1 Samuel 15:1-35
15 Ewari aɓa Samuelba Sauloa jarasia:
–Ãcõrẽba mʉ̃ra diabuesia bʉra idji puru Israel boroda ɓʉmãrẽã. Maʉ̃ bẽrã Ãcõrẽba jara ɓʉra quĩrãcuita ũrĩdua.
2 Ãcõrẽ ne jũma poya ɓʉba nãwã jara ɓʉa: “Mʉ̃a amalecitarãda cawa oya israelerã biẽ́ opeɗaɗa carea. Israelerã Egiptoɗeba ẽdrʉsiɗaɗe amalecitarãba ãdjirãra idu wãyã wãbiɗaẽ́ basía.*
3 Maʉ̃ carea ãdjirãra jũma quenane wãnadua. Ãdjirãba ne eroɓea siɗa jũma babueɗadua. Ni maãrĩ biɗa ãdjirãra quĩrã djuburiarãnadua. Umaquĩrãrãda, wẽrãrãda, warrarãda, djiwiɗi topeɗaɗa siɗa jũma quenanadua. Ãdji pacada, ovejada, cameyoda, burro siɗa jũma quenanadua.”–
4 Ara maʉ̃da Saulba idji sordaorãra Telaiʉ̃ puruɗe ãbaa jʉrepeɗa juachasia. Maʉ̃ne Judaɗebemada die mil panasiɗaa. Waabema sordaorãda dosciento mil panasiɗaa.
5 Maʉ̃be Saulora idji sordaorã ume Amale puruɗaa wãsiɗaa. Puru caita jũẽnapeɗa do zaque orrocawa mĩrũsiɗaa cawaẽ́ne uraɗe wãni carea.
6 Maʉ̃ne Saulba quenitarãa nãwã jarasia:*
–Dairãba amalecitarãra jũma quenania. Maʉ̃ bẽrã ãdjirã tãẽnabemada isabe ãyã wãnadua. Dairãba bãrãra bea quĩrĩãẽ́ panʉa, dai drõã naẽnabemarã Egiptoɗeba ẽdrʉsiɗaɗe bãrãba carebapeɗaɗa bẽrã.–
Ara maʉ̃da quenitarãra amalecitarã tãẽnabemada ãyã wãsiɗaa.
7 Mãwãnacarea Saulba idji sordaorã ume amalecitarãra quenane wãsiɗaa Havilaɗeba aɓa Sur ẽjũãnaa. Sur ẽjũãra Egiptoɗeba ʉ̃mãdau odjabariare ɓʉa.
8 Amalecitarãra necoba jũma quenasiɗaa. Baribʉrʉ ãdjirã boro Agá abadada jidasiɗaa.
9 Ãcõrẽba jũma quenanaduaɗa aɗamĩna idjaɓa ãdjia eroɓea siɗa babueɗaduaɗa aɗamĩna Saulba idji sordaorã biɗa mãwã oɗaẽ́ basía. Amalecitarã boro Agára beaɗaẽ́ basía. Idjaɓa dji biara ɓea ovejada, pacada, paca zaque boreguea ɓeada, oveja zaque siɗa beaɗaẽ́ basía. Maʉ̃ awara jũma ne bia ɓeada babueɗaẽ́ basía. Aɓabe dji mãcuaẽ́ ɓeada idjaɓa siriẽ́ ɓeada babuesiɗaa.
10 Mãwãnacarea Ãcõrẽba Samuelea nãwã jarasia:
11 –Mʉ̃ra sopua ɓʉa Saul carea. Idjira bãrã boroda ɓʉɗamĩna idjia mʉ̃ra igarasia. Mʉ̃a jaraɗara ĩjã oẽ́ basía.–
Maʉ̃ ũrĩna carea Samuelera biẽ́ ɓesia. Jũma maʉ̃ diamasi Ãcõrẽa beɗea ɓasia.
12 Nurẽma diapeɗeɗa piraɓaripeɗa Saulora jʉrʉɗe wãsia. Maʉ̃ne ʉ̃cʉrʉba jarasiɗaa Saulora Carmel puruɗaa wãpeɗa mõgara waiɓʉada ʉ̃ta nũmʉsida amalecitarã poyaɗada quĩrãnebabi carea. Mamaʉba idjira jẽda Gilgalɗaa wãsiaɗa asiɗaa.
13 Samuel Saul ɓʉma jũẽsiɗe Saulba nãwã jarasia:
–Ãcõrẽba bʉra carebaya. Idjia jaraɗara mʉ̃a jũma ĩjã osia.–
14 Samuelba panusia:
–Mãwã baibʉrʉ ¿mʉ̃a sãwã ovejara, paca siɗa ɓia duanʉda ũrĩ ɓʉ?–
15 Saulba jarasia:
–Mʉ̃ sordaorãba amalecitarãneda jãrĩnapeɗa enesiɗaa. Dji biara ɓea ovejara, paca siɗa zocai ɓʉsiɗaa bʉ Ãcõrẽa babue diaɗi carea. Baribʉrʉ waabemada dairãba jũma quenasiɗaa.–
16 Maʉ̃ne Samuelba Sauloa jarasia:
–Chupea ũrĩdua. Ãcõrẽba iɗi diamasi jaraɗada mʉ̃a jaraya.–
Saulba panusia:
–Mãẽteara jaradua.–
17 Samuelba jarasia:
–Naẽna bʉra dji dromaẽ́da crĩcha ɓaɗamĩna ¿iɗira bʉra Israelɗeba doce puru yõpeɗaɗarã boroẽ́ca?* ¿Ãcõrẽba bʉra dadji israelerã boroda ɓʉẽ́ basica?
