1 Tesalonica 5:1-28
5 Djabarã, mʉ̃a naʉ̃ cartaɗe ɓʉẽ́a sãʉ̃be dadjirã Borora zeida.
2 Bãrãba bio cawa panʉa dadjirã Boroba cawa oi ewarira cawaẽ́ne zeida diamasi ne drʉabari zebari quĩrãca.
3 Ẽberãrãba nãwã jara panania: “Jũma necai nũmʉa, dauperaɗira neẽ́a.” Mãwã panʉne cawaẽ́ne ãdjirã jũma ãrĩ ewarira zeya wẽrã ɓiogoa ɓʉ cawaẽ́ne puabari quĩrãca. Maʉ̃ne ãdjirãra ni aɓaʉda ẽdrʉɗaẽ́a.
4 Baribʉrʉ djabarã, bãrãra pãĩmane ɓeaẽ́a. Maʉ̃ bẽrã dadjirã Boroba cawa oɗe zebʉrʉ ewariɗe bãrãra dauperaɗaẽ́a ne drʉabari zebʉrʉɗe dauperabada quĩrãca.
5 Jũma bãrãra ʉ̃naanebemaa, ãsabemaa. Dadjirãra diamasibemaẽ́a, pãĩmanebemaẽ́a.
6 Maʉ̃ bẽrã dadjirãra cãĩ ɓeaɗaẽ́a dewararã cãĩ ɓea quĩrãca, ãtebʉrʉ dau ʉɓʉa ɓeaɗia, quĩrãcuita jipa ɓeaɗia.
7 Cãĩ ɓeara diamasi cãĩ ɓeaa, beu nĩmira diamasi beu nĩa.
8 Baribʉrʉ dadjirãra ãsabema bẽrã quĩrãcuita jipa ɓeaɗida panʉa. Critora ĩjã pananida panʉa, dji quĩrĩã ɓeaɗida panʉa, idjaɓa Ãcõrẽba cawa oiɗebema ẽdrʉɗira jʉ̃ã pananida panʉa. Mãwã ara dadjida cadjiruaɗebemada jũãtrʉ ɓeaɗia sordaoba idji jãare ne zareaba jũãtrʉbari quĩrãca, idji boro siɗa ne zareaba jũãtrʉbari quĩrãca.
9 Ãcõrẽba dadjirãra trʉ̃ẽ́ basía cawa oi carea, ãtebʉrʉ trʉ̃sia dadjirã Boro Jesucritoɗeba ẽdrʉɗamãrẽã.
10 Idjira dadjirã carea beusia. Maʉ̃ bẽrã dadjirãda zocai ɓeaɗibʉrʉ wa beuɗibʉrʉ, idji zebʉrʉɗe idji ume ãbaa zocai panania.
11 Maʉ̃ carea dji sobiabiɗadua. Idjaɓa dji carebaɗadua biara ĩjãni carea bãrãba o panʉ quĩrãca.
Pauloba djabarãa jĩrũare jaradiaɗa
12 Maʉ̃ awara djabarã, daiba beɗea djuburiaɗia djabarã bãrã tãẽna Ãcõrẽ traju o panʉda bio wayaɗamãrẽã. Ãdjirãra dadjirã Boro Jesucritoɗeba bãrã bororãa. Bãrãra sãwã nĩbaɗida panʉda jaradiabadaa.
13 Ãdjiɗebemada bia crĩchaɗadua. Ãdjia o panʉ carea bio quĩrĩãnadua. Jũmarã ume bia duananadua.
14 Djabarã, daiba jaraɗia bãrã tãẽna djuburia ɓeara quẽãnamãrẽã. Soɗe ɓʉsriɗaẽ́ ɓeara sobiabiɗadua. Soɗe ʉɓʉaẽ́ ɓeara carebaɗadua. Jũmarã ume droaɗadua.
15 ¡Ũrĩnadua! Aɓaʉba bãrãda biẽ́ osira idjida aɓarica biẽ́ orãnadua. Ãtebʉrʉ ewariza bãdjiza biadrʉ oɗadua. Jũmarã ume bia oɗadua.
16 Ne jũmane ɓʉsriɗa ɓeaɗadua.
17 Ʉ̃nãũnaẽ́ Ãcõrẽa iwiɗi pananadua.
18 Ne jũma carea Ãcõrẽa bia ɓʉaɗa aɗadua. Maʉ̃drʉ Ãcõrẽba quĩrĩã ɓʉa, bãrãra Jesucrito ĩjã ɓea bẽrã.
19 Ãcõrẽ Jaureba o ɓʉra idu obi ama ɓearãnadua.*
20 Ãcõrẽneba beɗeabariba jara ɓʉra igararãnadua.
21 Jũma maʉ̃ra quĩrãcuita ũrĩnadua, maʉ̃be aɓabe dji wãrãdrʉ ĩjãnadua.
22 Ni maãrĩ biɗa cadjiruara orãnadua.
23 Mʉ̃a quĩrĩã ɓʉa dadji necai ɓai diabari Ãcõrẽba bãrãra biara o wãida ne jũmane idji itea bia ɓeaɗamãrẽã. Mʉ̃a quĩrĩã ɓʉa Ãcõrẽba bãrã jaureda, bãrã crĩchada, bãrã cacua siɗa jũma wagaida. Mãwã dadjirã Boro Jesucrito zebʉrʉɗe bãrãra ni maãrĩ biɗa biẽ́ jaraɗi neẽ́ ɓeaɗia.
24 Bãrã Trʉ̃nara beɗea aɓa ɓʉ bẽrã jũma maʉ̃gʉra oya.
Pauloba jĩrũare ɓʉɗa
25 Djabarã, dai carea Ãcõrẽa iwiɗiɗadua.
26 Wãrã quĩrĩãneba jũma djabarãa nãwã jaraɗadua: daiba quĩrĩã panʉa bãrãra bia duananida.*
27 Mʉ̃a dadjirã Boroɗeba jaraya: naʉ̃ cartara jũma djabarã quĩrãpita leɗadua.
28 Mʉ̃a quĩrĩã ɓʉa dadjirã Boro Jesucritoba idji biaɗeba bãrãra careba ɓaida.
