1 Samuel 19:1-24
19 19:1-2 Saulba idji warra Jonataʉ̃a, idjiare ɓeaa biɗa jarasia Davira beaɗamãrẽã. Baribʉrʉ Jonataʉ̃ba Davira bio quĩrĩã ɓʉ bẽrã maʉ̃gʉɗebemada idjía jũma nẽbʉrʉsia. Nãwã jarasia:
–Mʉ̃ zeza Saulba bʉra bea quĩrĩã ɓʉa. Maʉ̃ bẽrã quĩrãcuita ɓadua. Nu diapeɗa puru dajada mĩrũ ɓedua.
3 Maʉ̃ne mʉ̃ zeza ume pʉrrʉaɗe wãnia bʉ mĩrũ ɓʉ caita. Mʉ̃a bʉɗebemada idji ume beɗeaya. Idjia oi crĩcha ɓʉda cawasira mʉ̃a bʉ́a jaraya.–
4 Nurẽma Jonataʉ̃ba Daviɗebemada idji zezaa nãwã bia jarasia:
–Mʉ̃ boro, bʉ nezoca Davira biẽ́ orãdua. Acʉdua, idjia bʉra ni cãrẽ cadjirua siɗa oẽ́ ɓʉa ãtebʉrʉ bio careba ɓʉa.
5 Idji beaɗi adua Goliára beasia. Maʉ̃ ewariɗe Ãcõrẽba pilisteorãra jũma dadji israelerãa poyabisia. Maʉ̃ unusiɗe bʉra bio ɓʉsriɗasia. Baribʉrʉ iɗi ¿cãrẽ cãrẽã idjira biẽ́ o quĩrĩã ɓʉ? Idjia ni cãrẽ cadjiruada oẽ́ ɓʉa bʉa idjira beai carea.–
6 Jonataʉ̃ba jara ɓʉ ũrĩbʉrʉɗe Saulba panusia:
–Warra, Ãcõrẽ quĩrãpita wãrãneba jaraya: mʉ̃a Davira beabiẽ́a.–
7 Saul wãnacarea Jonataʉ̃ba Davira trʉ̃peɗa idji zeza ume beɗeaɗara jũma nẽbʉrʉsia. Maʉ̃be Jonataʉ̃ba Davira Saulmaa edepeɗa Davira Saul ume ɓesia naẽna ɓaɗa quĩrãca.
8 Maʉ̃ ewariɗe israelerãra wayacusa pilisteorã ume djõsiɗaa. Davira djõne wãpeɗa zocãrã quenabʉrʉ carea pilisteorãra memenesiɗaa.
9 Baribʉrʉ Ãcõrẽba jaira waya Saulmaa idu zebisia. Saulora mĩãsu catʉ chũmasia Daviba arpa zá ɓʉɗe.
10 Cawaẽ́ne Saulba Davira mĩãsuba su jidai basía baribʉrʉ Daviba bera aubuesia. Maʉ̃ bẽrã mĩãsura deɗaa su nũmane wãsia. Ara maʉ̃ diamasi Davira mĩrũ wãsia.
11 Maʉ̃ bẽrã Saulba sordaorãda Davi deɗaa diabuesia acʉ pananamãrẽã idjaɓa nurẽma diapeɗa Davi beaɗamãrẽã. Baribʉrʉ idji quima Micalba Davia nãwã jarasia:
