1 Reye 21:1-29
21 Dãrã baɗacarea naʉ̃da mãwãsia. Jezreel puruɗebema Nabó abadaba uva ẽjũãda Israelɗebema boro Acabo de droma caita eroɓasia.*
2 Maʉ̃ carea Acaboba Nabóa nãwã jarasia:
–Bʉ uva ẽjũãda mʉ̃ de caita ɓʉ bẽrã mʉ̃́a nẽdobuedua. Jãma ne u quĩrĩã ɓʉa. Maʉ̃ ẽjũãbari mʉ̃a dewara uva ẽjũã biara ɓʉda diaya. Ẽjũã cãyãbara paratada quĩrĩã ɓʉbʉrʉ dji ẽjũã nẽbʉa ɓʉ quĩrãca diaya.–
3 Baribʉrʉ Nabóba panusia:
–Wãrãneba jaraya: mʉ̃ zeza ɓasiba mʉ̃́a diaɗa ẽjũãra nẽdobueẽ́a.–
4 Jezreelɗebema Nabóba mãwã jaraɗa bẽrã Acabora sopuapeɗa quĩrũquĩrũa diguiɗaa wãsia. Diguiɗa jũẽpeɗa idji cʉɗaɗe quĩrã ãyã taɓesia idjaɓa ne co quĩrĩãẽ́ basía.
5 Mãwã ɓʉɗe Acabo quima Jezabelera idjimaa zepeɗa iwiɗisia:
–¿Bʉra cãrẽ cãrẽã sopua ɓʉ? ¿Cãrẽã ne co ama ɓʉ?–
6 Acaboba panusia:
–Mʉ̃ra Jezreelɗebema Nabó ume beɗeasia. Mʉ̃a iwiɗisia idji uva ẽjũãra mʉ̃́a nẽdobuemãrẽã. Parata cãyãbara dewara ẽjũãda quĩrĩã ɓʉbʉrʉ mʉ̃a diayaɗa asia. Baribʉrʉ idji ẽjũãra nẽdobueẽ́ana asia.–
7 Maʉ̃ne Acabo quima Jezabelba jarasia:
–¿Mãwãra bʉra Israelɗebema boroẽ́ca? Sopua ɓarãdua. Piradrʉpeɗa ne codua. Mʉ̃a Jezreelɗebema Nabó uva ẽjũãra bʉ́a jãrĩ diaya.–
8 Ara maʉ̃da Jezabelba Acabo trʉ̃neba cartada ɓʉcuapeɗa Acabo sẽyãda ɓʉsia. Maʉ̃ra Nabó puruɗebema bororãmaa, dji dromarãmaa biɗa diabuesia.
9 Maʉ̃ cartaɗe idjia nãwã ɓʉsia:
“Jũmarãa jaraɗadua ne coɗaca ewarida oɗamãrẽã. Maʉ̃ ewariɗe ãbaa dji jʉreɗapeɗa Nabóra ẽberãrã nocoare chũmebiɗadua.
10 Idjaɓa ẽberã cadjiruada umé idji caita chũmebiɗadua sewaɗeba jaraɗamãrẽã idjia Ãcõrẽda, Israelɗebema boro siɗa biẽ́ jarasida. Maʉ̃be Nabóra puru jĩga edeɗapeɗa mõgaraba taɓari beaɗadua.”
11 Jezabelba maʉ̃ cartaɗe ɓʉɗa quĩrãca Jezreel puruɗebema bororãba, dji dromarã biɗa jũma osiɗaa.
12 Ãdjirãba jũmarãa jarasiɗaa ne coɗaca ewarida oɗamãrẽã. Maʉ̃be Nabóra ẽberãrã nocoare chũmebisiɗaa.
13 Ẽberã cadjiruada umé zebiɗapeɗa Nabó caita chũmebisiɗaa. Maʉ̃ umébemaba jũmarã quĩrãpita sewaɗeba jarasiɗaa Nabóba Ãcõrẽda, Israelɗebema boro siɗa biẽ́ jarasida. Ara maʉ̃da ẽberãrãba Nabóra puru jĩga edeɗapeɗa mõgaraba taɓari beasiɗaa.
