1 Samuel 2:1-36
2 Maʉ̃be Anaba Ãcõrẽa nãwã beɗeasia:
Ãcõrẽ, bʉ carea mʉ̃ra soɗeba wãrãda ɓʉsriɗa ɓʉa. Bʉabʉrʉ mʉ̃́a ʉɓʉada dia ɓʉa.
Mʉ̃ dji quĩrũ quĩrãpita ipiɗaya bʉa mʉ̃ra ẽdrʉ ɓʉɗa bẽrã. Wãrãda mʉ̃ra bio ɓʉsriɗa ɓʉa.
2 Ãcõrẽ, ni aɓaʉda bʉ quĩrãca neẽ́a. Dai Ãcõrẽ, ni aɓaʉba daira poya wagacaa bʉa wagabari quĩrãca. Dewara ãcõrẽda bʉ quĩrãca neẽ́a.
3 Ãcõrẽba ne jũmada cawa ɓʉa. Idjiabʉrʉ dadjia o panʉra cawa obaria.
Maʉ̃ bẽrã ni aɓaʉda dji droma quĩrãca beɗeaiẽ́ ɓʉa. Ni maãrĩ biɗa mãwã beɗeaiẽ́ ɓʉa.
4 Idjiabʉrʉ ẽberã mẽsrã ɓeara poyabaria baribʉrʉ dji ʉɓʉaẽ́ queɗeaa ʉɓʉada diabaria.*
5 Ne bara ɓeaɗara iɗira ne coɗi carea djãrã itea traja panʉa, baribʉrʉ ne neẽ́ ɓeaɗaba iɗira aɗuba eropanʉa.
Wẽrã warra toca baɗaba warrarãda siete tosia.
Baribʉrʉ warra zocãrã toɗaba waa warra toẽ́a.
6 Ãcõrẽbʉrʉ zocai ɓaira, beui siɗa diabaria. Idjia ẽberãra beuɗarã panabadama ɓʉbaria idjaɓa ʉ̃rẽbabibaria.
7 Ãcõrẽbʉrʉ ne neẽ́ ɓeada, ne bara ɓea siɗa ɓʉbaria.
Dji droma ɓeara eɗaara ɓʉbaria idjaɓa dji eɗaara ɓeada dji dromada ɓʉbaria.
8 Ãcõrẽba naʉ̃ ẽjũãra oɗa bẽrã idjidrʉ djibaria. Idjiɗeba ne jũmada ɓʉa.
Maʉ̃ bẽrã ne neẽ́ quirura dji dromada poya ɓʉya.
Ne ɓatabuebadama ɓabarira dji bororã deɗe dji dromada poya ɓʉya.
9 Ãcõrẽba idji ĩjã ɓeara wagabaria baribʉrʉ dji cadjiruarãda beuɗarã panabadama pãĩmane ɓʉbaria.
Ni aɓaʉba ara idji ʉɓʉaɗeba poyacaa.
10 Ãcõrẽba idji dji quĩrũra jũma poyaya. Bajãneba baa ɓaebʉrʉ quĩrãca ãdjirãra bio cawa oya.
Ãcõrẽba jũma naʉ̃ ẽjũãne ɓeara cawa oya. Idjia ɓʉɗa boroa ʉɓʉada diaya. Idjia edaɗa borora dji dromaara ɓʉya.
11 Mãwãnacarea Elcanara Ramá puruɗaa jẽda wãsia. Baribʉrʉ idji warra zaquera sacerdote Eli ume ɓesia Ãcõrẽ deɗe carebamãrẽã.
Eli warrarãba cadjirua o panana
12 Eli warrarãra dji cadjiruarã basía. Ãcõrẽda wayaɗaca basía.
13 Sacerdoterãba oɗida panʉ quĩrãca oɗaca basía.* Ãtebʉrʉ nãwã obadjiɗaa: aɓaʉba Ãcõrẽa animarã dragada babue diabipeɗa dji djara dju ɓʉɗe sacerdote nezocaba mĩãsu quiɗa ũbea eroɓʉra enebadjia.
14 Maʉ̃ba nedjara dju nũmʉra supeɗa idjia jira edaɗara edebadjia sacerdoteba comãrẽã. Israelerãba Siloɗe Ãcõrẽa animarã draga babue diabʉdaza mãwã obadjiɗaa.
