1 Samuel 18:1-30
18 Saul ume beɗeaɗacarea Davira Saul warra Jonataʉ̃ ume dji biada panesiɗaa. Jonataʉ̃ba Davira quĩrĩã ɓasia ara idji quĩrĩã ɓʉ quĩrãca.
2 Maʉ̃ ewariɗe Saulba Davira idji ume ɓebisia. Waa idji zeza ume ɓamãrẽã idu wãbiẽ́ basía.
3 Jonataʉ̃ba Davira quĩrĩã ɓasia ara idji quĩrĩã ɓʉ quĩrãca. Maʉ̃ bẽrã beɗea ɓʉsiɗaa dji biada paneni carea.
4 Jonataʉ̃ba idji djiora Davia ẽrã diasia. Maʉ̃ awara idji djõbada necoda, enedrʉmada, cʉrrʉ trãjʉ̃badada, cacuaɗe jʉ̃bari siɗa diasia.
5 Saulba Davi djõne diabuebʉrʉza Daviba poyabadjia. Maʉ̃ carea Saulba idjira idji sordaorã boro dji dromada ɓʉsia. Maʉ̃ra jũma Saul sordaorãba, idjiare ɓea biɗa bia unusiɗaa.
Davi trʉ̃ ɓʉga ɓʉ carea Saul so ãrĩna
6 Daviba pilisteo Goliá beaɗacarea israelerã sordaorãra jẽda ãdji puruza wãsiɗaa. Israelerã puruza jũẽne wãbʉdaɗe wẽrãrãba Saulora audiaɓaribadjiɗaa. Maʉ̃ne ɓʉsriɗaba trʉ̃ãbadjiɗaa, caribadjiɗaa, idjaɓa tõnõãda, dewara siɗa zabadjiɗaa.*
7 Mãwã cari panʉne nãwã trʉ̃ãbadjiɗaa:
Saulba ẽberãda mil beasia baribʉrʉ Daviba die mil beasia.
8 Maʉ̃ ũrĩsiɗe Saulora so ãrĩsia. Maʉ̃ carea quĩrũbiɗeba jarasia:
–Ãdjirãba jara panʉa Daviba ẽberãda die mil beasida maʉ̃ne mʉ̃a milbe beasida. ¡Cawaẽ́ne idjira ãdjirã boroda ɓʉɗia!–
9 Mamaʉba ʉ̃taa Saulba Davira quĩrãcuita ɓabadjia.
10 Nurẽma Ãcõrẽba jaida Saulmaa idu zebisia. Maʉ̃ jaiba idjira quĩrã cawaẽ́ nũmebisia idji de dromane. Maʉ̃ne Daviba Saul carebai carea idji arpara zá ɓasia idjia obari quĩrãca. Saulba mĩãsuda idji jʉwaɗe eroɓasia.
11 Cawaẽ́ne Saulba maʉ̃ mĩãsuba araa tẽũtasia. Idjia crĩchasia Davira deɗaa su jidaida. Baribʉrʉ Daviba ɓarima umé aubuesia su bearãmãrẽã.
12 Saulba cawa ɓasia Ãcõrẽra idji ume ɓaɗada ãyã wãsida baribʉrʉ Davi ume ɓʉda. Maʉ̃ bẽrã idjia Davira waya ɓasia.
13 Maʉ̃ ewariɗe Davira mil sordaorã boroda ɓʉsia idji caita ɓarãmãrẽã. Djõne wãbʉdaza Daviba sordaorãda edepeɗa bia enebadjia.
14 Ãcõrẽra idji ume ɓʉ bẽrã ne jũmane bia wãbadjia.
15 Davira ne jũmane bia wã bẽrã Saulba waya ɓasia.
16 Baribʉrʉ jũma Judaɗebemarãba, waabema israelerã biɗa Davira bio quĩrĩã panasiɗaa djõne wãbʉdaza ãdjirãra edepeɗa bia enebadji bẽrã.