14 Mãwãnacarea Jezreel puruɗebema bororãba Jezabelea jarabisiɗaa Nabóra mõgaraba taɓari beasiɗada.
15 Nabó mõgaraba taɓari beapeɗaɗa ũrĩsiɗe Jezabelba idji quima Acaboa nãwã jarasia:
–Jezreel puruɗebema Nabóra beasiɗaa. Maʉ̃ bẽrã idjia uva ẽjũã nẽdobue quĩrĩãẽ́ ɓaɗara edadua.–
16 Acaboba Nabó beapeɗaɗa ũrĩsiɗe ara maʉ̃da Jezreel puruɗaa Nabó uva ẽjũã edai carea wãsia.
17 Maʉ̃misa Ãcõrẽba Tisbé puruɗebema Elíaa nãwã jarasia:
18 –Israelɗebema boro Acabo Samariaɗe ɓabarira acʉɗe wãdua. Idjia Nabó ɓasi uva ẽjũãra edai carea wãsia. Ara nawena mama ɓʉa.
19 Idjía jaradua: “Ãcõrẽba nãwã jara ɓʉa: bʉa Nabóra beapeɗa idji ẽjũãra edasia. Maʉ̃ carea usaba Nabó oa senepeɗaɗama bʉ oa siɗa senenia.”–
20 Elía Acaboma jũẽsiɗe Acaboba idjía jarasia:
–Mʉ̃ dji quĩrũ, ¿bʉa mʉ̃ra acʉɗe ze ɓʉca?–
Elíaba panusia:
–Mãẽ, bʉra acʉɗe ze ɓʉa. Bʉa Ãcõrẽ quĩrãpita jũmawãyã cadjiruada o ɓʉa.
21 Maʉ̃ carea Ãcõrẽba bʉra bio cawa oya. Israel druaɗe jũma bʉ ẽberãrã dji umaquĩrãda quenabiya: nezoca ɓeada, nezocaẽ́ ɓea siɗa. Aɓeɗa jũma bʉɗeba yõbʉdarãda idjia jõbiya.
22 Idjia Nabat warra Jeroboaʉ̃ ẽberãrã jõbiɗa quĩrãca idjaɓa Ahía warra Baasa ẽberãrã jõbiɗa quĩrãca bʉ ẽberãrã siɗa jõbiya. Bʉa cadjirua o ɓʉɗeba idjira bio quĩrũbisia. Bʉa israelerãa biɗa cadjiruada obisia.
23 Maʉ̃ awara bʉ quima Jezabelɗebemada Ãcõrẽba nãwã jara ɓʉa: Jezreel puru caita idjira beaɗapeɗa usaba coɗia.*
24 Jũma bʉ ẽberãrã puruɗe beubʉdara usaba coɗia. Bʉ ẽberãrã puru jĩga beubʉdara ãgosoba coɗia.
(
25 Ãcõrẽ quĩrãpita jũmawãyã cadjirua obarida Acabo quĩrãca neẽ́a, Acabo quima Jezabelba mãwã cadjiruada obiɗa bẽrã.
26 Wãrãda Acaboba jũmawãyã cadjiruada o ɓabadjia. Jʉwaba oɗa ãcõrẽ ɓeada ẽpẽbadjia amorreorãba naẽna ẽpẽ panana quĩrãca. Maʉ̃ amorreorãra Ãcõrẽba israelerã quĩrãpitabemada ãyã jʉretasia.)
27 Acaboba maʉ̃ ũrĩsiɗe idjia cacuaɗe jʉ̃ ɓʉra sopuaba cõãtasia. Maʉ̃be sopua carea jʉ̃badara jʉ̃peɗa cãĩbadjia. Maʉ̃ awara ne coɗaca ewarida obadjia idjaɓa sopua ɓabadjia.
28 Maʉ̃ carea Ãcõrẽba Tisbéɗebema Elíaa nãwã jarasia:
29 –¿Bʉa unu ɓʉca sãwã Acabora sopua ɓʉda idjia cadjirua oɗa carea? Maʉ̃ bẽrã idji zocai ɓʉmisa mʉ̃a idji ẽberãrãra jõbiẽ́a, ãtebʉrʉ idji warra Israelɗebema boroda ɓeɗacarea idji ẽberãrãra jõbiya.–
