1 Samuel 31:1-13
31 Pilisteorãda israelerã ume djõne wãnapeɗa Guilboa eyaɗe israelerã zocãrã quenasiɗaa. Maʉ̃ bẽrã israelerãra memenesiɗaa.
2 Pilisteorãba Saulora, idji warrarã siɗa caiɗu ẽpẽsiɗaa. Maʉ̃ne Saul warrarã Jonataʉ̃da, Abinadáda, Malquisúa siɗa beasiɗaa.
3 Maʉ̃be Saul ɓʉma auɗuara djõsiɗaa. Enedrʉmaba djõbadaba idjimaa cha drʉ panʉba Saulora sucuasiɗaa.*
4 Maʉ̃ carea idji djõi careabema eronĩbabaría nãwã jarasia:
–Bʉ necora ẽũtapeɗa mʉ̃ra su beadua. Mãwã oẽ́ra jãʉ̃ pilisteorã cacua wẽãgoẽ́ taɓeaba mʉ̃ra jidaɗapeɗa bio pua unubiɗia. Mãwã oɗapeɗa mʉ̃ra necoba su beaɗia.–
Baribʉrʉ Saul djõi careabema eronĩbabariba Saul beaira wayasia. Maʉ̃ carea Saulba idji necoda ʉ̃ta nũmʉpeɗa ʉ̃rʉ̃ ɓaesia iduɓa beui carea.
5 Saul djõi careabema eronĩbabariba maʉ̃ unusiɗe Saul caita aɓari quĩrãca idji neco ʉ̃rʉ̃ su ɓaesia iduɓa beui carea.
6 Mãwã aɓari ewariɗe Saulora, idji warrarãda ũbea, idji djõi careabema eronĩbabarida, idjiare ɓearã siɗa jũma beusiɗaa.
7 Israelerã Guilboa quĩrãpe ɓʉ jeweɗaɗe panabadaba, Jordaʉ̃ do quĩrãrẽ panabada biɗa ũrĩsiɗaa pilisteorãba poyaɗapeɗa Israelɗebema sordaorãda memenesiɗada. Idjaɓa ũrĩsiɗaa Saulora idji warrarã siɗa beasiɗada. Maʉ̃ carea maʉ̃ israelerãra ãdji puruɗebemada ãyã mĩrũ wãcuasiɗaa. Maʉ̃be pilisteorãra zeɗapeɗa maʉ̃ puru ɓeaɗe panesiɗaa.
8 Nurẽma pilisteorãba israelerã quenapeɗaɗamaa wãnapeɗa ãdjia nebia eroɓeaɗara jũma jʉrʉ pe wãsiɗaa. Maʉ̃ne Saulda idji ũbeabema warrarã siɗa Guilboa eyaɗe beu tapanʉda unusiɗaa.
9 Saulora oɓʉá tutaɗapeɗa idjia djõi carea eroɓaɗara edasiɗaa. Maʉ̃be ʉ̃cʉrʉ ãdji druaɗaa diabuesiɗaa Saul beuɗaɗebemada waabema pilisteorãa jaraɗamãrẽã. Maʉ̃ beɗeara ãdji jʉwaba oɗa ãcõrẽ ɓea deɗe, puru quĩrãpita biɗa jarasiɗaa.
10 Maʉ̃be pilisteorãba ne jũma Saulba djõi carea eroɓaɗara ãdji jʉwaba oɗa ãcõrẽ Astarte deɗe eɗa ɓʉsiɗaa. Idji cacuara ʉ̃tʉ jira ɓʉsiɗaa israelerã puru Bet-saʉ̃ mõgaraba auɗu jũrã ca ɓʉɗe.
11 Gala druaɗe israelerã Jabe puruɗebemaba ũrĩsiɗaa sãwã pilisteorãba Saul cacuara osiɗada.
12 Ara maʉ̃da dji sozarra ɓeaba Saul cacuara edaɗe wãsiɗaa. Jũma maʉ̃ diamasi wãbʉdaɗe Bet-saʉ̃ puruɗe jũẽsiɗaa. Maʉ̃be Saul cacuara, dji warrarã cacua siɗa eɗaa edaɗapeɗa jẽda Jabeɗaa enesiɗaa. Mama ãdji cacuara babuesiɗaa.
13 Mãwãnacarea ãdji ɓʉwʉrʉda edaɗapeɗa Jabeɗe bacuru edre jou ɓʉsiɗaa. Maʉ̃be domia aɓa ne coɗaẽ́ basía.
Beɗea eɗaare
^ 31:3 Cha drʉ panʉba Saulora sucuasiɗaa. Hebreo beɗeaɗe mãwã ɓʉ́ ɓʉa. Griegoɗe nãwã ɓʉa: “Saulora bio ne waya ɓesia.”
