1 Samuel 17:1-58
17 Maʉ̃ ewariɗe pilisteo sordaorãda Soco puruɗe Judaɗeba yõpeɗaɗarã ẽjũãne ãbaa dji jʉreɗapeɗa Epes-damiʉ̃ abadaɗe duanesiɗaa. Maʉ̃ ẽjũãra Soco puru idjaɓa Azecá puru ẽsi ɓasia.
2 Maʉ̃ne Saulora israelerã sordaorã ume Ela do caita ɓʉ jeweɗaɗe dji jʉresiɗaa. Mama chãwẽ duanasiɗaa pilisteorã ume djõni carea.
3 Pilisteorãra eya aɓaʉɗe duanasiɗaa. Maʉ̃ne israelerãra dewara eyaɗe panasiɗaa. Jeweɗada ãdjirã ẽsi ɓasia.
4 Maʉ̃ne pilisteorã duanʉmaʉba ẽberã bio mẽsrã ɓʉda jeweɗaɗaa zesia. Maʉ̃ ẽberãra Goliá abadjiɗaa. Goliára Gat puruɗebema basía. Idji drasoara sei bicaca auɗu ɓasia.
5 Idji boroɗe ne zarea bronce oɗada jʉ̃ ɓabadjia. Idji jãare bronce caɗaba jũãtrʉ jʉ̃ ɓabadjia. Dji zʉgʉara cien libra auɗu ɓasia.*
6 Idji jĩrũ epanane bronce oɗaba jũãtrʉ jʉ̃ ɓabadjia. Maʉ̃ awara mĩãsu zaque bronce oɗada ẽcarraɗe awa ɓabadjia.*
7 Idji mĩãsu waiɓʉada bio omoa ɓasia. Dji quiɗara jiorro oɗa basía. Dji quiɗa zʉgʉara quince libra ɓasica ɓʉa.* Idji djõi careabema eronĩbabarida idji nocoare nĩbasia.
8 Goliára jeweɗaɗe nũmepeɗa israelerã sordaorãa nãwã ɓiasia:
–¿Cãrẽ cãrẽã jãwã chãwẽ duanʉ? Mʉ̃ra pilisteoa. Jũma bãrãra Sauloare djõbadaa. Mʉ̃duɓa pilisteorã carea djõya. Maʉ̃ bẽrã ẽberãda aɓa edaɗadua bãrã carea mʉ̃ ume djõne zemãrẽã.
9 Idjia mʉ̃da poya beaibʉrʉ jũma dairãra bãrã nezocarãda panenia. Baribʉrʉ mʉ̃a idjida beasira bãrãra dai nezocarãda panenia.
10 Iɗi mʉ̃a bãrã israelerãa orra beɗea ɓʉa: ẽberãda aɓa namaa diabueɗadua mʉ̃ ume djõmãrẽã.–
11 Maʉ̃ ũrĩbʉdaɗe Saulora, idji sordaorã siɗa bio ne wayasiɗaa. Aɓeɗa sãwã oɗida cawa crĩchaɗaẽ́ basía.
12 Davira Jesé warra basía. Jeséra Eprataɗeba yõna basía. Juda druaɗe Beleʉ̃ puruɗe ɓabadjia. Saul israelerã boro basiɗe Jeséra bio drõãda ɓasia. Idjia warrarãda ocho eroɓasia.
13 Idji warrarã drõãara panʉda ũbea Sauloare djõ panasiɗaa. Dji nabemara Eliá basía. Idjiarebemara Abinadá basía. Maʉ̃arebemara Samá basía.
