1 Samuel 28:1-25
28 Maʉ̃ ewariɗe pilisteorãda dji jʉresiɗaa israelerã ume djõni carea. Maʉ̃ne pilisteorã boro Aquisiba Davia nãwã jarasia:
–Bʉa bio cawa ɓʉa bʉra, bʉ sordaorã siɗa mʉ̃are djõne wãnida panʉda.–
2 Daviba jarasia:
–Bia ɓʉa, bʉa unuya sãwã mʉ̃, bʉ nezocara djõbarida.–
Aquisiba jarasia:
–Mãwã baibʉrʉ, bʉra mʉ̃ wagabarida ɓʉya aɓa bʉ beubʉrʉɗaa.–
3 Maʉ̃ naẽna Saulba jũma daubararãda Israel druaɗebemada ãyã jʉrecuasia.* Maʉ̃ awara Samuelera jaiɗasia.* Israelerãra idji carea jĩãsiɗaa. Idji puru Ramáne tʉɓarisiɗaa.
4 Pilisteo sordaorãra ãbaa dji jʉreɗapeɗa Suneʉ̃ puruɗe duanesiɗaa. Maʉ̃ne Saulba idji sordaorãra ãbaa jʉrepeɗa Guilboa eyaɗe duanesiɗaa.
5 Baribʉrʉ pilisteo sordaorã unusiɗe Saulora ne wayaaba cacua urea nũmesia.
6 Maʉ̃ carea Saulba Ãcõrẽa iwiɗisia sãwã oida ɓʉ cawaya. Baribʉrʉ Ãcõrẽba cãĩmocaraɗeba ni Uriʉ̃ abadaɗeba biɗa cawabiẽ́ basía.* Maʉ̃ awara Ãcõrẽneba beɗeabadarãba poya cawabiɗaẽ́ basía.
7 Maʉ̃ carea Saulba idjiare ɓeaa nãwã jarasia:
–Bẽwãrã jaure ume beɗeabari daubara wẽrãda jʉrʉɗadua, mʉ̃a idjiɗeba cawai carea sãwã oida ɓʉda.–
Maʉ̃ne idjiare ɓeaba panusiɗaa:
–Endor puruɗe daubara wẽrãda ɓʉa.–
8 Ara maʉ̃da Saulora quĩrã awara djiosia ni aɓaʉba idjira cawarãnamãrẽã. Maʉ̃be idjiare ɓeada umé edapeɗa diamasi maʉ̃ wẽrãmaa wãsia. Idjia daubara wẽrãa nãwã jarasia:
–Mʉ̃ djuburia mʉ̃a jarabʉrʉ bẽwãrã jaureda zebidua idji ume beɗeai carea.–
9 Baribʉrʉ daubara wẽrãba panusia:
–¿Cãrẽ cãrẽã bʉa mʉ̃́a mãwã obi ɓʉ? ¿Saulba oɗara bʉa adua ɓʉca? Idjia daubararãda naʉ̃ Israel druaɗebemada jũma ãyã jʉrecuasia. ¿Saulba mʉ̃ra beamãrẽã bʉa mãwã obi ɓʉca?–
10 Maʉ̃ne Saulba Ãcõrẽ quĩrãpita wãrãneba nãwã jarasia:
–Mʉ̃a Ãcõrẽ trʉ̃neba jaraya naʉ̃ obʉrʉ carea bʉra biẽ́ oɗaẽ́da.–
11 Maʉ̃ carea daubara wẽrãba iwiɗisia:
–Mãẽteara ¿bʉa cai jaureda zebi quĩrĩã ɓʉ?–
Saulba panusia:
–Samuel jaureda zebidua.–
12 Ara maʉ̃da daubara wẽrãba Samuel jaureda trʉ̃sia. Samuel jaure unusiɗe mĩãdua ɓiapeɗa Sauloa jarasia:
–Bʉa ¿cãrẽ cãrẽã mʉ̃ra cũrũgasi? ¡Bʉra Saulda jãwã ɓʉa!–
13 Saulba panusia:
–Ne wayarãdua. Bʉa unu ɓʉda mʉ̃́a jaradua.–
Daubara wẽrãba panusia:
–Jaureda egoroɗeba ʉ̃taa zebʉrʉda unu ɓʉa.–*
14 Saulba iwiɗisia:
–Idjira ¿cai zaca ɓʉ?–
Daubara wẽrãba panusia:
–Idjira drõãda ɓʉa. Idjia cacuaɗe jʉ̃ ɓʉra drasoa ɓʉa.–
Maʉ̃ne Saulba cawasia Samuel jaureda mãwã ɓʉda. Maʉ̃ carea idjira chĩrãboroɗe ɓarru coɓesia.
