1 Samuel 10:1-27
10 Maʉ̃be Samuelba nedragada edapeɗa Saul boro ʉ̃rʉ̃ weasia. Uridarraɗe isõpeɗa nãwã jarasia:
–Ãcõrẽba iɗi bʉra ɓʉbʉrʉa idji puru Israel boroda ɓamãrẽã. [Bʉabʉrʉ naʉ̃ purura pe eroɓaya idjaɓa ãdjirã dji quĩrũnebemada ẽdrʉ ɓʉya. Nãwã bʉa cawaya Ãcõrẽba wãrãda bʉra israelerã boroda ɓʉsida.]*
2 Namaʉba bʉ wãbʉrʉɗe Benjamiʉ̃neba yõpeɗaɗarã ẽjũãne Selsa puruɗe ẽberãda umé unuya. Ãdjira Isa quima Raquel tʉɓaripeɗaɗa caita panania. Ãdjia bʉ́a nãwã jaraɗia: “Bʉa burro jʉrʉ ɓaɗara unusiɗaa. Maʉ̃ bẽrã burro carea bʉ zezara sopuaẽ́ ɓʉa, ãtebʉrʉ bãrã carea sopua ɓʉa. Idjia iwiɗi ɓʉa sãwã bʉra unuida.”
3 Maʉ̃ awara Tabor ẽjũãne bacuru waiɓʉama jũẽbʉrʉɗe ẽberãda ũbea unuya. Ãdjira Betelɗaa wãbʉdaa Ãcõrẽa ne diaɗi carea. Aɓaʉba chiwatuda ũbea eroɓaya. Aɓaʉba paʉ̃da ũbea eroɓaya. Dewarabemaba uva ɓada animarã e oɗaɗe eroɓaya.
4 Ãdjia bʉ́a beɗeaɗapeɗa paʉ̃da umé diaɗia. Maʉ̃ra edadua.
5 Mamaʉba bʉra Guibea puruɗaa wãya pilisteorã sordaorã panabadama.* Puruɗe jũẽboɗoɗe Ãcõrẽneba beɗeabadarãda eya boroɗeba eɗaa zebʉdada unuya. Ãdjirãra Ãcõrẽneba beɗea panania.* Ãdji nocoare ẽberãrãba tõnõãda, chiruda, arpa siɗa zá nĩbaɗia.
6 Maʉ̃ unubʉrʉɗe Ãcõrẽ Jaurera bʉmaa zeya. Maʉ̃ bẽrã bʉ siɗa ãdjirã quĩrãca Ãcõrẽneba beɗeaya. Mamaʉba ʉ̃taa bʉra awara ɓeya.
7 Mʉ̃a jaraɗa jũma mãwãnacarea bʉa o quĩrĩãbʉrʉda odua, Ãcõrẽra bʉ ume ɓai bẽrã.
8 Maʉ̃ bẽrã Gilgalɗaa na wãpeɗa mʉ̃ra jʉ̃ãdua. Domia aɓaʉɗe mʉ̃ra bʉma jũẽya. Maʉ̃be Ãcõrẽa animarãda jũma babue diaɗia idjaɓa idji ume necai ɓai careabema animarã dragada babue diaɗia. Mãwãnacarea mʉ̃a jaraya bʉa cãrẽda oida ɓʉda.–
9 Saul Samuelmaʉba wãbʉrʉɗe Ãcõrẽba idji crĩchara awara ɓʉsia. Ara maʉ̃ ewariɗe Samuelba jaraɗara jũma mãwãsia.
10 Maʉ̃ bẽrã Saul idji nezoca ume Guibeaɗe jũẽsiɗaɗe Ãcõrẽneba beɗeabadarãda zebʉdada unusiɗaa. Ara maʉ̃da Ãcõrẽ Jaurera Saulmaa zesia. Maʉ̃ba Saul siɗa ãdjirã quĩrãca Ãcõrẽneba beɗea ɓesia.
11 Baribʉrʉ Saul unubadarãba idjira Ãcõrẽneba beɗea ɓʉda unusiɗaɗe ara ãdjiduɓa jarasiɗaa:
–¿Cãrẽda sãwãsi Quis warra Saulora jãwã nũmʉra? ¿Idji siɗa Ãcõrẽneba beɗeabarica?–
12 Mamabema aɓaʉba jarasia:
–¿Ãdjirã zezara cai?–*
Maʉ̃ carea aɓaʉba ne oca baɗada cawaẽ́ne o ɓeibʉrʉ israelerãba nãwã jarabadaa: “¿Saul siɗa Ãcõrẽneba beɗeabarica?”
13 Mãwãnacarea Saulora idji diguiɗa jũẽsia.*
14 Maʉ̃ne idji djabadrõãba idjía, dji nezocaa biɗa nãwã iwiɗisia:
–Bãrãra ¿sãma panasiɗa?–
Saulba panusia:
–Dai burroda jʉrʉ panasiɗaa. Baribʉrʉ ununaẽ́ bẽrã Samuelmaa beɗeaɗe wãsiɗaa.–
15 Idji djabadrõãba iwiɗisia:
–¿Samuelba cãrẽda jarasi? Mʉ̃ djuburia idjia jaraɗara jũma nẽbʉrʉdua.–
16 Saulba jarasia:
–Idjia daia ebuɗa jarasia bãrãba burrora unusiɗada.–
Baribʉrʉ Saulba jaraẽ́ basía Samuelba idjira israelerã boro bai jaraɗara.