14 Maʉ̃ ũbeabema warrarãra Sauloare djõ panasiɗaa. Davira Jesé warra dji jĩrũarebema basía.
15 Davira Saul ɓʉmaa wãpeɗa jẽda Beleʉ̃naa zebadjia idji zeza oveja waga ɓai carea.
16 Maʉ̃misa pilisteo Goliába diapeɗa, quewara biɗa israelerãa orra beɗeabadjia. Cuarenta ewari mãwã osia.
17 Ewari aɓa Jeséba idji warra Davia jarasia:
–Warra, bʉ djabarã itea naʉ̃ die paʉ̃da, naʉ̃ trigo jututiaɗa siɗa ẽ aɓa ededua.*
18 Maʉ̃ awara sordaorã boro itea naʉ̃ die quesoda ededua. Maʉ̃be bʉ djabarã sãwã panʉda iwiɗipeɗa ãdjía jaradua ne diabueɗamãrẽã. Maʉ̃neba mʉ̃a cawaya ãdjira bia panʉda.
19 Maʉ̃misa Saulora, Davi djabarãra, waabema sordaorã siɗa Ela jeweɗaɗe pilisteorã ume djõni carea panasiɗaa.
20 Diapeɗeɗa Daviba idji ovejara dewara ume ɓeesia wagamãrẽã. Maʉ̃be idji zezaba jaraɗara edapeɗa wãsia. Davi jũẽne wãsiɗe israelerã sordaorãra djõne wãbʉda bẽrã ɓʉga duanasiɗaa.
21 Maʉ̃ne israelerãra pilisteorã chãwẽ duanʉ quĩrãpe chãwẽ duanesiɗaa.
22 Daviba edeɗara ne wagabari jʉwaɗe amepeɗa idji djabarã chãwẽ duanʉmaa pira wãsia ãdji sãwã panʉda iwiɗi carea.
23 Ãdji ume beɗea ɓʉɗe Gat puruɗebema mẽsrã ɓʉ Goliára pilisteorã chãwẽ duanʉmaʉba jeweɗaɗaa zepeɗa israelerãa orra beɗeasia idjia obari quĩrãca. Maʉ̃gʉra Daviba jũma ũrĩsia.
24 Israelerãba Goliá unubʉdaɗe bio ne wayaɗapeɗa jẽda pirasiɗaa.
25 Ãdjiduɓa jarasiɗaa:
–¿Bãrãba jãʉ̃ ẽberãra unusiɗaca? Idjia dadjirãa orra beɗeaɗe zebaria. Bariduaba jãʉ̃ pilisteoda beaibʉrʉ dadji boroba maʉ̃ ẽberãra ne bara ɓʉya. Idji cau siɗa diaya. Maʉ̃ awara idjia parata diabi ɓʉra dji zeza ẽberãrãa waa diabiẽ́a.–
26 Daviba idji caita duanʉ ẽberãrãa nãwã iwiɗisia:
–Jãʉ̃ pilisteo cacua wẽãgoẽ́ taɓʉra ¿cai jãwã Ãcõrẽ zocai ɓʉ sordaorãda orra beɗeai carea? Jãwã dadji israelerã biẽ́ jara ɓʉda aɓaʉba beaibʉrʉ, ¿cãrẽda idjía diaɗi?–
27 Ãdjia naẽna jarapeɗaɗara wayacusa jarasiɗaa.
28 Davi djaba dji nabema Eliába ũrĩsia Davira dewararã ume nẽbʉrʉ ɓʉda. Maʉ̃ carea quĩrũpeɗa Davia nãwã jarasia:
–¿Cãrẽ cãrẽã zesi? ¿Jãʉ̃ oveja zocãrãẽ́be taɓʉda ẽjũã põãsa ewaraga ɓʉɗe ãduɓa ɓeesica? Mʉ̃a cawa ɓʉa bʉra sãwã ɓʉda. Bʉra namaa ze ɓʉa aɓabe dairã djõ duanʉda acʉi carea.–
29 Daviba panusia:
–Mʉ̃a ¿cãrẽ cadjiruada osi? ¿Aɓabe iwiɗi ɓʉẽ́ca?–
30 Ara maʉ̃da idji djaba caitabemada ãyã wãsia. Maʉ̃be dewara ẽberãrãa Goliá beaiɗebemada iwiɗisiɗe ãdjia biɗa aɓarida panusiɗaa.