15 Maʉ̃ awara dji draga babue diai naẽna sacerdote nezocara zepeɗa dji draga babue diabi ɓʉ́a nãwã jarabadjia:
–Ne djarara diadua sacerdoteba bá comãrẽã. Idjia nedjara djuɗada quĩrĩãẽ́a, ãtebʉrʉ dji õgoada quĩrĩã ɓʉa.–
16 Maʉ̃ne ẽberãba dji dragada naãrã babue diaɗida panʉana aibʉrʉ, dji nezocaba panubadjia:
–Mãwãẽ́a. Ara nawena diadua. Mãwãẽ́bʉrʉ mʉ̃a jãrĩ edaya.–
17 Mãwã Eli warrarãba cadjirua o panʉra Ãcõrẽ quĩrãpita bio biẽ́ ɓasia. Israelerãba animarã Ãcõrẽa babue diabadara ãdjia siriẽ́ unubadjiɗaa.
18 Mãwã panʉne Samuelba Ãcõrẽ deɗe careba ɓabadjia. Idjia sacerdote djio lino wua oɗara jʉ̃badjia.
19 Poaza dji papaba idjia cacuaɗe jʉ̃mãrẽã obadjia. Maʉ̃ra diaɗe wãbadjia dji quima ume poaza animarã babue diaɗe wãbʉdaɗe.
20 Maʉ̃ne Eliba Elcanara dji quima siɗa nãwã bia jara ɓʉbadjia:
–Elcana, Ãcõrẽba bʉ́a dewara warrarãda bʉ quima Ana ume unubiya idjia warra naãrã iwiɗiɗada Ãcõrẽa diaɗa bẽrã.–
Mãwãnacarea Elcanara idji quima ume jẽda diguiɗaa wãbadjiɗaa.
21 Maʉ̃be Ãcõrẽba Anara carebabadjia. Mãwã Anaba umaquĩrã warrada ũbea idjaɓa wẽrãcaurãda umé tosia. Maʉ̃misa Samuelera Ãcõrẽ quĩrãpita ɓʉda warisia.
22 Maʉ̃ ewariɗe Elira bio drõãda ɓasia. Idjia ũrĩsia idji warrarãba israelerãra biẽ́ o panʉda. [Maʉ̃ awara ũrĩsia ãdjirãra wẽrãrã Ãcõrẽ wua deɗe eɗa wãbadama ne obadarã ume mĩã comʉa panabadada.]*
23 2:23-24 Maʉ̃ carea idji warrarãa nãwã jarasia:
–Mʉ̃ warrarã, bãrãba cadjirua o panʉra jũmarãba jara panʉa. Wãrãda Ãcõrẽ puruba jara ɓʉra bio cadjirua ɓʉa. ¿Cãrẽ cãrẽã mãwã o panʉ?
25 Aɓaʉba djãrãda biẽ́ oibʉrʉ, Ãcõrẽba maʉ̃ ẽberãra poya carebaya dewarabema ume bia ɓemãrẽã. Baribʉrʉ aɓaʉba Ãcõrẽda biẽ́ oibʉrʉ ¿caiba idjira carebai?–
Mãwãmĩna Eli warrarãba ãdji zezaba jaraɗara ĩjãnaẽ́ basía. Ãcõrẽba ãdjira mãwã eroɓasia beuɗida quĩrĩãna bẽrã.
26 Maʉ̃misa Samuelera wari ɓasia. Ãcõrẽba, ẽberãrã biɗa idjira bia unusiɗaa.
27 Maʉ̃ ewariɗe Ãcõrẽneba beɗeabarida aɓa Elimaa zepeɗa nãwã jarasia:
–Ãcõrẽba nãwã jara ɓʉa:
“Bãrã drõã naẽnabemarã Egiptoɗebema boro jʉwaeɗa panasiɗaɗe mʉ̃a ãdjirãa ara mʉ̃nebemada ebuɗa cawabisia.
28 Maʉ̃ne mʉ̃a jũma israelerãnebemada Aaroʉ̃drʉ idjaɓa bãrã, idjiɗeba yõbʉdarã siɗa edasia mʉ̃ sacerdoterãda ɓeaɗamãrẽã. Mãwã bãrãba animarãda mʉ̃́a babue diabadaa, incienso querada bá diabadaa, idjaɓa mʉ̃ quĩrãpita sacerdote djiora jʉ̃badaa. Maʉ̃ awara mʉ̃a bãrã drõã naẽnabemarãa jarasia israelerãba animarã draga mʉ̃́a babue diabʉdaɗe bãrã sacerdoterãba dji djaraɗebemada edaɗida panʉda coɗi carea.
