1 Samuel 8:1-22
8 8:1-2 Samuelba warrada umé eroɓasia. Dji nabemara Joel abadjiɗaa. Dewarabemara Abías abadjiɗaa. Samuel drõã ɓeɗacarea idji warrarãra israelerã nẽbʉra cawa obadarãda ɓʉsia. Ãdjia Beersebá puruɗe cawa obadjiɗaa.
3 Baribʉrʉ Samuel warrarãra idji quĩrãca jipa nĩbaɗaca basía. Ãtebʉrʉ biara parata awua panasiɗaa. Aɓaʉba paratada diasira maʉ̃ ẽberãare panebadjiɗaa. Maʉ̃ bẽrã jipa cawa oɗaca basía.
4 Maʉ̃ carea Israelɗebema dji dromarãda ãbaa dji jʉreɗapeɗa Ramá puruɗaa Samuel ume beɗeaɗe wãsiɗaa.
5 Samuelea nãwã jarasiɗaa:
–Bʉra drõãda ɓesia idjaɓa bʉ warrarãra bʉ quĩrãca jipa nĩbaɗacaa. Maʉ̃ bẽrã aɓa ɓʉdua dadjirã boroda ɓemãrẽã dewara druaɗe eroɓea quĩrãca.–
6 Mãwã jarabʉdara Samuelba biẽ́ ũrĩna bẽrã Ãcõrẽa iwiɗisia sãwã oida ɓʉ cawaya.
7 Maʉ̃ne Ãcõrẽba nãwã panusia:
–Ãdjirãba jara panʉra jũma odua. Mãwã jara panʉneba bʉda igara panʉẽ́a. Mʉ̃drʉ igara panʉa. Quĩrĩãẽ́ panʉa mʉ̃ra ãdji boro baida.
8 Mʉ̃a ãdjirã Egiptoɗeba ẽdrʉ edaɗaɗeba ʉ̃taa aɓarida obadaa. Ãdjia ara cadrʉa mʉ̃ra igarabadaa dewara ãcõrẽ ɓeada ẽpẽni carea. Ara maʉ̃ quĩrãca bʉda o panʉa.
9 Maʉ̃ carea ãdjirãba jara panʉ quĩrãca aɓa ɓʉdua ãdjirã boroda ɓemãrẽã. Baribʉrʉ maʉ̃ naẽna ãdjirãa ebuɗa jaradua maʉ̃ boroba sãwã o ɓaida.–
10 Jũma Ãcõrẽba jaraɗara Samuelba dji boro iwiɗi panʉrãa nãwã jarasia:
11 –Bãrãba aɓa bãrã boroda ɓʉɗibʉrʉ, idjia nãwã oya: bãrã warrarã cũdra ɓeara zocaya. Idjia ʉ̃cʉrʉ ɓʉcuaya carretaɗeba idjaɓa cawayoɗeba djõnamãrẽã. Dewararãda idji carreta nocoare pira wãbicuaya ẽberãrã oɗebemada ãyã jʉrecuaɗamãrẽã.
12 Ʉ̃cʉrʉ ɓʉcuaya mil sordaorã bororãda ɓeaɗamãrẽã idjaɓa ʉ̃cʉrʉ ɓʉcuaya cincuenta sordaorã bororãda ɓeaɗamãrẽã. Ʉ̃cʉrʉ ɓʉcuaya idji ẽjũã oɗamãrẽã idjaɓa néu ewaɗamãrẽã. Maʉ̃ awara ʉ̃cʉrʉ ɓʉcuaya carretaɗebema idjaɓa djõi careabema oɗamãrẽã.
13 Maʉ̃ awara bãrã cau awẽrã ɓeara zocaya. Ãdjirãra ɓʉcuaya quera oɗamãrẽã, ne djuɗamãrẽã, idjaɓa paʉ̃ ãbuɗamãrẽã.
14 Idjaɓa bãrã ẽjũã dji biara ɓeara, bãrã uva ẽjũã dji biara ɓeara, bãrã olivo ẽjũã siɗa edapeɗa idjiare ɓearãa diacuaya.
15 Maʉ̃ awara bãrãba trigo ewabʉdaɗebemada, uva ewabʉdaɗebema siɗa edaya. Bãrãba ẽ die ewabʉdaza idjia aɓa edapeɗa idjiare ɓearãa diacuaya.
16 Maʉ̃ awara bãrã nezocarã dji umaquĩrãda, dji wẽrã siɗa idji itea edaya. Bãrã pacara, burro siɗa dji biara ɓeada idji itea edaya.*
17 Maʉ̃ awara bãrã ovejaɗebemada, bãrã chiwatuɗebema siɗa edaya. Bãrãba die juachabʉdaza idjia aɓa edaya. Maʉ̃ awara ara bãdjida idji nezocarãda ɓeaɗia.
18 Maʉ̃ ewariɗe bãrã boroba mãwã o ɓʉ carea Ãcõrẽa quĩrã djuburiada iwiɗiɗia baribʉrʉ idjia bãrã beɗeara ũrĩẽ́a.–
19 Samuelba mãwã jaraɗamĩna israelerãba ni maãrĩ biɗa ĩjãnaẽ́ basía. Ãtebʉrʉ nãwã jarasiɗaa:
–Ĩjãnaẽ́a. Dairãba quĩrĩã panʉa aɓa dadjirã boro baida.
20 Mãwã dewara drua ɓeaba ãdji boro eropanʉ quĩrãca dadjirã biɗa eropanania. Maʉ̃ boroba dadjirãra pe eroɓaya. Idjaɓa djõne wãbʉdaɗe idjidrʉ nocoare wãya.–
21 Maʉ̃ ũrĩpeɗa Samuelba ãdji beɗeara jũma Ãcõrẽa jarasia.
22 Maʉ̃ne Ãcõrẽba panusia:
–Ãdjirãba jara panʉ quĩrãca odua. Aɓa ɓʉdua ãdjirã boro bamãrẽã.–
Maʉ̃ bẽrã Samuelba israelerã boroda aɓa ɓʉyaɗa apeɗa jũmarãda ãdji puruza wãbisia.
Beɗea eɗaare
^ 8:16 Bãrã paca. Griego beɗeaɗe mãwã ɓʉ́ ɓʉa. Hebreoɗe ɓʉ́ ɓʉa “bãrã cũdrarã.”
