1 Tesalonica 3:1-13
3 3:1-2 Daiba waa poya droaɗaẽ́ bẽrã crĩchasiɗaa daduɓa Atena puruɗe panʉmisa djaba Timoteoda bãrãmaa wãida. Ara maʉ̃da idjira diabuesiɗaa Crito biara ĩjã panʉneba zarea ɓeaɗamãrẽã. Ãcõrẽ nezoca Timoteoba dai ume aɓari beɗea bia Critoɗebemada jaradiabaria.*
2 –
3 Maʉ̃ awara idjira diabuesiɗaa bãrã bia mĩga panʉne jũmawãyã crĩcharãnamãrẽã. Bãrãba cawa panʉa Crito ĩjã panʉ carea dadjirãra bia mĩgaɗida panʉda.
4 Bãrã ume panasiɗaɗe daiba jarabadjiɗaa ẽberãrãba dadjirãra bia mĩgabiɗida. Bãrãba cawa panʉa maʉ̃gʉra wãrãda mãwãsida.
5 Maʉ̃ carea mʉ̃a waa poya droaẽ́ bẽrã Timoteora bãrãmaa diabuesia waɗi Critora ĩjã panʉ cawaya. Mʉ̃a crĩchasia ãĩbẽrã diauruba bãrãa Critora igarabisida. Mãwãnabara daiba bãrãa Critoɗebema jaradiapeɗaɗara ara jãwã ɓecasia.
6 Baribʉrʉ Timoteora bãrãma ɓaɗada daima jũẽsia. Bãrãba Crito ĩjã panʉnebemada, bãrã quĩrĩãnebema siɗa idjia mĩã biya jaraɗe zesia. Idjia jarasia bãrãba quĩrĩãneba waɗibiɗa daira quĩrãnebabadada idjaɓa unu quĩrĩã panʉda daiba bãrã unu quĩrĩã panʉ quĩrãca.
7 Maʉ̃ba djabarã, daiba cawasiɗaa bãrãba Jesura waɗi ĩjã panʉda. Maʉ̃ bẽrã daira bia mĩga panʉmĩna sobiasiɗaa.
8 Iɗibʉrʉ daira wãrãda so aduá panesiɗaa, cawa panʉ bẽrã bãrãba waɗibiɗa dadjirã Borora ĩjã panʉda.
9 Bãrã carea daira Ãcõrẽ quĩrãpita bio ɓʉsriɗa panʉa. Jãcua ɓʉsriɗa panʉ bẽrã Ãcõrẽa bia ɓʉaɗa abʉdaɗe waɗibiɗa maʉ̃ra cʉrebae ɓʉa.
10 Ãsa, diamasi biɗa daiba Ãcõrẽa iwiɗibadaa bãrã acʉɗe wãni carea. Mãwã bãrãba Critoɗebema waɗi adua panʉra daiba poya jaradiaɗia jũma daucha ĩjãnamãrẽã.
11 Daiba dadjirã Zeza Ãcõrẽa, dadjirã Boro Jesua iwiɗi panʉa bãrãmaa wayacusa wãbiɗamãrẽã.
12 Daiba quĩrĩã panʉa dadjirã Boroba bãrãra careba ɓaida jũmarã ume biara dji quĩrĩã ɓeaɗamãrẽã daiba bãrã bio quĩrĩã panʉ quĩrãca.
13 Idjaɓa iwiɗi panʉa Critoba bãrãra careba ɓaida soɗeba bio ĩjãnamãrẽã. Mãwã dadjirã Boro Jesura jũma idjiɗerã ume zebʉrʉɗe bãrãra dadjirã Zeza Ãcõrẽ quĩrãpita biya ɓeaɗia biẽ́ jaraɗi neẽ́.
Beɗea eɗaare
^ 3:1-2. Ãcõrẽ nezoca. Griego beɗeaɗe ʉ̃cʉrʉ cartaɗe ɓʉ́ ɓʉa “Ãcõrẽ ume trajabari.”
