1 Samuel 1:1-28
1 Ẽberãda ɓasia Elcana abadada. Elcanara Jerohaʉ̃ warra basía. Jerohaʉ̃ra Elihú warra basía. Elihúra Tohu warra basía. Tohura Zup warra basía. Zup ẽberãrãra Epraiʉ̃neba yõpeɗaɗarã basía. Maʉ̃ Elcanara Ramá puruɗe Epraiʉ̃ ẽjũã eyaiɗa ɓʉɗe ɓabadjia.*
2 Elcanaba quimada umé eroɓasia. Aɓa Ana abadjiɗaa. Dewarabemara Penina abadjiɗaa. Peninaba warrarãda eroɓasia baribʉrʉ Anara warra unuca basía.
3 Poaza Elcanara idji puruɗeba Siloɗaa wãbadjia jũma poya ɓʉ Ãcõrẽa bia beɗeai carea idjaɓa animarã babue diai carea. Maʉ̃ ewariɗe Elida, idji warrarã Opnida idjaɓa Pinéda Ãcõrẽ sacerdoterã basía.
4 Elcanaba Ãcõrẽa animarã draga babue diabʉrʉza nedjarada idji quima Peninaa, idji warrarãa biɗa diabadjia.
5 Baribʉrʉ idji quima Anaa nedjara dji biara ɓʉda diabadjia.* Ãcõrẽba Anara warra unubicamĩna Elcanaba idjira bio quĩrĩã ɓasia.
6 Ãcõrẽba Anara warra unubica baɗa bẽrã Peninaba idjira baridua mĩã sẽbadjia sopua ɓamãrẽã.
7 Poaza Ãcõrẽ deɗaa wãbʉdaɗe Peninaba Anara mĩã sẽbadjia. Maʉ̃ carea Anara jĩã ɓʉba ne coca basía.
8 Baribʉrʉ dji quima Elcanaba jarabadjia:
–Ana, ¿cãrẽ cãrẽã jĩã ɓʉ? ¿Cãrẽã bʉra jãwã ne coẽ́ ɓabari? ¿Cãrẽã sopua ɓʉ? ¿Bʉmaarã mʉ̃ quĩrĩãra biara ɓʉẽ́ca die warrarã eroɓai cãyãbara?–
9 Ewari aɓa Siloɗe ne copeɗaɗacarea Anara piradrʉpeɗa Ãcõrẽ deɗaa wãsia. Maʉ̃ne sacerdote Elida dji eɗa wãbada caita chũmasia.
10 Mama Anara bio sopuaba jĩã ɓʉda Ãcõrẽa beɗea ɓasia.
11 Idjia wãrãneba nãwã jarasia:
–Ne jũma poya ɓʉ Ãcõrẽ, mʉ̃ sopua carea bʉa mʉ̃da quĩrã djuburiaibʉrʉ mʉ̃́a warrada diadua. Mãwã diasira mʉ̃a maʉ̃ warrara bʉ́a diaya idji zocai ɓʉmisa bʉa quĩrĩã ɓʉda o ɓamãrẽã. Maʉ̃ne idji buɗara tʉca baya.–*
12 1:12-13 Anara dãrã Ãcõrẽa beɗea djuburiasia. Chupea beɗea ɓasia, jĩgua beɗeaẽ́ ɓasia. Maʉ̃ne Eliba idji i doudowa ɓʉda unu ɓasia. Baribʉrʉ idjia beɗea ɓʉra ũrĩẽ́ bẽrã Eliba crĩchasia idjira beu chũmʉda.
14 Maʉ̃ bẽrã Eliba jarasia:
–¿Aɓa sãʉ̃be bʉra jãwã beu chũmai? ¡Waa itua dorãdua!–
15 Anaba jarasia:
–Mʉ̃ra beu ɓʉẽ́a. Uva ɓa aseada, ni dewara itua siɗa doẽ́ ɓʉa. Ãtebʉrʉ bio sopua ɓʉ bẽrã soɗeba Ãcõrẽa quĩrã djuburiada iwiɗi ɓasia.
16 Crĩcharãdua mʉ̃ra wẽrã cadjiruada. Bio sopua ɓʉ bẽrã Ãcõrẽa mãwã iwiɗi ɓasia.–
17 Maʉ̃ne Eliba jarasia:
–Mãẽteara necai wãdua. Mʉ̃a quĩrĩã ɓʉa dadji israelerã Ãcõrẽba bʉa iwiɗiɗara diaida.–
18 Anaba jarasia:
–Bia ɓʉa.–*
Mãwãpeɗa Anara jẽda idji ẽberãrã panʉmaa wãsia. Jũẽpeɗa ne cosia. Waa sopuaẽ́ basía.