18 Ãcõrẽba bʉ́a ebuɗa jarasia jãʉ̃ cadjirua obada amalecitarã ume djõmãrẽã aɓa jũma quenabʉrʉɗaa.
19 Maʉ̃da ¿cãrẽ cãrẽã idjia jaraɗara ĩjã oẽ́ basi? ¿Cãrẽ cãrẽã ãdjirã ne bia ɓeara babueẽ́ basi? ¿Cãrẽ cãrẽã edacuasi? Mãwã oɗara Ãcõrẽ quĩrãpita cadjirua basía.–
20 Saulba panusia:
–¡Mãwãẽ́a, mʉ̃a Ãcõrẽba jaraɗara ĩjãsia! Idjia jaraɗa quĩrãca mʉ̃ra amalecitarã ume djõne wãsia. Ãdjirãra quenapeɗa ãdjirã boro Agára nama enesia.
21 Mʉ̃ sordaorãbʉrʉ dji biara ɓea pacara, oveja siɗa quenanaẽ́ basía. Ãtebʉrʉ nama Gilgalɗe enesiɗaa bʉ Ãcõrẽa babue diaɗi carea.–
22 Maʉ̃ne Samuelba jarasia:
Animarã babue diaɗi cãyãbara Ãcõrẽba biara quĩrĩã ɓʉa idji beɗeara ĩjã pananida.
Oveja draga babue diaɗi cãyãbara biara ɓʉa idjia jara ɓʉra ĩjã oɗida.
23 Ãcõrẽba jara ɓʉ igara ɓʉba daubara quĩrãca bio cadjiruada o ɓʉa.
Cʉwʉrʉ zarea ɓʉba jʉwaba oɗa ãcõrẽ ẽpẽ ɓʉ quĩrãca bio cadjiruada o ɓʉa.
Bʉa Ãcõrẽba jaraɗara igaraɗa bẽrã idjia bʉra israelerã boro baɗada igarasia.
24 Saulba Samuelea jarasia:
–Mʉ̃a cadjiruada osia. Ãcõrẽba jaraɗara, bʉa jaraɗa siɗa mʉ̃a ĩjã oẽ́ basía. Mʉ̃ sordaorãda wayaɗa bẽrã ãdjia o quĩrĩã panʉda idu obisia.
25 Baribʉrʉ mʉ̃ quĩrã djuburia mʉ̃ cadjiruara quĩrãdoadua. Sordaorã panʉmaa wãna mʉ̃a Ãcõrẽa bia beɗeai carea.–
26 Samuelba panusia:
–Mʉ̃ra bʉ ume wãẽ́a. Bʉa Ãcõrẽba jaraɗara igaraɗa bẽrã idjia bʉra israelerã boro baɗada igarasia.–
27 Mãwã jarapeɗa Samuelera wãbʉrʉ basía. Maʉ̃ne Saulba idjia cacuaɗe jʉ̃ ɓʉ iɗe jidabʉrʉɗe maãrĩ cõã edasia.
28 Samuelba idjía jarasia:
–Bʉa mʉ̃ wua cõã edaɗa quĩrãca Ãcõrẽba bʉ israelerã boro baɗada iɗi jãrĩpeɗa dewara ẽberãa diasia. Maʉ̃ ẽberãra bʉ cãyãbara biara ɓʉa.
29 Israel Ãcõrẽ dji Droma ɓʉra sewa ocaa idjaɓa beɗea aɓa ɓʉa. Maʉ̃ bẽrã idjia oyaɗa aɗara quĩrã awara ocaa ẽberãba obada quĩrãca.–
30 Saulba jarasia:
–Mʉ̃a wãrãda cadjiruada osia. Baribʉrʉ mʉ̃ quĩrã djuburia israelerã quĩrãpita, dji nocorã quĩrãpita biɗa mʉ̃ra quĩrã perabirãdua. Sordaorã panʉmaa wãna mʉ̃a Ãcõrẽa bia beɗeai carea.–
31 Maʉ̃be Samuelera Saul ume sordaorã panʉmaa wãnapeɗa Saulba Ãcõrẽa bia beɗeasia.
32 Mãwãnacarea Samuelba jarasia:
–Amalecitarã boro Agára namaa enenadua.–
Samuelmaa enebʉdaɗe Agára necai ɓasia beaɗaẽ́da crĩcha ɓaɗa bẽrã.
33 Baribʉrʉ Samuelba idjía jarasia:
–Bʉa necoba zocãrã beapeɗa wẽrãrãda warra neẽ́ ɓʉsia. Ara maʉ̃ quĩrãca mʉ̃a bʉ papa siɗa warra neẽ́ ɓʉya.–
Mãwã jarapeɗa Gilgalɗe Ãcõrẽ quĩrãpita Samuelba idjira necoba beatapeɗa pichipichia tʉcuasia.
34 Mãwãnacarea Samuelera idji puru Ramánaa wãsia. Saulora idji puru Guibeaɗaa wãsia.
35 Mamaʉba ʉ̃taa Samuelba waa Saulora acʉɗe wãẽ́ basía. Baribʉrʉ Ãcõrẽba Saulora israelerã boro baɗada igaraɗa bẽrã Samuelera idji carea bio sopua ɓasia.