17 Mãwãnacarea Samuelba Mizpa puruɗe israelerãra Ãcõrẽ quĩrãpita ãbaa jʉresia.
18 Maʉ̃be jarasia:
–Dadji israelerã Ãcõrẽba nãwã jara ɓʉa: “Mʉ̃a bãrãra Egiptoɗeba ẽdrʉ enesia. Ãdji jʉwaeɗabemada idjaɓa jũma dewara puruba bãrã biẽ́ o panʉnebemada ẽdrʉ edasia.”
19 Ãcõrẽba bãrãra bia mĩga panʉnebemada idjaɓa sopuaɗebemada ẽdrʉ edabarimĩna naʉ̃ ewariɗe idjira igara panʉa. Maʉ̃ carea jara panʉa: “Aɓa ɓʉdua dadji boroda ɓamãrẽã.” Maʉ̃ bẽrã aɓa ɓʉɗia. Bãrã doce purura Ãcõrẽ quĩrãpita zeɗapeɗa idjia cawabiya sãʉ̃gʉ puruɗebemada dji boro baida. Maʉ̃be maʉ̃ puruɗebema ẽberãrãra idji quĩrãpita zeɗapeɗa idjia cawabiya caida dji boro baida.–
20 Maʉ̃be Samuelba israelerã doce puruda Ãcõrẽ quĩrãpita jũma trʉ̃cuapeɗa Ãcõrẽba cawabisia dji borora Benjamiʉ̃neba yõna puruɗebema baida.
21 Mãwãnacarea Samuelba Benjamiʉ̃ puruɗebemarãra caitaara zebisia. Maʉ̃ne Ãcõrẽba cawabisia dji borora Matriɗeba yõpeɗaɗaɗebema baida. Maʉ̃ ẽberãrãnebemada Ãcõrẽba cawabisia Quis warra Sauldrʉ edasida israelerã boroda ɓamãrẽã. Maʉ̃ bẽrã Saulora jʉrʉsiɗaa baribʉrʉ ununaẽ́ basía.
22 Maʉ̃ carea wayacusa Ãcõrẽa iwiɗisiɗaa Saulora zesi cawaya. Maʉ̃ne Ãcõrẽba jarasia Saulora ɓʉmĩna netataɗe mĩrũ ɓʉda.
23 Ara maʉ̃da idjira jʉrʉɗe pira wãnapeɗa puru quĩrãpita enesiɗaa. Maʉ̃ne puruba unusiɗaa idjira jũmarã cãyãbara drasoara ɓʉda.
24 Samuelba purua jarasia:
–Ãcõrẽba naʉ̃ ẽberãda edasia bãrã boro bamãrẽã. Dadjirã tãẽna dewarada idji quĩrãca neẽ́a.–
Ara maʉ̃da puruba nãwã ɓia jarasia:
–¡Bia ɓʉa dadjirã boroda!–*
25 Ara maʉ̃da Samuelba purua jarasia ãdji boroba cãrẽda o ɓaida ɓʉda. Maʉ̃ra jũma cartaɗe ɓʉsia. Maʉ̃be dji cartara Ãcõrẽ deɗe idji quĩrãpita waga ɓʉsia. Mãwãnacarea Samuelba jũmarãda ãdji deza wãbicuasia.
26 Saul siɗa idji puru Guibeaɗaa wãsia. Idji ume ʉ̃cʉrʉ ẽberã sozarra ɓeada wãsiɗaa Ãcõrẽba ãdjirã soɗe ɓʉɗa bẽrã idjiare pananamãrẽã.
27 Baribʉrʉ ʉ̃cʉrʉ ẽberã cadjiruarãba Saulora siriẽ́ ɓʉda ununa bẽrã idji itea nebiada diaɗaẽ́ basía. Maʉ̃ awara nãwã jarasiɗaa:
–Jãʉ̃ ẽberãba dadjirãra ¿sãwã ẽdrʉ ɓʉi?–
Baribʉrʉ Saulba ãdjia jara panʉra quĩrãcuitaẽ́ basía. Ãtebʉrʉ chupea ɓesia.
Beɗea eɗaare
^ 10:1 Beɗea corcheteɗe ɓʉra griego beɗeaɗe ɓʉ́ ɓʉa. Hebreo beɗeaɗe neẽ́a.
^ 10:5 Hebreo beɗeaɗe Guibea trʉ̃ba jara ɓʉa “Ãcõrẽ eya.”
^ 10:5 Ãcõrẽneba beɗea panania. Hebreo beɗeaɗe ebuɗa ʌẽ́a sãwã beɗeasiɗada. Zocãrãmaarã ãdjia Ãcõrẽ beɗeada mĩã cawaiẽ́ jara panasiɗaa waa dadjia ũrĩnaca beɗeaɗe beɗea panasiɗaa.
^ 10:12 Hebreo beɗeaɗe maʉ̃ra ebuɗa ɓʉẽ́a. Ʉ̃cʉrʉmaarã ẽberãba Saulora biẽ́ jara ɓʉa.
^ 10:13 Idji diguiɗaa jũẽsia. Griego beɗeaɗe mãwã ɓʉ́ ɓʉa. Hebreoɗe ɓʉ́ ɓʉa: “Eya boroɗe jũẽsia.”
^ 10:24 Hebreo beɗeaɗe ɓʉ́ ɓʉa: “Dadjirã borora zocai ɓadua.”