31 Daviba mãwã iwiɗi ɓʉda ũrĩsiɗaɗe ʉ̃cʉrʉba Saulmaa jaraɗe wãsiɗaa. Maʉ̃ carea Saulba idjira trʉ̃bisia.
32 Maʉ̃be Daviba Sauloa jarasia:
–Mʉ̃ boro, ni aɓaʉba jãʉ̃ pilisteora wayaiẽ́ ɓʉa. Mʉ̃, bʉ nezocara idji ume djõne wãya.–
33 Saulba panusia:
–Bʉduɓa jãʉ̃ pilisteo ume poya djõne wãẽ́a. Acʉdua bʉra waɗi cũdrada ɓʉda. Maʉ̃ne idjira drõãda ɓʉa. Idjira cũdra eɗaʉba djõ ɓabaria.–
34 17:34-35 Daviba panusia:
–Mʉ̃ boro, mʉ̃ zeza oveja waga ɓʉɗe imamada wa wida zepeɗa ovejada ca edesira mʉ̃ra caiɗu wãpeɗa idjia ca eroɓʉra jãrĩbaria. Idjaɓa maʉ̃ animarãba mʉ̃da orraibʉrʉ idji quiɗatrʉɗe jidapeɗa u jidabaria aɓa beabʉrʉɗaa.
36 Wida imama siɗa mãwã obaria. Mʉ̃a jãʉ̃ pilisteo cacua wẽãgoẽ́ taɓʉra ara maʉ̃ quĩrãca oya, Ãcõrẽ zocai ɓʉ sordaorãda orra beɗea ɓʉ bẽrã.
37 Ãcõrẽba mʉ̃ra imama jʉwaɗebemada idjaɓa wi jʉwaɗebemada ẽdrʉ edasia. Ara maʉ̃ Ãcõrẽba mʉ̃ra jãʉ̃ pilisteo jʉwaɗebemada ẽdrʉ edaya.–
Maʉ̃ne Saulba idjía jarasia:
–Mãẽteara wãdua. Ãcõrẽra bʉ ume ɓaya.–
38 Ara maʉ̃da Saulba idjia djõi careabema jʉ̃barida Davia jʉ̃bisia. Ne zarea bronce oɗada Davi boroɗe jʉ̃bipeɗa jã jũãtrʉbari siɗa Davia jʉ̃bisia.
39 Maʉ̃be Daviba Saul necoda cʉrrʉɗe jʉ̃peɗa arima pʉrrʉa zasia. Baribʉrʉ jʉ̃ca bẽrã poya wãẽ́ basía. Daviba Sauloa jarasia:
–Naʉ̃ra jʉ̃ca bẽrã mʉ̃ra poya wãẽ́a.–
Ara maʉ̃da Daviba jũma ẽrãcuasia.
40 Maʉ̃be idjia eronĩbabari bacurura edapeɗa do zaqueɗaa wãpeɗa mõgara borogoa queɗeada juesuma idji buchacaɗe pe edasia. Mõgara taɓaribarida idji jʉwaɗe edapeɗa pilisteo Goliá ume djõne wãsia.
41 Maʉ̃ne Goliára Davimaa pĩãca zebʉrʉ basía. Idji djõi careabema eronĩbabarida idji nocoare nĩbasia.
42 Goliába bio acʉbʉrʉɗe unusia Davira cũdra quĩrãwãrẽã ɓʉda idjaɓa cacua dowa ɓʉda. Maʉ̃ bẽrã siriẽ́ ɓʉ quĩrãca unusia.
43 Maʉ̃ carea nãwã jarasia:
–¿Cãrẽ cãrẽã jãwã bacuru catʉ zebʉrʉ? ¿Mãwãra mʉ̃ra usaca?–
Maʉ̃ne idji ãcõrẽ ɓea trʉ̃neba Davira biẽ́ jarasia.