15 Maʉ̃ne Samuel jaureba idjía iwiɗisia:
–¿Cãrẽ cãrẽã bʉa mʉ̃ra mĩã sẽ ɓʉ? ¿Cãrẽ cãrẽã namaa zebisi?–
Saulba panusia:
–Bʉra namaa zebisia mʉ̃a sãwã oida ɓʉda cawa crĩchaẽ́ ɓʉ bẽrã. Pilisteorãra mʉ̃ ume djõne zesiɗaa. Maʉ̃ne Ãcõrẽba mʉ̃ra igara ɓʉa. Mʉ̃a sãwã oida ɓʉ iwiɗibʉrʉɗe idjia cãĩmocaraɗeba cawabicaa. Maʉ̃ awara idjiɗeba beɗeabadarãba poya cawabiɗaẽ́a. Maʉ̃ carea bʉda trʉ̃ ɓʉa mʉ̃a sãwã oida ɓʉda cawabimãrẽã.–
16 Samuel jaureba panusia:
–¿Cãrẽ cãrẽã mʉ̃́a iwiɗi ɓʉ? Ãcõrẽba bʉda igarapeɗa bʉ ume dji quĩrũda ɓesia.
17 Idjia bʉra osia mʉ̃neba jaraɗa quĩrãca. Idjia bʉ israelerã boro baɗada jãrĩpeɗa bʉ ume ɓaɗa Davia diasia.
18 Idjia jaraɗara bʉa ĩjã oẽ́ basía. Bʉa amalecitarãra jũma quenaẽ́ basía idji quĩrũbiɗeba obiɗa quĩrãca.* Maʉ̃ bẽrã iɗi bʉra jãwã o ɓʉa.
19 Maʉ̃ awara Ãcõrẽba bʉda, israelerã siɗa pilisteorãa poyabiya. Nu bʉra, bʉ warrarã siɗa mʉ̃ ume beuɗarã panabadama panania.–
20 Samuel jaureba jaraɗa carea Saulora bio ne wayapeɗa egode ɓaesia. Idjira cacua norraɓari ɓasia ewari aɓa ãsa diamasi biɗa ne coẽ́ ɓaɗa bẽrã.
21 Daubara wẽrã Saul caita wãpeɗa unusia idjira ne wayaaba cacua urea nũmʉda. Maʉ̃ne jarasia:
–Mʉ̃, bʉ nezocaba bʉ beɗeara ĩjãsia. Mʉ̃ beaɗi adua bʉa jaraɗara mʉ̃a jũma osia.
22 Mʉ̃ djuburia ũrĩdua. Mʉ̃a bʉ́a paʉ̃da maãrĩ diaya comãrẽã. Mãwã bʉra waya cacua ʉɓʉaya nocoɗaa wãmãrẽã.–
23 Baribʉrʉ Saulba coẽ́ana asia. Maʉ̃ bẽrã daubara wẽrãba, Sauloare ɓea biɗa jara panesiɗaa ne comãrẽã. Mãwã jara panʉ carea Saulba ne coyaɗa asia. Egode taɓaɗada cʉɗaɗe ʉ̃ta chũmesia.
24 Daubara wẽrãba paca zaque boreguea ɓʉda idji de caita eroɓasia. Maʉ̃ pacara beapeɗa djusia. Idjaɓa harinada bʉratʉpeɗa paʉ̃ dji ẽsãbari neẽ́ ɓʉda ãbusia.
25 Maʉ̃ra Sauloa, idjiare ɓeaa biɗa diasia coɗamãrẽã. Ara maʉ̃ diamasi ne copeɗaɗacarea Saulora idjiare ɓea siɗa jẽda wãsiɗaa.
