1 Reye 22:1-40
22 Siriaɗebemarãra israelerã ume djõnaẽ́ panʉda poa ũbea babʉrʉ basía.
2 Maʉ̃ne Juda druaɗebema boro Josapada Israelɗebema boro Acabo acʉɗe wãsia.
3 Mãwã ɓʉɗe Israelɗebema boro Acaboba idjiare ɓeaa nãwã jarasia:
–Bãrãba cawa panʉa Gala druaɗe Ramo purura dadjirãne basida. Baribʉrʉ Siriaɗebemarãba jãrĩpeɗaɗaɗeba ʉ̃taa dadjirãba ni cãrẽ siɗa oɗaẽ́ panʉa ãdji boro jʉwaeɗabemada ẽdrʉ edaɗi carea.–
4 Maʉ̃ bẽrã Acaboba Josapaa nãwã iwiɗisia:
–¿Bʉra mʉ̃are Gala druaɗe djõne wãica Ramo ẽdrʉ edaɗi carea?–
Josapaba panusia:
–Mʉ̃da, mʉ̃ sordaorãda, mʉ̃ cawayoɗeba djõbadarã siɗa bʉ ume wãnia.–
29 Maʉ̃be Israelɗebema boro Acaboda, Juda druaɗebema boro Josapa siɗa Gala druaɗe Ramo puruɗaa djõne wãsiɗaa.
30 Wãbʉdaɗe Acaboba Josapaa nãwã jarasia:
–Djõbʉdaɗe mʉ̃ra quĩrã awara djio ɓaya ni aɓaʉba cawarãnamãrẽã mʉ̃ra dji boroda. Baribʉrʉ bʉa bʉdji djiora jʉ̃ ɓadua.–
Ara maʉ̃da Israelɗebema boro Acabora quĩrã awara djiopeɗa djõne wãsia.
31 Siriaɗebema boroba carretaɗeba djõbada bororãda 32 eroɓasia. Djõbʉdaɗe ãdjirãa jarasia baridua ume djõrãnamãrẽã, ãtebʉrʉ aɓabe Israelɗebema boro Acabo ume djõnamãrẽã.
32 Carretaɗeba djõbada bororãba Josapa unusiɗaɗe idji djio carea crĩchasiɗaa idjira Israelɗebema boro Acaboda. Maʉ̃ carea idjimaa djõne wãsiɗaa. Baribʉrʉ Josapara ɓiasia idji sordaorãba carebaɗamãrẽã.
33 Mãwã ɓiabʉrʉɗe Siriaɗebema carretaɗeba djõbada bororãba cawasiɗaa idjira Israelɗebema boro Acaboẽ́da. Maʉ̃ bẽrã idu ɓʉsiɗaa.
34 Maʉ̃ne Siriaɗebema sordaoba chada baridua drʉsia. Maʉ̃ chaba Acaboda suɗe wãsia idji jãare jʉ̃ ɓʉ jũãtrʉbari ewara ɓʉmaa. Ara maʉ̃da Israelɗebema boro Acaboba idji carreta edebʉrʉ́a nãwã jarasia:
–Jẽda ededua. Naʉ̃ djõ panʉnebemada mʉ̃ra ãyã ededua. Chaba mʉ̃ra drʉ ataubisiɗaa.–
35 Maʉ̃ ewariɗe israelerãra Siriaɗebemarã ume dãrã djõsiɗaa. Djõ panʉne Israelɗebema boro Acaboba idji carretaɗe ʉ̃ta acʉ nũmasia. Acabora dji cãbãyã oa ze nũmʉ bẽrã idji carreta jãra oaba purega nũmesia. Quewara Acabora beusia.
36 Ʉ̃mãdau ɓaebʉrʉɗe israelerãba nãwã ɓiasiɗaa:
–¡Waa djõnaẽ́a! ¡Dadji druaza, puruza biɗa wãnia!–
37 Mãwã Israelɗebema boro Acabora beusia. Idjira Samariaɗaa edeɗapeɗa tʉɓarisiɗaa.
38 Maʉ̃be Samaria caita baido ũmʉmaa idji carretara sʉgʉɗe edesiɗaa. Mama wẽrãrã auɗuada cuibadjiɗaa. Maʉ̃ne usaba Acabo oara sene duanesiɗaa Ãcõrẽba Elíaɗeba jaraɗa quĩrãca.*
39 Jũma Acaboba oɗa naʉ̃ cartaɗe ɓʉẽ́ ɓʉra, idjia israelerã pe eroɓaɗaɗebemada, idji de droma elepante quiɗaba bio djio ɓʉɗada, puru ɓea idjia oɗa siɗa dewara cartaɗe ɓʉ́ ɓʉa. Maʉ̃ carta trʉ̃ra “Israelɗebema bororãba opeɗaɗa” abadaa.
40 Acabo beuɗacarea idji warra Ocozíada idji cacuabari Israelɗebema boroda ɓesia.
Beɗea eɗaare
^ 22:38 1 Reye 21:19.