44 Maʉ̃ awara nãwã jarasia:
–Zedua, mʉ̃a bʉ djarara diaya ãgosoba, mẽãbema animarã biɗa coɗamãrẽã.–
45 Baribʉrʉ Daviba panusia:
–Bʉra mʉ̃ ume djõne ze ɓʉa neco bara, mĩãsu bara, idjaɓa mĩãsu zaque bara, baribʉrʉ mʉ̃ra bʉ ume djõne ze ɓʉa Ãcõrẽ ne jũma poya ɓʉ trʉ̃neba. Idjira dai israelerã sordaorã Ãcõrẽa. Bʉa idjíabʉrʉ orra beɗeasia.
46 Iɗi ara maʉ̃ Ãcõrẽba bʉra mʉ̃́a poyabiya. Mʉ̃a bʉra beapeɗa oɓʉá tutaya. Bʉ djarara, waabema pilisteorã djara siɗa mʉ̃a diaya ãgosoba, mẽãbema animarã biɗa coɗamãrẽã. Mãwã jũmarãba cawaɗia wãrã Ãcõrẽda dai israelerã tãẽna ɓʉda.
47 Maʉ̃ awara nama duanʉba cawaɗia Ãcõrẽba ẽdrʉ edacada necoba ni mĩãsuba. Nama Ãcõrẽdrʉ djõya. Maʉ̃ bẽrã idjia bãrãra dairãa poyabiya.–
48 Maʉ̃ne Goliára Davi beai carea caitaara wãbʉrʉ basía. Ara maʉ̃da Davira idji ume djõne pira wãsia.
49 Idji jʉwara buchacaɗe berajupeɗa mõgarada edapeɗa Goliámaa taɓarisia. Maʉ̃ mõgarara pilisteo dratuɗe jou dogosia. Maʉ̃ba Goliára ɓarruɓari ɓaesia.
50 Mãwã Daviba mõgara taɓaribariba Goliára poyasia. Neco neẽ́ idjira beasia.
51 Davira Goliá taɓʉmaa pira dogopeɗa Goliá necoda ẽũta edasia. Maʉ̃ba aɓeɗa beatapeɗa oɓʉá tutasia.
Waabema pilisteorãba ãdjiɗebema mẽsrãara ɓʉra beu taɓʉda ununapeɗa memenesiɗaa.
52 Ara maʉ̃da Judaɗebema sordaorãra, waabema Israel sordaorã siɗa djõni carea ɓʉga duanenapeɗa araa pira wãsiɗaa. Maʉ̃be caiɗu quena wãsiɗaa Saaraiʉ̃ puruɗeba aɓa Gat puruɗaa idjaɓa Ecroʉ̃ puruɗe eɗa wãbada daucha. Maʉ̃ ora aɓeɗa jũma bira ɓasia pilisteorã beapeɗaɗaba.
53 Mãwã ẽpẽ wãpeɗaɗacarea israelerã jẽda zebʉdaɗe pilisteorãba ne ɓeepeɗaɗara jũma edacuasiɗaa.
54 Maʉ̃ne Daviba Goliá borora edapeɗa Jerusaleʉ̃ puruɗaa edesia. Baribʉrʉ Goliába djõi careabema eroɓaɗara idji wua deɗe wagasia.
55 Maʉ̃ naẽna Saulba Davira Goliá ume djõne wãbʉrʉda unusiɗe idji sordaorã boro Abne abadaa nãwã iwiɗisia:
–Abne, jãʉ̃ warra zezara ¿cai?–
56 Abneba panusia:
–Ay, mʉ̃ boro, mʉ̃a wãrãda adua ɓʉa.–
Maʉ̃ carea Saulba idjía jarasia:
–Mãẽteara iwiɗiɗe wãdua idji zezara cai cawaya.–
57 Daviba Goliá beapeɗa jẽda zebʉrʉɗe Goliá borora jʉwaɗe eroɓasia. Abneba idjira unupeɗa Saulmaa edesia.
58 Maʉ̃ne Saulba iwiɗisia:
–Warra, ¿bʉ zezara cai?
Daviba panusia:
–Mʉ̃ra bʉ nezoca Beleʉ̃nebema Jesé warraa.–