–Bʉda naʉ̃ diamasi mĩrũ wãẽ́bʉrʉ nu bʉra beaɗia.–
12 Maʉ̃ bẽrã dji dajadaa acʉbadaɗeba Micalba Davira jʉ̃caraɗeba uɗaa ɓʉpeɗa Davira mĩrũ wãsia.
13 Maʉ̃be Micalba jʉwaba oɗa ãcõrẽ waiɓʉada Davi cʉɗaɗe ɓʉsia. Maʉ̃ boroare chiwatu carada ɓʉpeɗa boroɓaba ãnẽɓari coɓʉsia.*
14 Diapeɗa Saulba sordaorãa Davi jidabisiɗe Micalba jarasia idjira cacua biẽ́ ɓʉ bẽrã cʉɗaɗe ɓʉda.
15 Sordaorãra Saulmaa jẽda wãnapeɗa maʉ̃ra nẽbʉrʉsiɗaa. Baribʉrʉ Saulba ãdjira wayacusa Davi jidaɗe wãbisia. Nãwã jarasia:
–¡Cʉɗaɗe ɓʉ siɗa idjira jidaɗapeɗa mʉ̃maa enenadua beai carea!–
16 Ara maʉ̃da sordaorãba Davira jidaɗe wãsiɗaa. Idji deɗe eɗa wãnapeɗa idji cʉɗaɗe jʉwaba oɗa ãcõrẽda chiwatu cara bara taɓʉda unusiɗaa.
17 Maʉ̃ carea Saulba idji cau Micalea jarasia:
–¿Cãrẽ cãrẽã mʉ̃ra jãwã cũrũgasi? ¿Cãrẽ cãrẽã mʉ̃ dji quĩrũra mĩrũ wãmãrẽã carebasi?–
Micalba panusia:
–Idjia jarasia carebaẽ́bʉrʉ mʉ̃ra beaida.–
18 Davi mĩrũ wãsiɗe Ramá puruɗaa Samuel acʉɗe wãsia. Mama Daviba jũma nẽbʉrʉsia sãwã Saulba idjira osida. Maʉ̃be Davira, Samuel siɗa Nayo abadaɗaa panane wãsiɗaa.
19 Baribʉrʉ ʉ̃cʉrʉba Sauloa jarasiɗaa Davira Nayoɗe ɓʉda Ramá puru caita.
20 Ara maʉ̃da Saulba sordaorãda Davi jidaɗe diabuesia. Ãdjirã jũẽsiɗaɗe Ãcõrẽneba beɗeabadarãda unusiɗaa Ãcõrẽneba beɗea duanʉda.* Samuelera ãdji nocoare ɓasia. Maʉ̃ne cawaẽ́ne Ãcõrẽ Jaurera Saulba diabueɗarãmaa zesia. Maʉ̃be ãdjirã siɗa Ãcõrẽneba beɗea duanesiɗaa.
21 Saulba maʉ̃ cawasiɗe dewara sordaorãda diabuesia. Jũẽsiɗaɗe maʉ̃gʉrã siɗa Ãcõrẽneba beɗea duanesiɗaa. Maʉ̃ bẽrã Saulba dewararãda diabuesia. Baribʉrʉ maʉ̃gʉrã siɗa Ãcõrẽneba beɗea duanesiɗaa.
22 Maʉ̃ carea ara idjida Ramá puruɗaa Davi jidaɗe wãsia. Secú abadaɗe baido juebada uriama jũẽsiɗe iwiɗisia Davida idjaɓa Samuelda sãma panʉ cawaya. Maʉ̃ne ẽberãrãba jarasiɗaa ãdjira Nayoɗe panʉda Ramá puru caita.
23 Maʉ̃ bẽrã Saulora Nayoɗaa wãsia. Wãbʉrʉɗe Ãcõrẽ Jaurera idjimaa zepeɗa idji siɗa Ãcõrẽneba beɗea ɓesia. Mãwã beɗea wãbʉrʉda Nayoɗe jũẽsia Ramá puru caita.
24 Mama idjia jʉ̃ ɓʉra ẽrãpeɗa Samuel quĩrãpita ãsa diamasi biɗa Ãcõrẽneba beɗea ɓasia. Maʉ̃ carea aɓaʉba ne oca baɗada cawaẽ́ne o ɓeibʉrʉ israelerãba nãwã jarabadaa:
–Saul siɗa ¿Ãcõrẽneba beɗeabarica?–
