1 Samuel 21:1-15
21 Maʉ̃ ewariɗe Davira Nobo puruɗaa sacerdote Ahimele acʉɗe wãsia. Baribʉrʉ Ahimeleba Davira iduɓa zebʉrʉda unusiɗe dauperasia. Audiaɓaripeɗa nãwã iwiɗisia:
–¿Sãwã jãwã bʉduɓa nĩ?
2 Daviba sewaɗeba panusia:
–Dadjirã boro Saulba mʉ̃́a ne obi ɓʉa. Baribʉrʉ ni aɓaʉa maʉ̃gʉɗebemada cawabirãduaɗa asia. Mʉ̃a jaraɗama mʉ̃ sordaorã ume dji ununia.
3 Mẽrã, ¿cãrẽda eroɓʉ coi carea? Paʉ̃da juesuma wa ne baridua bʉa eroɓʉ siɗa mʉ̃́a diadua.–
4 Maʉ̃ne sacerdoteba panusia:
–Mʉ̃a paʉ̃ eroɓʉra baridua paʉ̃ẽ́a. Ãtebʉrʉ Ãcõrẽ quĩrãpita ɓaɗa paʉ̃da eroɓʉa.* Bʉ ume panʉ sordaorãda iɗi wẽrãrã ume cãĩnaẽ́ panʉbʉrʉ maʉ̃ paʉ̃ra mʉ̃a diaya.–
5 Daviba panusia:
–Ni aɓaʉda wẽrã ume cãĩnaẽ́ panʉa. Dai djõne wãbʉdaza Ãcõrẽ quĩrãpita bia ɓeaɗida panʉa. Iɗi biara mãwã panʉa dadjirã boro Saulba diabueɗa bẽrã.–
6 Maʉ̃ne sacerdoteba Davia paʉ̃ Ãcõrẽ quĩrãpita ɓaɗara diasia dewarada neẽ́ ɓaɗa bẽrã. Maʉ̃ paʉ̃ra eroɓasia paʉ̃ djiwiɗida Ãcõrẽ quĩrãpita ɓʉɗa bẽrã.
7 Maʉ̃ ewariɗe Saul nezoca Doé abadada Ãcõrẽ quĩrãpita ne oi carea mama ɓasia. Idjira Edoʉ̃nebema basía. Saul oveja wagabadarã boro basía.
8 Maʉ̃ne Daviba sacerdote Ahimelea jarasia:
–¿Bʉa djõbada necoda wa mĩãsuda nama neẽ́ ɓʉca? Dadjirã boro Saulba isabe zebiɗa bẽrã mʉ̃ necoda, dewara djõi careabema siɗa eneẽ́ basía.–
9 Ahimeleba panusia:
–Bʉa Ela jeweɗaɗe beaɗa pilisteo Goliá neco baɗada nama eroɓʉa. Dai sacerdote djio waga eroɓʉ jẽdaare wuaba bʉrá ɓʉa.* Quĩrĩã ɓʉbʉrʉ, edadua. Mʉ̃a dewarada neẽ́ ɓʉa.–
Daviba jarasia:
–Jãʉ̃ cãyãbara biara ɓʉra neẽ́a. Mʉ̃́a diadua.–
10 Ara maʉ̃ ewariɗe Davira Saul carea pilisteorã puru Gat abadaɗaa mĩrũ wãsia dji boro Aquisi abadamaa.
11 Maʉ̃ne Aquisiare ɓeaba jarasiɗaa:
–¿Jari ɓʉra Davi, Israelɗebema boroẽ́ca?* Wẽrãrã cari duanʉne idjiɗebemada nãwã trʉ̃ãsiɗaa:
Saulba ẽberãda mil beasia baribʉrʉ Daviba die mil beasia.
12 Ãdjia mãwã jarapeɗaɗa carea Daviba bio crĩcha nũmesia. Bio waya ɓasia Gat puruɗebema boro Aquisiba idjira beabida.
13 Maʉ̃ carea ãdji quĩrãpita quĩrãẽ́ ɓʉ quĩrãca ɓabadjia. Dji deɗe eɗa wãbadaɗe idji ɓichiwiba orrecuabadjia idjaɓa iɗoɓara idji icaraɗe zowuabibadjia.
14 Maʉ̃ne Aquisiba idjiare ɓeaa nãwã jarasia:
–¡Jãʉ̃ ẽberãra quĩrãẽ́ taɓʉa! ¿Cãrẽ cãrẽã idjira mʉ̃ quĩrãpita enesiɗa?
15 ¿Idjira nama enesiɗaca mʉ̃ quĩrãpita quĩrã cawaẽ́ ɓamãrẽã? Bãrãmaarã ¿quĩrãẽ́ ɓeara nama neẽ́ca? ¡Jãʉ̃ ẽberãra mʉ̃ deɗebemada ãyã edeɗadua!–
