉda Elíabʉrʉ, mʉ̃ra Jezabelea.”
