1 Tesalonica 1:1-10
1 Mʉ̃ra Pauloa. Naʉ̃ cartara ɓʉbʉrʉa djabarã Tesalonica puruɗebemarã itea. Bãrãra dadjirã Zeza Ãcõrẽnea, dadjirã Boro Jesucritoɗea. Djaba Silvanoda, Timoteo siɗa mʉ̃ ume panʉa. Daiba quĩrĩã panʉa dadjirã Zeza Ãcõrẽba, dadjirã Boro Jesucrito biɗa ãdji biaɗeba bãrãra careba pananida, necai ɓai siɗa bãrãa dia pananida.
Djabarãba bia opeɗaɗa
2 Daiba ewariza Ãcõrẽa iwiɗibʉdaɗe bãrã carea bia ɓʉaɗa abadaa.
3 Daiba dadjirã Zeza Ãcõrẽ quĩrãpita ewariza quĩrãneba panʉa bãrãba Ãcõrẽ ĩjã panʉneba biada o panʉda, quĩrĩãneba dji careba panʉda, idjaɓa bia mĩga panʉmĩna dadjirã Boro Jesucritoba nebia diamãrẽã jʉ̃ã panʉra quenatʉɗaẽ́ panʉda.
4 Djabarã, Ãcõrẽba bãrãra bio quĩrĩã ɓʉa. Daiba cawa panʉa idjia bãrãra edasida.
5 Daiba beɗea bia Critoɗebema bãrãa jaradiasiɗaɗe ara jãwã beɗeaɗaẽ́ basía. Ãtebʉrʉ maʉ̃ beɗeara wãrã arada cawa panʉ bẽrã Ãcõrẽ Jaure ʉɓʉaɗeba beɗeasiɗaa. Bãrãba cawa panʉa daira sãwã bãrã tãẽna nĩbasiɗada bia pananamãrẽã.
6 Ara maʉ̃ quĩrãca bãrãba ẽpẽsiɗaa. Dadjirã Boro nĩbaɗa quĩrãca ẽpẽsiɗaa. Bãrãra bio bia mĩga panʉmĩna Ãcõrẽ Jaureba ɓʉsriɗa dia ɓʉɗeba beɗea Critoɗebemara ĩjãsiɗaa.*
7 Mãwã jũma Crito ĩjã ɓea Macedonia druaɗebemaba, Acaya druaɗebema biɗa bãrãneba unusiɗaa sãwã nĩbaɗida panʉda.
8 Ãdjirã awa bãrãneba dadjirã Boro beɗeara ũrĩnaẽ́ basía, ãtebʉrʉ druazabemaba cawasiɗaa bãrãba Ãcõrẽra ĩjã panʉda. Maʉ̃ bẽrã ¿daiba bãrãnebemada cãrẽda jaraɗi?
9 Ãdjirãbʉrʉ jara panʉa sãwã bãrãba daira bia edasiɗada, idjaɓa jʉwaba oɗa ãcõrẽ ɓeara igarasiɗada Ãcõrẽ wãrãda zocai ɓʉ ĩjãni carea.
10 Ãdjirãba jara panʉa sãwã bãrãba Ãcõrẽ Warra Jesu bajãneba zeida jʉ̃ã panʉda. Ara maʉ̃ Jesuda Ãcõrẽba ʉ̃rẽbabisia. Idjia dadjirãra Ãcõrẽba cawa oɗe zeiɗebemada ẽdrʉ edasia.
Beɗea eɗaare
^ 1:6. Hecho 17:1-10.
