1 Samuel 16:1-23
16 Ãcõrẽba Samuelea jarasia:
–¿Bʉra aɓa sãʉ̃be Saul carea sopua ɓai? Mʉ̃a idjira israelerã boro baɗada igarasia. Mʉ̃a quĩrĩã ɓʉa bʉra Beleʉ̃naa wãida ẽberã Jesé abadamaa.* Idji warraɗebemada mʉ̃a aɓa ɓʉya israelerã boroda ɓamãrẽã. Maʉ̃ carea nedragada cachuɗe tʉ edapeɗa idjimaa wãdua.–
2 Samuelba Ãcõrẽa jarasia:
–Baribʉrʉ mʉ̃da wãibʉrʉ, Saulba cawasira mʉ̃ra beaya.–
Ãcõrẽba panusia:
–Mãẽteara paca zaqueda ededua. Bariduaba iwiɗibʉrʉ jaradua bʉa animarãda Ãcõrẽa babue diaɗe ze ɓʉda.
3 Bʉa animarã babue diaɗe wãbʉrʉɗe Jeséra eɗodua bʉ ume wãmãrẽã. Maʉ̃ne mʉ̃a cawabiya bʉa sãwã oida ɓʉda. Mʉ̃a jarabʉrʉ ẽberãda ɓʉdua israelerã boroda ɓamãrẽã. Maʉ̃ne nedragara idji boro ʉ̃rʉ̃ weadua.–
4 Ãcõrẽba jaraɗa quĩrãca Samuelba osia. Beleʉ̃ne jũẽsiɗe mamabema nocorãba ne wayaaba idjira audiaɓariɗapeɗa nãwã iwiɗisiɗaa:
–¿Bʉra necai zebʉrʉca?–
5 Samuelba panusia:
–Mãẽ, mʉ̃a naʉ̃ paca zaqueda Ãcõrẽa babue diaɗe ze ɓʉa. Maʉ̃ carea Ãcõrẽ quĩrãpita bia duanani carea oɗadua. Mãwãnacarea animarãda babue diaɗe wãnia.–
Maʉ̃be Samuelba Jeséra idji warrarã siɗa Ãcõrẽ quĩrãpita bia ɓʉpeɗa eɗosia idji ume animarã babue diaɗe wãnamãrẽã.
6 Ãdji jũẽsiɗaɗe Samuelba Jesé warra Eliáda unupeɗa nãwã crĩchasia:
–Wãrãda naʉ̃drʉ Ãcõrẽba edasia israelerã boroda ɓamãrẽã.–
7 Baribʉrʉ Ãcõrẽba idjía jarasia:
–Aɓabe dji drasoada, quĩrãwãrẽã siɗa acʉrãdua. Ẽberãba maʉ̃ra acʉbaria. Baribʉrʉ mʉ̃ara sodrʉ acʉbaria. Naʉ̃ ẽberãda mʉ̃a edaẽ́ ɓʉa israelerã boroda ɓamãrẽã.–
8 Maʉ̃be Jeséba idji warra Abinadáda Samuel quĩrãpita trʉ̃sia. Baribʉrʉ Samuelba jarasia:
–Naʉ̃gʉ siɗa Ãcõrẽba edaẽ́ ɓʉa.–
9 Maʉ̃be Jeséba idji warra Samáda Samuel quĩrãpita trʉ̃sia. Baribʉrʉ Samuelba jarasia:
–Naʉ̃gʉ siɗa Ãcõrẽba edaẽ́ ɓʉa.–
10 Jeséba siete warrarãra Samuel quĩrãpita trʉ̃sia. Baribʉrʉ Samuelba jarasia Ãcõrẽba ni aɓaʉ ãdjiɗebemada edaẽ́ ɓʉda israelerã boroda ɓamãrẽã.
