1 Tesalonica 4:1-18
4 Maʉ̃ awara djabarã, daiba bãrãa jaradiasiɗaa sãwã Ãcõrẽ quĩrãpita nĩbaɗida panʉda idjia bia unumãrẽã. Dadjirã Boro Jesuɗeba daiba bãrãa beɗea djuburiaɗia ara maʉ̃ quĩrãca nĩbaɗamãrẽã. Wãrãda bãrãba mãwã o panʉa, baribʉrʉ biara oɗadua.
2 Dadjirã Boro Jesuɗeba daiba jaradiapeɗaɗada bãrãba cawa panʉa.
3 Ãcõrẽba quĩrĩã ɓʉa bãrãra idji itea bia ɓeaɗida. Maʉ̃ bẽrã auɗuada orãnadua.
4 Bãrã cacuara jipa cawa eroɓeaɗadua Ãcõrẽ quĩrãpita, ẽberãrã quĩrãpita biɗa bia ɓeaɗamãrẽã.
5 Naʉ̃ djaraba cadjirua o awua ɓʉra orãnadua Ãcõrẽ adua ɓeaba obada quĩrãca.*
6 Maʉ̃gʉɗeba djabarãda biẽ́ orãnadua idjaɓa cũrũgarãnadua. Jũma maʉ̃gʉra dadjirã Boroba cawa oya daiba bãrãa jarapeɗaɗa quĩrãca.
7 Ãcõrẽba dadjirãra edaẽ́ basía cadjiruaɗe ɓeaɗamãrẽã, ãtebʉrʉ edasia idji itea bia ɓeaɗamãrẽã.
8 Maʉ̃ igara ɓʉba ẽberãba jaraɗada igaraẽ́ ɓʉa, ãtebʉrʉ Ãcõrẽba jara ɓʉda igara ɓʉa. Ara maʉ̃ Ãcõrẽba idji Jaureda bãrãa diasia cadjirua neẽ́ ɓeaɗamãrẽã.
9 Maʉ̃ awara bãrãra sãwã djabarã ume dji quĩrĩãnida panʉda mʉ̃a naʉ̃ cartaɗe ¿cãrẽã ɓʉi? Ãcõrẽbʉrʉ bãrãa maʉ̃ra jaradiasia.
10 Bãrãba jũma djabarã Macedonia druaɗebemara mãwã quĩrĩã panʉa. Baribʉrʉ djabarã, daiba bãrãa beɗea djuburiaɗia biara dji quĩrĩã ɓeaɗamãrẽã.
11 Idjaɓa jʉrʉɗadua jũmarã ume necai duanani carea. Djãrã nẽbʉraɗe ɓearãnadua. Bãrã jʉwaba trajaɗadua daiba jarapeɗaɗa quĩrãca.
12 Mãwãbʉrʉ bãrãba ne eroɓeaɗia idjaɓa Jesu ĩjãẽ́ ɓeaba bãrãra bia ununia.
Jesu ume ãbaa dji jʉreɗiɗebema
13 Djabarã, daiba quĩrĩã panʉa bãrãba Jesu ĩjã ɓea jaiɗapeɗaɗaɗebemada cawaɗida. Mãwã bãrãra sopuaɗaẽ́a Ãcõrẽ ĩjãẽ́ ɓea sopuabada quĩrãca. Ãdjirãra sopuabadaa dji beupeɗaɗara sãwãbʉrʉ duananida cawaɗaẽ́ bẽrã.
14 Baribʉrʉ dadjirãba Jesura beu ɓaɗada ʉ̃rẽbasida ĩjã panʉa. Maʉ̃ bẽrã cawa panʉa Jesu ĩjã ɓea jaiɗapeɗaɗara Ãcõrẽba jũma ʉ̃rẽbabida idji ume ɓeaɗamãrẽã.*
15 Maʉ̃ carea dadjirã Boroba jaraɗara daiba bãrãa jarabʉdaa: dadjirã Boro zebʉrʉɗe dadjirã, dji waɗi zocai ɓeara dji jaiɗapeɗaɗa na idjimaa wãnaẽ́a.
16 Bajãnaa dadjirã Borora beɗeabʉrʉda jĩgua ũrĩnia, bajãnebema nezoca dji droma siɗa beɗeabʉrʉda ũrĩnia, idjaɓa Ãcõrẽ cachiru jĩgua siɗa ũrĩnia. Maʉ̃ne dadjirã Borora bajãneba zeya. Idji ĩjã ɓea jaiɗapeɗaɗada naãrã ʉ̃rẽbaɗia.
17 Ara maʉ̃da dadjirã, dji zocai ɓeara, ãdjirã ume ãbaa ʉ̃taa wãnia dadjirã Boro ume jʉ̃rãrãne dji ununi carea. Maʉ̃be dadjirã Boro ume ewariza duanania.
18 Maʉ̃ beɗeaba bãrãra dji sobiabiɗadua.