17 Ewari aɓa Saulba Davia jarasia:
–Mʉ̃ cau dji nabema Meráda bʉ́a diaya bʉ quima bamãrẽã. Mʉ̃a aɓabe quĩrĩã ɓʉa bʉra mʉ̃ itea sozarra djõ ɓaida Ãcõrẽba djõbibʉrʉɗe.–
Baribʉrʉ Saulba wãrãda nãwã crĩcha ɓasia: “Mʉ̃a Davi beai cãyãbara biara ɓʉa pilisteorãba beaɗida.”
18 Maʉ̃ne Daviba panusia:
–Baribʉrʉ mʉ̃ra dji dromaẽ́a bʉ wigu bai carea. Mʉ̃ ẽberãrã siɗa dadji Israel druaɗe dji dromarãẽ́a.–
19 Saulba Davia idji cau Merára diai jaraɗamĩna dji ewari jũẽsiɗe diaẽ́ basía. Ãtebʉrʉ ẽberã Adriel abadaa diasia. Adrielera Mehola puruɗebema basía.
20 Maʉ̃ne Saulba dewara cau Mical abadada eroɓasia. Maʉ̃ wẽrãba Davira quĩrĩã ɓasia. Saulba cawapeɗa ɓʉsriɗasia.
21 Nãwã crĩchasia: “Mʉ̃ cau Micalera Davia diaya. Maʉ̃be idjiɗeba mʉ̃a Davira pilisteorã jʉwaɗe ɓaebiya.” Maʉ̃ carea Saulba wayacusa Davia jarasia:
–Iɗibʉrʉ wãrãda bʉra mʉ̃ wigu baya.–
22 Maʉ̃ ewariɗe Saulba idjiare ɓeaa nãwã jarasia:
–Bãduɓa Davi ume beɗeabʉdaɗe jaraɗadua mʉ̃a idjira bio quĩrĩã ɓʉda idjaɓa bãrã biɗa idjira bia unu panʉda. Maʉ̃ bẽrã mʉ̃ caura edaduaɗa aɗadua.–
23 Sauloare ɓeaba Davia mãwã jarasiɗaa. Baribʉrʉ Daviba panusia:
–Mʉ̃ra ne neẽ́ quirua idjaɓa dji dromaẽ́a. ¿Ara jãwã quiruda dadjirã boro wigu baida ɓʉca?–
24 Sauloare ɓeara wãnapeɗa Daviba jaraɗara Sauloa jũma nẽbʉrʉsiɗaa.
25 Baribʉrʉ Saulba crĩcha ɓasia Davira pilisteorãa beabida. Maʉ̃ bẽrã jarasia:
–Davia jaraɗadua mʉ̃ cau carea paratara iwiɗiẽ́ ɓʉda. Mʉ̃a aɓabe quĩrĩã ɓʉa idjia pilisteorã umaquĩrã cacua wẽãgoɗa eda cien eneida. Idjía jaraɗadua pilisteorãba dadjirã biẽ́ opeɗaɗa carea mʉ̃a ãdjirãra aɓari quĩrãca biẽ́ o quĩrĩã ɓʉda.–
26 18:26-27 Sauloare ɓeaba Davia maʉ̃ra jarasiɗaa. Maʉ̃ beɗeara Daviba bia ũrĩsia dji boro Saul cauda eda quĩrĩã ɓaɗa bẽrã. Saulba jaraɗa ewari naẽna Davira idji sordaorã ume wãnapeɗa dosciento pilisteorãra quenasiɗaa.* Daviba maʉ̃ umaquĩrãra cacua wẽãgocuapeɗa dji era Saulmaa edesia idji cau edai carea. Ara maʉ̃da Saulba idji cau Micalera diasia Davi quima bamãrẽã.
28 Maʉ̃ne Saulba wãrãda cawasia Ãcõrẽra Davi ume ɓʉda idjaɓa idji cau Micalba Davira bio quĩrĩã ɓʉda.
29 Maʉ̃ carea biara wayasia. Maʉ̃ne Davi ume dji quĩrũda ɓesia aɓa beubʉrʉɗaa.
30 Maʉ̃ awara pilisteorã ãdjirã ume djõne zebʉdaza Daviba dewara sordaorã bororã cãyãbara auɗuara poyabadjia. Maʉ̃ bẽrã idjira trʉ̃ ɓʉga ɓesia.