11 Maʉ̃ne Samuelba iwiɗisia:
–Bʉa ¿waa warrarã neẽ́ ɓʉca?–
Jeséba panusia:
–Dji jĩrũarebemada neẽ́a ovejada waga ɓʉ bẽrã.–
Maʉ̃ carea Samuelba jarasia:
–Idjira jʉrʉbidua. Idji jũẽi naẽna ne coɗaẽ́a.–
12 Ara maʉ̃da Jeséba idjira jʉrʉbisia. Maʉ̃ warrara quĩrãwãrẽã ɓasia idjaɓa cacua dowa ɓasia. Idjira dau biya querasia. Maʉ̃ne Ãcõrẽba Samuelea jarasia:
–Naʉ̃drʉ mʉ̃a edasia. Maʉ̃ bẽrã idji boro ʉ̃rʉ̃ nedragara weadua israelerã boroda ɓʉmãrẽã.–
13 Ara maʉ̃da Samuelba nedragara edapeɗa dji djabarã quĩrãpita maʉ̃ warra ʉ̃rʉ̃ weasia israelerã boroda ɓamãrẽã. Maʉ̃ ewariɗeba ʉ̃taa Ãcõrẽ Jaurera maʉ̃ warra Davi ume ɓabadjia. Mãwãnacarea Samuelera ãdjima ɓaɗada idji puru Ramánaa wãsia.
Davi Saul itea traja ɓeɗa
14 Maʉ̃ ewariɗe Ãcõrẽ Jaurera Saul ume ɓaɗada ãyã wãsia. Maʉ̃ne Ãcõrẽba jaida idjimaa idu zebisia ewariza mĩã sẽ ɓamãrẽã.
15 Maʉ̃ carea Sauloare ɓeaba idjía jarasiɗaa:
–Dai djuburia ũrĩdua: Ãcõrẽba bʉra jaia idu mĩã sẽbi ɓʉa.
16 Maʉ̃ carea dai boro, dairãa arpa zá cawa ɓʉda jʉrʉbidua. Mãwãra jaiba mĩã sẽbʉrʉɗe maʉ̃ ẽberãba arpara zaya bʉ necai ɓemãrẽã.–
17 Saulba jarasia:
–Mãẽteara arpa bio zá cawa ɓʉda jʉrʉɗe wãnapeɗa mʉ̃maa enenadua.–
18 Maʉ̃ne idjiare ɓea aɓaʉba nãwã jarasia:
–Mʉ̃a Beleʉ̃nebema Jesé warrada aɓa unusia. Maʉ̃ ẽberãba arpara bio zá cawa ɓʉa. Idjira quĩrãwãrẽã ɓʉa, sozarra ɓʉa, bio mẽsrã ɓʉa, idjaɓa crĩcha cawaaɗeba beɗeabaria. Maʉ̃ awara Ãcõrẽra idji ume ɓʉa.–
19 Ara maʉ̃da Saulba Jesémaa ʉ̃cʉrʉ nãwã jaraɗe diabuesia:
–Dadjirã boro Saulba nãwã jara ɓʉa: bʉ warra Davi, dji oveja wagabarida mʉ̃maa diabuedua.–
20 Ara maʉ̃da Jeséba idji warra Davira Saulmaa diabuesia. Maʉ̃ awara paʉ̃da, uva ɓa animarã e oɗaɗe ɓʉ siɗa burro ʉ̃rʉ̃ jʉ̃cuapeɗa diabuesia. Chiwatu zaque siɗa aɓa diabuesia.
21 Davira jũẽpeɗa Saul itea traja ɓesia. Saulba Davira bio quĩrĩã ɓasia. Maʉ̃ bẽrã idjira ɓʉsia idji djõi careabemada eronĩbamãrẽã.
22 Saulba Davira bio bia unu ɓʉ bẽrã beɗeada Jesémaa diabuesia Davira idji ume idu ɓebimãrẽã.
23 Jaiba Saul mĩã sẽbʉrʉɗe Daviba arpada zabadjia. Mãwã zá ɓʉɗe Saulora necai ɓebadjia jaira ãyã wãbadji bẽrã.
Beɗea eɗaare
^ 16:1 Jesé. Ʉ̃cʉrʉ cartaɗe Jeséra Isaí abadaa.
