1 Samuel 3:1-21
3 Cũdra Samuelba Ãcõrẽ quĩrãpita Elira carebabadjia. Maʉ̃ ewariɗe Ãcõrẽra ẽberãrã ume ara cadrʉa beɗeaca basía. Mãcua cãĩmocara quĩrãca ne unubica basía.
2 Elira dau towa ɓʉ bẽrã bia unuca basía. Ewari aɓa idji cʉɗaɗe cãĩ ɓasia.
3 Maʉ̃ne Samuelera Ãcõrẽ wua deɗe cãĩ ɓasia. Mama Ãcõrẽ baurudeda ɓasia idjaɓa ĩbĩrãra waɗi urua nũmasia.
4 Mãwã ɓʉɗe Ãcõrẽba Samuelera trʉ̃ jarasia:
–¡Samuel!–
Samuelba panusia:
–Nama ɓʉa.–
5 Ara maʉ̃da Eli cãĩ ɓʉmaa pira wãpeɗa nãwã jarasia:
–Nama ɓʉa. ¿Cãrẽ cãrẽã trʉ̃ ɓʉ?–
Eliba panusia:
–Bʉra trʉ̃ẽ́ ɓʉa. Cãĩne wãdua.–
Samuelera jẽda wãpeɗa idji cʉɗaɗe taɓesia.
6 Maʉ̃ne Ãcõrẽba idjira waya trʉ̃ jarasia:
–¡Samuel!–
Ara maʉ̃da Samuelera piradrʉpeɗa Eli ɓʉmaa wãsia. Maʉ̃ne jarasia:
–Nama ɓʉa. ¿Cãrẽ cãrẽã trʉ̃ ɓʉ?–
Eliba panusia:
–Warra, bʉra trʉ̃ẽ́ ɓʉa. Cãĩne wãdua.–
7 Samuelba Ãcõrẽ sãwã beɗeabarida adua ɓasia Ãcõrẽra waɗi idji ume beɗeaca baɗa bẽrã.
8 Maʉ̃be Ãcõrẽba waya Samuelera trʉ̃ jarasia. Ara maʉ̃da Samuelera piradrʉpeɗa Elimaa wãsia. Maʉ̃ne jarasia:
–¿Cãrẽ cãrẽã trʉ̃ ɓʉ?–
Maʉ̃nebʉrʉ Eliba cawasia Ãcõrẽbʉrʉ Samuelera trʉ̃ jara ɓʉda.
9 Maʉ̃ bẽrã idjia Samuelea jarasia:
–Cãĩne wãdua. Baribʉrʉ Ãcõrẽba bʉra waya trʉ̃ jaraibʉrʉ idjía nãwã panudua: “Beɗeadua mʉ̃ Boro, mʉ̃a ũrĩ ɓʉa.”–
Maʉ̃ bẽrã Samuelera jẽda wãpeɗa idji cʉɗaɗe taɓesia.
10 Maʉ̃ne Ãcõrẽra wayacusa zepeɗa Samuelera trʉ̃ jarasia naẽna oɗa quĩrãca:
–¡Samuel! ¡Samuel!–
Samuelba panusia:
–Beɗeadua mʉ̃ Boro, mʉ̃a ũrĩ ɓʉa.–
11 Ãcõrẽba jarasia:
–Dãrãẽ́ne mʉ̃a bãrã israelerãra ʉ̃cʉrʉ bio cawa oya. Maʉ̃ ũrĩbʉdara bio dauperaɗia.
12 Maʉ̃ ewariɗe mʉ̃a Eli, idji ẽberãrã siɗa cawa oi jaraɗara jũma oya.
13 Idji warrarãba mʉ̃ quĩrãpita cadjirua obadara bio cawa ɓʉmĩna idu obi ɓʉa. Maʉ̃ carea mʉ̃a jarasia idji ẽberãrãra ewariza cawa o ɓaida.
14 Mʉ̃a wãrãneba Eli ẽberãrãa jarasia ãdjia cadjirua obadara ni maãrĩ biɗa quĩrãdoaẽ́da. Animarãra mʉ̃́a babue diacuabʉda siɗa waɗibiɗa mʉ̃a quĩrãdoaẽ́a. Ne diabʉda siɗa mʉ̃a quĩrãdoaẽ́a.–
15 Ãcõrẽ beɗeaɗacarea Samuelera idji cʉɗaɗe cãĩ ɓesia. Diapeɗa ʉ̃rʉ̃mapeɗa Ãcõrẽ deɗe eɗa wãbadara ewa nũmʉsia. Baribʉrʉ Samuelba cãĩmocara quĩrãca ũrĩnada Elia jara quĩrĩãẽ́ basía. Waya ɓasia mãwã jaraida.
16 Baribʉrʉ Eliba Samuelera trʉ̃sia:
–¡Warra, Samuel!–
Samuelba panusia:
–Nama ɓʉa.–
17 Maʉ̃ne Eliba iwiɗisia:
–¿Ãcõrẽba bʉ́a cãrẽda jarasi? Idjia jaraɗara ni maãrĩ biɗa mẽrãrãdua. ¡Ãcõrẽba bʉra bio cawa oya idjia jaraɗada mʉ̃́a jũma jaraẽ́bʉrʉ!–
18 Maʉ̃ carea Samuelba Elia jũma jarasia. Ni maãrĩ biɗa mẽrãẽ́ basía. Maʉ̃ne Eliba sopuaba nãwã jarasia:
–Idjidrʉ Ãcõrẽ bẽrã idjia quĩrĩã ɓʉ quĩrãca oida ɓʉa.–
19 Samuel waribʉrʉɗe Ãcõrẽra idji ume ɓasia. Idjia Samuelɗeba jaraɗara jũma obadjia.
20 Maʉ̃ bẽrã jũma israelerãba Daʉ̃ eyaɗeba aɓa Beersebá jeweɗaɗaa cawasiɗaa Samuelera wãrãda Ãcõrẽneba beɗeabarida.
21 Maʉ̃ ewariɗe Ãcõrẽra Siloɗe Samuelma odjapeɗa idji beɗeara cawabibadjia.
