1 Samuel 26:1-25
26 Maʉ̃ ewariɗe Zip puruɗebemarãda Guibeaɗaa wãnapeɗa Sauloa nãwã jarasiɗaa:
–Davira Haquila eya zaqueɗe ẽjũã põãsa ewaraga ɓʉ quĩrãpe mĩrũ ɓʉa.–*
2 Ara maʉ̃da Saulba dji biara ɓea Israelɗebema sordaorãda mil ũbea edapeɗa Zip ẽjũã põãsa ewaraga ɓʉɗaa Davi jʉrʉɗe wãsiɗaa.
3 Maʉ̃ne Haquila eya zaqueɗe o icawa cãĩsiɗaa. Maʉ̃ eya zaquera ẽjũã põãsa ewaraga ɓʉ quĩrãpe ɓʉa.
Maʉ̃ne Davira ẽjũã põãsa ewaraga ɓʉɗe ɓasia. Idjia cawasia Saulba idjira jidaɗe zebʉrʉda.
4 Maʉ̃ bẽrã ʉ̃cʉrʉ diabuesia Saulora idji sordaorã siɗa sãma panʉda cawai carea. Ãdjirã jẽda zesiɗaɗe jarasiɗaa wãrãda Saulda jũẽsida.
5 Maʉ̃be Davira Saul idji sordaorã ume panʉmaa chupea wãpeɗa quĩrãcuita acʉsia Saulda, Ner warra Abne siɗa sãma cãĩ panʉ cawaya. Maʉ̃ Abnera Saul sordaorã boro basía. Daviba unusia Saulora idji sordaorã ẽsi cãĩ ɓʉda.
6 Davira jẽda wãpeɗa hititaɗebema Ahimele ume idjaɓa Seruyá warra Abisai ume beɗeasia. Abisaira Joá djaba basía. Daviba ãdjía iwiɗisia:
–¿Caida mʉ̃ ume Saul cãĩ ɓʉmaa wãi?
Abisaiba panusia:
–Mʉ̃da bʉ ume wãya.–
7 Maʉ̃ diamasi Davira Abisai ume Saul sordaorã panʉmaa wãsiɗaa. Jũẽsiɗaɗe unusiɗaa Saulora cãĩ ɓʉda. Idji boro nocoare mĩãsuda egoroɗe su nũmasia. Maʉ̃ne Abneda, idji sordaorã siɗa Saul cãĩ ɓʉ orrocawa cãĩ panasiɗaa.
8 Maʉ̃ carea Abisaiba Davia jarasia:
–Iɗi Ãcõrẽba bʉ dji quĩrũra bʉ jʉwaɗe ɓʉbʉrʉa. Saulora mʉ̃́a idu beabidua. Ara idji mĩãsuba idjira egoroɗaa su jidaya. Ɓarima aɓa subʉrʉba beaya.–
9 Baribʉrʉ Daviba jarasia:
–Idjira bearãdua. Ãcõrẽba ɓʉɗa boroda beasira idjia cawa oya.
10 Ãcõrẽ quĩrãpita mʉ̃a jaraya aɓabe idjiabʉrʉ Saulora beubida ɓʉa. Ãĩbẽrã ewari aɓa idjia Saulora ara jãwã beubiya wa dji quĩrũ ume djõ ɓʉɗe beubiya.
11 Idjiabʉrʉ Saulora dadjirã boroda ɓʉɗa bẽrã mʉ̃a Saulora beaẽ́a. Baribʉrʉ idji jiadoda, mĩãsu siɗa idji boro nocoare ɓeada edaɗapeɗa isabe wãnia.–
12 Ara maʉ̃da Daviba mĩãsuda, jiado siɗa Saul boro nocoare ɓeada edaɗapeɗa wãsiɗaa. Ãdjia opeɗaɗara ni aɓaʉba ununaẽ́ basía ni ũrĩnaẽ́ basía. Ni aɓaʉda ʉ̃rʉ̃manaẽ́ basía Ãcõrẽba jũmarãda bio cãĩbigaɗa bẽrã.
13 Maʉ̃be Davira dewarabema eya zaque boroɗaa wãsia. Mama idjira Saul sordaorã panʉ quĩrãpe tʉmʉ ariɗe ɓesia.
14 Maʉ̃ne Daviba Saul sordaorã boro Abneda trʉ̃ jarasia:
–¡Abne! ¿Ũrĩ ɓʉca?–
Abneba panusia:
–¿Caida jãwã dadjirã boro Sauloa ɓia ɓʉ?–
15 Daviba jarasia:
–¿Bʉra Israel druaɗe dji mẽsrãara ɓʉẽ́ca? Maʉ̃da ¿cãrẽ cãrẽã dadjirã boro Saulora wagaẽ́ ɓʉ? Iɗi ẽberãda bãrã cãĩ duanʉmaa wãpeɗa dadjirã borora beaida ɓasia.
