1 Samuel 11:1-15
11 Mãwãnacarea amonitarã boro Nahasada idji sordaorã ume Gala druaɗe wãnapeɗa Jabe puruda jũrã edasiɗaa uraɗi carea. Baribʉrʉ maʉ̃ puruɗebemarãba Nahasaa jarasiɗaa:
–Dai ume beɗea ɓʉdua ãbaa necai panani carea. Maʉ̃be dairãra bʉ nezocarãda ɓeaɗia.–
2 Amonitarã boro Nahasaba panusia:
–Mʉ̃a bãrã ume beɗea ɓʉya ãbaa necai panani carea. Baribʉrʉ mãwã oɗi naẽna jũmarãba jʉwa araarebema dauda mʉ̃́a idu nuẽtabiɗida panʉa. Mãwã dewara puru quĩrãpita mʉ̃a jũma bãrã israelerãra quĩrã perabiya.–
3 Jabeɗebema bororãba nãwã panusiɗaa:
–Daia domia aɓa diadua jũma israelerãmaa beɗea diabueɗi carea. Maʉ̃ne ni aɓaʉba daida carebaɗe zeɗaẽ́bʉrʉ, daira bʉ jʉwaeɗa panenia.–
4 Jabeɗebemarãba diabuepeɗaɗara Guibea puruɗe Saul ɓabarima jũẽsiɗaa. Mama Nahasaba jaraɗara purua jũma nẽbʉrʉsiɗaa. Maʉ̃ carea jũmarãda jĩãbi ɓʉga nũmesia.
5 Mãwã panʉne Saulora idji paca bara idji ẽjũãneba zepeɗa nãwã iwiɗisia:
–¿Sãwãsiɗa? ¿Cãrẽ cãrẽã jãcua jĩã duanʉ?–
Maʉ̃ne puruba Sauloa Jabeɗebemarãba jarapeɗaɗara jũma nẽbʉrʉsiɗaa.
6 Saulba maʉ̃ ũrĩsiɗe Ãcõrẽ Jaureɗeba ɓesia. Nahasaba israelerã biẽ́ oi jaraɗa carea Saulora bio quĩrũsia.
7 Ara maʉ̃da pacada umé beasia. Drapetapeɗa tʉcuasia. Dji tʉcuaɗara Israel puru ɓeaza diabuecuasia. Dji edepeɗaɗaba puruza nãwã jarasiɗaa:
–Bariduada Sauloare idjaɓa Samueleare djõne wãnaẽ́bʉrʉ, idji pacara ara naʉ̃ paca quĩrãca beaɗia.–
Ẽberãrã maʉ̃ ũrĩpeɗaɗara Ãcõrẽba bio ne wayabisia. Maʉ̃ bẽrã aɓari crĩchada edaɗapeɗa djõne wãsiɗaa.
8 Saulba ãdjirãra Beze puruɗe jʉresia. Ãdji juachasiɗe Judaɗebemada treinta mil panasiɗaa, waabema israelerãda tresciento mil panasiɗaa.
9 Maʉ̃be Jabeɗebemaba diabuepeɗaɗarãa Saulba nãwã jarasia:
–Jabeɗebemarãa jaraɗadua nu umatipa ɓai naẽna dairãba ãdjirãra ẽdrʉ ɓʉɗida.–
Ara maʉ̃da ẽberãrã Jabeɗebemaba diabuepeɗaɗara jẽda wãnapeɗa Saulba jaraɗara purua jarasiɗaa. Maʉ̃ ũrĩsiɗaɗe Jabeɗebemarãra bio ɓʉsriɗasiɗaa.
10 Maʉ̃ne ãdjirãba amonitarã boro Nahasaa sewaɗeba jarasiɗaa:
–Nu dairãra bʉ jʉwaeɗa panenia. Maʉ̃ne dairãra bʉa quĩrĩã ɓʉ quĩrãca odua.–
11 Baribʉrʉ nurẽma Saulba idji sordaorãda cãbana awara awara ɓʉsia. Idjia zocãrã edasia idjaɓa dewara boro umé panʉ́a ãdjiza aɓari quĩrãca diasia. Waɗi pãĩmaena amonitarãra uraɗe wãnapeɗa quena panasiɗaa aɓa umatipa babʉrʉɗaa. Dji zocai panenara memenesiɗaa. Ni aɓa biɗa ãbaa panenaẽ́ basía.
12 Maʉ̃ne israelerãba Samuelea jarasiɗaa:
–¿Cairãbʉrʉ Saulora dadjirã boro baida quĩrĩãẽ́ panasiɗa? Dairãa jaraɗadua beaɗi carea.–
13 Baribʉrʉ Saulba jarasia:
–Mãwãẽ́a. Iɗi ni aɓaʉda beaɗaẽ́a Ãcõrẽba dadji israelerãra ẽdrʉ edaɗa bẽrã.–
14 Maʉ̃be Samuelba purua jarasia:
–Gilgalɗaa wãna. Jãmabʉrʉ Saulora dadjirã boroda wayacusa jara ɓʉɗia.–
15 Ara maʉ̃da jũma israelerãra Gilgalɗaa wãnapeɗa Ãcõrẽ quĩrãpita Saulora ɓʉsiɗaa ãdjirã boroda ɓamãrẽã. Maʉ̃be Ãcõrẽ ume necai ɓeaɗi careabema animarã dragada babue diaɗapeɗa purura Saul siɗa ãbaa bio ɓʉsriɗa ne cosiɗaa.