29 ¿Bãrãba cãrẽ cãrẽã mʉ̃a animarã babue diabi jaraɗara, dewara diabi jaraɗa siɗa siriẽ́ unubada? ¿Cãrẽ cãrẽã bʉ warrarãra mʉ̃ cãyãbara biara quĩrĩã ɓʉ? Mʉ̃ puru israelerãba animarã draga babue diabʉdaɗe dji biara ɓʉ nedjara co panʉneba bʉ warrarãra boreguea panʉa.”
30 Dadji israelerã Ãcõrẽba naẽna jarasia bʉ deɗebemarãra, jũma bʉ ẽberãrã siɗa ewariza idji sacerdoterãda ɓeaɗida. Baribʉrʉ iɗira nãwã jara ɓʉa:
“Mʉ̃a bãrãra waa mʉ̃ sacerdoterã idu babiẽ́a. Ãtebʉrʉ mʉ̃ bia jara panʉda mʉ̃a bia ɓʉya idjaɓa mʉ̃ igara panʉra mʉ̃a biẽ́ ɓʉya.
31 Mʉ̃a bãrã cawa oi ewarira jũẽbʉrʉa. Maʉ̃ne bʉ deɗebema drõãẽ́ ɓeara, bʉ ẽberãrã drõãẽ́ ɓea siɗa mʉ̃a jũma quinibiya. Ni aɓaʉda waraga beuɗaẽ́a.
32 Maʉ̃ ewariɗe mʉ̃a israelerãra bia o ɓaya baribʉrʉ bʉ ẽberãrãnebema ni aɓaʉda waraga beuɗaẽ́a. Maʉ̃ bẽrã ewariza bãrãra sobiẽ́ panania idjaɓa sopua panania.*
33 Mʉ̃a bʉ ẽberãrãnebemada aɓa idu sacerdote babiya. Mãwãmĩna idjira sobiẽ́ ɓaya idjaɓa sopua ɓaya. Maʉ̃ne waabema bʉɗeba yõbʉdarãra drõã ɓaɗaẽ́ne beuɗia.*
34 Naʉ̃gʉba cawabiya mʉ̃a jaraɗara wãrãda mãwãida: bʉ warrarã Opnira, Piné siɗa aɓari ewariɗe beuɗia.
35 Mãwãnacarea mʉ̃a dewarada ɓʉya mʉ̃ sacerdote bamãrẽã. Mʉ̃a quĩrĩã ɓʉ quĩrãca idjia jũma ariɗe o ɓaya. Idjiɗeba yõbʉdarãda mʉ̃a ɓʉya ewariza mʉ̃ sacerdoterãda ɓeaɗamãrẽã. Mʉ̃a israelerã boro ɓʉi ewariɗeba ʉ̃taa ãdjira ewariza mãwã ɓeaɗia.
36 Maʉ̃ ewariɗe bʉ ẽberãrãnebema waɗi zocai ɓeara ãdji quĩrãpita zeɗapeɗa quĩrã djuburiada iwiɗiɗia paratada, coɗi siɗa maãrĩ diaɗamãrẽã. Maʉ̃ awara ne coɗi carea iwiɗiɗia sacerdoterã nezocarãda ɓʉɗamãrẽã.”–
Beɗea eɗaare
^ 2:4 Ẽberã mẽsrã ɓeara poyabaria. Hebreo beɗeaɗe nãwã ɓʉ́ ɓʉa: “Ẽberã mẽsrã ɓearã enedrʉmara ɓʉabaria.”
^ 2:13 Levitico 7:28-36
^ 2:22 Beɗea corcheteɗe ɓʉra carta dji drõãara ɓeaɗe neẽ́a.
^ 2:32 Bãrãra sobiẽ́ panania idjaɓa sopua panania. Hebreo beɗeaɗe maʉ̃ra ebuɗa ɓʉẽ́a.
^ 2:33 Hebreo beɗeaɗe maʉ̃ versículora ebuɗa ɓʉẽ́a. Eliɗeba yõna sacerdoterã beupeɗaɗada 1 Samuel 22:6-23ɗe ɓʉ́ ɓʉa.
