1 Samuel 13:1-15
13 Saul 30 poa ɓasiɗe israelerã boroda ɓesia. Idjira 42 poa ãdji boro basía.*
2 Saulba sordaorãda mil ũbea edasia. Mil umé idji ume panasiɗaa Micmá puruɗe Betel eyaiɗa ɓʉ ẽjũãne. Mil aɓa idji warra Jonataʉ̃ ume panasiɗaa Guibea puruɗe Benjamiʉ̃neba yõpeɗaɗarã ẽjũãne. Saulba waabema sordaorãra ãdji diguiɗaa jũma wãbisia.
3 Guebá puruɗe Jonataʉ̃ra pilisteorã sordaorã duanabadamaa wãpeɗa ãdjirãra quenasia.* Maʉ̃da pilisteorãba cawasiɗaa. Maʉ̃ carea Saulba jũma Israel druaɗe cachirura zabisia jũmarãda djõne zeɗamãrẽã. Maʉ̃ne nãwã jarabisia: “Hebreorã, ũrĩnadua.”
4 Naʉ̃ beɗeada ãdjirãba ũrĩsiɗaa: “Saulba pilisteorãra quenasia. Maʉ̃ carea pilisteorãba dadji israelerãra quĩrãma panʉa.” Ara maʉ̃da israelerãra Gilgal puruɗaa wãsiɗaa Sauloare djõni carea.
5 Maʉ̃misa pilisteorãra dji jʉresiɗaa israelerã ume djõni carea. Djõbada carretada treinta mil idjaɓa cawayoɗeba djõbada sordaorãda sei mil edesiɗaa.* Waabema sordaorã edepeɗaɗara bio cãbana panʉ bẽrã poya juachaɗaẽ́ basía. Ãdjirãra Micmánaa wãnapeɗa Bet-aveʉ̃neba ʉ̃mãdau odjabariare duanesiɗaa.
6 Israelerãba cawasiɗaa ãdjirãra minijĩchiaɗe panʉda, pilisteorãra ãdji cãyãbara zocãrãara panʉ bẽrã. Maʉ̃ carea uria ɓeaɗe, jogoa ɓeaɗe, mõgara waiɓʉa coɓeaɗe, idjaɓa baido juebada uria baido neẽ́ ɓeaɗe biɗa mĩrũcuasiɗaa.
7 Idjaɓa Jordaʉ̃ do quĩrãrẽ ʉ̃cʉrʉ mĩrũcuasiɗaa Gaɗeba yõpeɗaɗarã duanʉma Gala druaɗe. Baribʉrʉ Saulora Gilgalɗe ɓesia. Idji ume panʉ sordaorãra bio ne wayaaba cacua ure duanasiɗaa.
8 Samuelba jaraɗa quĩrãca Saulba domia aɓa idjira jʉ̃ã ɓasia.* Mãwãmĩna Samuelera waɗibiɗa Gilgalɗe jũẽẽ́ ɓasia. Maʉ̃ne Saul sordaorãra memenebʉda basía.
9 Maʉ̃ carea Saulba jarasia:
–Animarãda jũma babue diaɗi carea enenadua. Animarã Ãcõrẽ ume necai ɓeaɗi careabema siɗa enenadua dji dragada babue diaɗi carea.–
Maʉ̃be Saulba animarãra Ãcõrẽa jũma babue diasia.
10 Ara mãwã oɗacarea Samuelera jũẽsia. Ara maʉ̃da Saulba idjira audiaɓariɗe wãsia.
11 Maʉ̃ne Samuelba jarasia:
–¿Cãrẽ cãrẽã bʉa jãwã animarãra Ãcõrẽa babue diasi?–
Saulba panusia:
–Mʉ̃a jãwã osia mʉ̃ sordaorãra memenebʉda bẽrã idjaɓa bʉa jaraɗa ewariɗe bʉra zeẽ́ ɓaɗa bẽrã. Maʉ̃ awara pilisteorãra Micmáne jʉre duanʉa dadjirã ume djõni carea.
12 Mʉ̃a crĩchasia nama Gilgalɗe ãdjirãra dadjirã ume isabe djõne zeɗida. Maʉ̃ne mʉ̃a waɗibiɗa Ãcõrẽa diaẽ́ ɓasia carebamãrẽã. Maʉ̃ carea mãwã ocara ɓaɗamĩna mʉ̃a animarãda babue diasia.–
13 Baribʉrʉ Samuelba panusia:
–Bʉa crĩcha neẽ́ ɓʉ quĩrãca jãwã osia. Ãcõrẽba jaraɗara bʉa ĩjãẽ́ basía. Ĩjãnabara idjia bʉda, bʉɗeba yõbʉdarã siɗa ewariza israelerã bororãda ɓʉcasia.
14 Baribʉrʉ idjia jaraɗara ĩjãnaẽ́ bẽrã bʉra dãrã israelerã boro baẽ́a. Ãcõrẽba dewara ẽberãda ɓʉya idji puru boroda ɓamãrẽã. Maʉ̃ ẽberãba oya Ãcõrẽba quĩrĩã ɓʉ quĩrãca.–
15 Ara maʉ̃da Samuelera Gilgalɗeba Guibea puruɗaa wãsia Benjamiʉ̃neba yõpeɗaɗarã ẽjũãne. Maʉ̃be Saulba sordaorã waɗi idji ume panʉda juachasia. Jũma ãbaa seisciento panasiɗaa.
