1 Samuel 27:1-12
27 Mãwãnacarea Daviba nãwã crĩchasia: “Ewari aɓa Saulba mʉ̃ra beaya. Biara ɓʉa mʉ̃ra pilisteorã druaɗaa mĩrũ wãida. Mãwãra Saulba mʉ̃ra beai carea naʉ̃ Israel druaɗe waa jʉrʉẽ́a. Mama idjia mʉ̃ra poya jidaẽ́a.”
2 Ara maʉ̃da Davira, seisciento sordaorã idji ume panʉ siɗa pilisteorã puru Gat abadaɗaa wãsiɗaa. Maʉ̃ puru borora Maó warra Aquisi basía.
3 Maʉ̃ne Davira, idji sordaorã siɗa ãdji ẽberãrã bara Aquisi caita Gat puruɗe panesiɗaa. Daviba quimada umé eroɓasia. Aɓa Ahinoaʉ̃ basía. Ahinoaʉ̃ra Jezreel puruɗebema basía. Dewarabemara Abigail basía. Abigailera Carmel puruɗebema basía. Idjira Nabal pẽdra wẽrã basía.
4 Saulba ũrĩsia Davira Gat puruɗaa mĩrũ wãsida. Maʉ̃ bẽrã Davi beai carea waa jʉrʉẽ́ basía.
5 Ewari aɓa Daviba Aquisia nãwã jarasia:
–Bʉa mʉ̃da bia unu ɓʉbʉrʉ, bʉ druaɗe puru zaqueda aɓa mʉ̃́a diadua dai panani carea. Mʉ̃, bʉ nezocara bʉ puru dromane ɓaiẽ́ ɓʉa.–
6 Ara maʉ̃ ewariɗe Aquisiba Sicla puruda Davia diasia. Mamaʉba ʉ̃taa maʉ̃ purura Juda druaɗebema bororãba eropanesiɗaa.
7 Davira poa aɓa auɗu jeɗeco quĩmãrẽ pilisteorã druaɗe ɓasia.
8 Mama panʉne Davira idji sordaorã ume gesuritarãmaa, gezritarãmaa, idjaɓa amalecitarãmaa biɗa ne jãrĩcuaɗe wãbadjiɗaa. Maʉ̃ ẽberãrãra Telaiʉ̃ puruɗeba Sur ẽjũãare aɓa Egipto drua daucha panabadjiɗaa.*
9 Ne jãrĩcuaɗe wãbʉdaɗe Daviba idji sordaorã ume umaquĩrãrãda, wẽrãrã siɗa jũma quenabadjiɗaa. Ni aɓaʉda zocai ɓʉɗaca basía. Baribʉrʉ ovejada, pacada, burroda, cameyoda, cacuaɗe jʉ̃bada siɗa jũma edacuaɗapeɗa Aquisimaa jẽda wãbadjiɗaa.
10 Maʉ̃ne Aquisiba nãwã iwiɗibadjia:
–Iɗi bãrãra ¿sãma ne jãrĩcuaɗe wã panasiɗa?–
Maʉ̃ne Daviba sewaɗeba nãwã panubadjia:
–Negue ẽjũãne Juda druaɗe Jerameelɗeba yõpeɗaɗarãba eropananada, quenitarãba eropanana siɗa jãrĩcuaɗe wã panasiɗaa.–
11 Ne jãrĩcuaɗe wãbʉrʉɗe Daviba umaquĩrãrãda, wẽrãrã siɗa jũma quenabadjia. Ni aɓaʉda zocai ɓʉca basía. Idjia nãwã crĩchasia: “Aɓaʉda zocai ɓʉsira maʉ̃ne idjira Gat puruɗaa zeibʉrʉ Aquisia jaraisicada mʉ̃a oɗada.” Davi pilisteorã druaɗe ɓasiɗe mãwã o ɓabadjia.
12 Maʉ̃ carea pilisteorã boro Aquisiba crĩchasia Davira idjiare ɓʉda. Idjia jarasia: “Daviba o ɓʉ carea idji puru Israelba idjira quĩrãma panʉa. Maʉ̃ bẽrã idjira ewariza mʉ̃are ɓaya.”
Beɗea eɗaare
^ 27:8 Telaiʉ̃ puruɗeba. Ʉ̃cʉrʉmaarã maʉ̃ba jara ɓʉa: “Drõã naẽnabema ewariɗeba ʉ̃taa.”