19 Nurẽma diapeɗeɗa Ãcõrẽa bia beɗeaɗapeɗa Ramánaa ãdji deɗaa wãsiɗaa. Elcanara idji quima Ana ume cãĩsia. Maʉ̃ne Ãcõrẽba Anara carebasia.
20 Mãwã Anara ɓiogoa ɓesia. Idji warra toi ewari jũẽsiɗe umaquĩrã warrada tosia. Maʉ̃ne jarasia: “Mʉ̃a Ãcõrẽa idjida iwiɗisia.” Mãwã dji warrara trʉ̃ ɓʉsia Samuel.
21 Mãwãnacarea Elcanaba poaza obari quĩrãca jũma idji ẽberãrã ume Siloɗaa wãsia Ãcõrẽa animarã babue diai carea idjaɓa Ãcõrẽa diayaɗa aɗara jũma diai carea.
22 Baribʉrʉ Anara wãẽ́ basía. Idji quimaa nãwã jarasia:
–Mʉ̃ra wãẽ́a aɓa mʉ̃ warra ju amabʉrʉɗaa. Ju amasira mʉ̃a idjira Ãcõrẽ quĩrãpita ɓʉɗe wãya. Maʉ̃be idjira mama ɓeya.–
23 Maʉ̃ carea dji quima Elcanaba jarasia:
–Bʉa o quĩrĩã ɓʉ quĩrãca odua. Ɓedua aɓa bʉ warra ju amabʉrʉɗaa. Ãcõrẽba bʉra carebaya bʉa oi jaraɗara omãrẽã.–
Maʉ̃ bẽrã Anara wãẽ́ basía aɓa dji warra ju amabʉrʉɗaa.
24 Warra ju amanacarea waɗi caibe quiruɗe Anaba idjira Siloɗe Ãcõrẽ deɗaa edesia. Maʉ̃ne paca zaque poa ũbea ɓʉda, harinada veintidos libra, idjaɓa animarã e oɗaɗe uva ɓada tʉ edesia.*
25 Paca zaque Ãcõrẽa babue diaɗapeɗa dji warra zaquera Elimaa edesia.
26 Maʉ̃ne Anaba Elia jarasia:
–Mʉ̃ boro, ¿bʉa quĩrãneba ɓʉca wẽrã nama bʉ caita Ãcõrẽa beɗea ɓaɗara? Wãrãneba jaraya: mʉ̃ra maʉ̃ wẽrãa.
27 Mʉ̃a Ãcõrẽa warrada iwiɗi ɓasia. Maʉ̃be mʉ̃a iwiɗiɗa quĩrãca idjia naʉ̃ warrada mʉ̃́a diasia.
28 Maʉ̃ carea mʉ̃ warrada Ãcõrẽa diaɗe ze ɓʉa. Idji zocai ɓʉmisa Ãcõrẽ itea ɓaya.–
Maʉ̃ne Ãcõrẽa bia beɗeasia.*
Beɗea eɗaare
^ 1:1 Ramá purura hebreo beɗeaɗe Ramataiʉ̃ abadaa. Nuevo Testamentoɗe Arimatea abadaa.
^ 1:5 Ne djara dji biara ɓʉda. Maʉ̃ra hebreo beɗeaɗe ebuɗa ɓʉẽ́a. Ʉ̃cʉrʉmaarã jara ɓʉa “auɗu diabadjia.”
^ 1:11 Anaba jara ɓasia idji warrara nazareo baida aɓa beubʉrʉɗaa. Numero 6:1-5.
^ 1:18 Bia ɓʉa. Hebreo beɗeaɗe jara ɓʉa: “Mʉ̃a quĩrĩã ɓʉa bʉa mʉ̃ra bia unu ɓaida.”
^ 1:24 Paca zaqueda poa ũbea ɓʉda. Hebreo beɗeaɗe ʉ̃cʉrʉ cartaɗe nãwã ɓʉ́ ɓʉa: “Paca zaqueda ũbea.” Veintidos libra. Hebreo beɗeaɗe ɓʉ́ ɓʉa “efa.”
^ 1:28 Hebreo beɗeaɗe ebuɗa ɓʉẽ́a caiba Ãcõrẽa bia beɗeasida.
