1 Timoteo 1:1-20
1 Mʉ̃ra Pauloa, Jesucritoba diabueɗaa. Ãcõrẽ dadji Ẽdrʉ Edabariba dadji Boro Jesucrito ume mʉ̃ra mãwã ɓʉsiɗaa. Ara maʉ̃ Jesucritoɗeba dadjira wãrãda bia ɓeaɗida cawa panʉa.
2 Timoteo, mʉ̃a naʉ̃ cartara bʉ itea ɓʉbʉrʉa. Mʉ̃neba Critora ĩjãna bẽrã bʉra wãrãda mʉ̃ warraca ɓʉa. Mʉ̃a quĩrĩã ɓʉa dadji Zeza Ãcõrẽba dadji Boro Jesucrito biɗa quĩrã djuburia pananida, ãdji biaɗeba careba pananida, idjaɓa necai ɓai siɗa dia pananida.
Ãĩ jaradia ɓeaa idu jaradiabirãdua
3 Macedonia druaɗaa wãi naẽna mʉ̃a bʉ́a beɗea djuburiasia Epesoɗe ɓemãrẽã. Mãwã osia bʉa quĩrã awara jaradia ɓeaa waa idu jaradiabirãmãrẽã.
4 Ãdjirãa jaradua drõã naẽnabema nẽbʉrʉbadara, dadji drõã naẽnabemarã trʉ̃ zocãrã jaradiabada siɗa waa jaradiarãnamãrẽã. Maʉ̃ba aɓabe caicaya duanebibaria. Dadjirãra carebacaa Ãcõrẽba obi ɓʉda oɗamãrẽã. Aɓabe idji beɗea ĩjã panʉneba poya oɗia.
5 Mʉ̃a mãwã jara ɓʉa djabarãba crĩcha biaɗeba, sobiaɗeba, wãrãda Ãcõrẽ ĩjã panʉneba dji quĩrĩã duananamãrẽã.
6 Baribʉrʉ ʉ̃cʉrʉra maʉ̃nebemada ãĩ wãsiɗaa. Maʉ̃be baridua beɗea dadji carebacada ẽpẽsiɗaa.
7 Ãdjirãra Ãcõrẽba Moisea diaɗa ley jaradiabadada ɓa quĩrĩã panʉa, baribʉrʉ bio cawa panʉ quĩrãca jaradiabadamĩna adua panʉa cãrẽda jaradia panʉda.
8 Dadjirãba cawa panʉa maʉ̃ leyra biada. Baribʉrʉ ariɗe jaradiaɗida panʉa.
9 Maʉ̃ bẽrã cawaɗida panʉa Ãcõrẽba maʉ̃ leyra diaẽ́ basida dji jipa o ɓea carea, ãtebʉrʉ diasia dji ĩjã oɗaca carea, cʉwʉrʉ zarea ɓea carea, Ãcõrẽ neẽ́ ɓea carea, cadjirua o ɓea carea, Ãcõrẽ wayaɗaca carea, Ãcõrẽ igarabada carea, ãdji djibarirã beabada carea, mĩã beabada carea,
10 daunemabada carea, ara ãdji aɓaricarã ume mĩã perada obada carea, djãrã nẽdobuebada carea, sewaiɗa ɓea carea, sewaɗeba djãrã biẽ́ jarabada carea, idjaɓa wãrã beɗeaba jara ɓʉra oɗaca carea.
11 Beɗea bia quiru Ãcõrẽnebemaba maʉ̃ wãrã beɗeara cawabi ɓʉa. Dadji Ãcõrẽ bia quiruba maʉ̃ra mʉ̃́a diasia jaradia ɓamãrẽã.
Ãcõrẽba Paulo quĩrã djuburiaɗa
12 Dadjirã Boro Jesucritoba mʉ̃́a ʉɓʉada diasia idji beɗea jaradia ɓamãrẽã. Idjia cawasia mʉ̃a ne jũmada jipa oida. Maʉ̃ bẽrã mʉ̃ra ɓʉsia idjia quĩrĩã ɓʉda o ɓamãrẽã. Maʉ̃ carea mʉ̃a idjía bia ɓʉaɗa aya.
13 Naẽna mʉ̃a idjiɗebemada biẽ́ beɗeabadjia idjaɓa idjiɗerãda biẽ́ oi carea ẽpẽbadjia. Djãrãa biẽ́ beɗeabadjia. Baribʉrʉ idjia mʉ̃ra quĩrã djuburiasia. Idjida waɗi ĩjãẽ́ ɓaɗa bẽrã adua ɓʉɗeba mãwã biẽ́ obadjia.
14 Dadjirã Boro Jesucritoba idji biaɗeba mʉ̃ra bio carebasia idjida ĩjãmãrẽã idjaɓa idji quĩrĩãda eroɓamãrẽã.
15 Naʉ̃ beɗeara wãrã ara bẽrã jũmarãba ĩjãnida panʉa: Jesucritora naʉ̃ ẽjũãnaa zesia cadjirua obadarã ẽdrʉ edai carea. Cadjirua obadarãnebemada mʉ̃drʉ dji cadjiruaara ɓasia.
16 Baribʉrʉ Ãcõrẽba mʉ̃ra quĩrã djuburiasia. Mãwã Jesucritoba mʉ̃, dji cadjiruaara ɓaɗaɗeba unubisia idjia jũma bia droa ɓʉda. Mʉ̃neba dji waɗi ĩjãẽ́ ɓeaa cawabisia sãwã ẽberã cadjiruara quĩrã djuburiabarida zocai ɓai jõcada eroɓeaɗamãrẽã.
17 Ãcõrẽda ewariza jũmarã Boroa. Idjira beucaa. Dadjirãba ununacaa. Aɓabe idjidrʉ ɓʉa.* Idjíabʉrʉ dadjirãba ewariza bia beɗeaɗida panʉa idjaɓa wayaɗida panʉa. Bia ɓʉa mãwã ɓaida.
18 1:18-19 Mʉ̃ warra Timoteo, bʉa oida ɓʉra mʉ̃a jara ɓʉbʉrʉa. Ãcõrẽneba bʉɗebema jarapeɗaɗara quĩrãnebadua. Mãwã Crito ĩjã ɓʉɗeba, crĩcha biaɗeba bʉa wãrã beɗeara waga eroɓaya bia djõ ɓʉ quĩrãca. Ʉ̃cʉrʉba crĩcha bia eroɓeaɗada igaraɗapeɗa ãdjia Crito ĩjã panʉra idu ɓʉsiɗaa.
20 Maʉ̃gʉ ẽberãrãnebemarã aɓa Himeneo basía. Aɓara Alejandro basía. Ãdjira mʉ̃a diauru jʉwaɗe ɓʉsia cawaɗamãrẽã Ãcõrẽnebemada waa biẽ́ beɗeaɗiẽ́ panʉda.
Beɗea eɗaare
^ 1:17. Aɓabe idjidrʉ ɓʉa. Griego beɗeaɗe ʉ̃cʉrʉ cartaɗe ɓʉ́ ɓʉa: “Aɓabe idjidrʉ ne cawa ɓʉ Ãcõrẽa.”