16 Bʉa cadjiruada osia. Bʉa dadjirã borora wagaẽ́ ɓasia. Ãcõrẽ quĩrãpita mʉ̃a jaraya: Ãcõrẽba ɓʉɗa borora bãrãba wagapeɗaɗaẽ́ bẽrã, bʉda bʉ sordaorã siɗa jũma beuɗida panʉa. Saul mĩãsuda, jiado siɗa idji boro nocoare ɓeaɗada jʉrʉdua unui cawaya.–
17 Saulba cawasia Davida mãwã beɗea ɓʉda. Maʉ̃ bẽrã jarasia:
–Mʉ̃ warra Davi, ¿bʉda jãwã beɗea ɓʉca?–
Daviba panusia:
–Mãẽ, mʉ̃ boro. Mʉ̃da mãwã beɗea ɓʉa.
18 Bʉa ¿cãrẽ cãrẽã mʉ̃, bʉ nezocada biẽ́ oi carea ẽpẽ ɓʉ? ¿Cãrẽneba mʉ̃a bʉra biẽ́ osi? ¿Cãrẽ cadjiruada osi?
19 Mʉ̃ boro, mʉ̃ djuburia mʉ̃a jarabʉrʉra ũrĩdua. Ãcõrẽba bʉda mʉ̃ ume quĩrũbisibʉrʉ mʉ̃a idjía animarãda babue diaya bʉ quĩrũbira tumabimãrẽã. Baribʉrʉ ẽberãrãba bʉda mʉ̃ ume quĩrũbisiɗabʉrʉ, Ãcõrẽba ãdjirãra biẽ́ ɓʉya. Ãdjirãba mʉ̃ra Ãcõrẽba diaɗa druaɗebemada ãyã jʉretabʉda quĩrãca nama mĩrũ zebisiɗaa. Nãwã jarabʉdaca ɓʉa: ãyã wãdua dewara ãcõrẽ ɓea ẽpẽmãrẽã.
20 Nama Ãcõrẽba diaɗa drua ãĩ mʉ̃ra bearãdua. Mʉ̃ra usa tʉ̃ quĩrãca ʉɓʉaẽ́ ɓʉ bẽrã ¿bʉa cãrẽ cãrẽã mʉ̃ra beai carea jʉrʉ ɓʉ? ¡Eyaɗe suẽrru beai carea jʉrʉ ɓʉ quĩrãca mʉ̃ra ẽpẽ ɓʉa!–
21 Maʉ̃ carea Saulba panusia:
–Mʉ̃ warra Davi, mʉ̃a cadjiruada osia. Ẽberã crĩcha neẽ́ ɓʉ quĩrãca mʉ̃a bio ãĩ o ɓasia. Mʉ̃ ume jẽda wãna. Iɗi bʉa mʉ̃ra beaɗaẽ́ bẽrã mʉ̃a bʉra waa biẽ́ oẽ́a.–
22 Daviba panusia:
–Mʉ̃ boro, bʉ mĩãsura nama ɓʉa. Sordaoda aɓa diabuedua edaɗe zemãrẽã.
23 Ãcõrẽba ẽberãza ne biada diaya ãdjia jipa o panʉ carea idjaɓa wãrãda ĩjã o panʉ carea. Iɗi Ãcõrẽba bʉra mʉ̃ jʉwaɗe ɓʉsia. Baribʉrʉ mʉ̃a bʉra beaẽ́ basía, idjiabʉrʉ bʉra dai boroda ɓʉɗa bẽrã.
24 Mʉ̃a Ãcõrẽa iwiɗi ɓʉa mʉ̃da zocai ɓʉmãrẽã, mʉ̃a iɗi bʉra zocai ɓʉɗa quĩrãca. Idjaɓa iwiɗi ɓʉa mʉ̃ra jũma bia mĩga ɓʉɗebemada ẽdrʉ ɓʉmãrẽã.–
25 Saulba panusia:
–Ãcõrẽba bʉra carebaya, mʉ̃ warra Davi. Wãrãda bʉa ne waiɓʉada o ɓaya. Bʉa obʉrʉra jũma bia odjaya.–
Maʉ̃be Davira ãyã wãpeɗa Saulora jẽda idji druaɗaa wãsia.
Beɗea eɗaare
^ 26:1 Ẽjũã põãsa ewaraga ɓʉ. Hebreo beɗeaɗe ɓʉ́ ɓʉa “Jesimoʉ̃.”
