1 Timoteo 2:1-15
2 Naʉ̃da biara jaraya: jũma ẽberãrã carea djabarãba Ãcõrẽa beɗea djuburiaɗida panʉa, carebamãrẽã iwiɗiɗida panʉa, idjaɓa bia ɓʉaɗa aɗida panʉa.
2 Jũma naʉ̃ ẽjũãnebema bororã carea, zarra ɓea carea biɗa Ãcõrẽa iwiɗiɗida panʉa dadjirãra necai ɓeaɗi carea, aduá ɓeaɗi carea, Ãcõrẽ waya ɓeaɗi carea, idjaɓa ne jũmane jipa ɓeaɗi carea.
3 Mãwã iwiɗi pananida bia ɓʉa. Ãcõrẽ dadji Ẽdrʉ Edabariba maʉ̃gʉra bia unu ɓʉa.
4 Idjia quĩrĩã ɓʉa jũmarãba wãrã beɗeada cawaɗapeɗa cadjiruaɗebemada ẽdrʉɗida.
5 Ãcõrẽra aɓabʉrʉ ɓʉa. Idjaɓa ẽberãrã Ãcõrẽ ume bia ɓʉbarida aɓabʉrʉ ɓʉa. Maʉ̃ ẽberãra Jesucritoa.
6 Ara idjida idu beabisia jũma ẽberãrãda ẽdrʉ ɓʉi carea. Ãcõrẽba ɓʉɗa ewariɗe Jesucritoba maʉ̃ra cawabisia.
7 Maʉ̃ carea mʉ̃ra idji beɗea jarabarida ɓʉsia. Mʉ̃ra idjia diabueɗada ɓʉsia wãrã beɗea idji ĩjãnida panʉnebemada judiorãẽ́a jaradiaɗe wãmãrẽã. Mʉ̃a wãrã beɗeada jara ɓʉa.* Sewada oẽ́ ɓʉa.
8 Djabarã ãbaa dji jʉrebʉdaza mʉ̃a quĩrĩã ɓʉa umaquĩrãrãba crĩcha biaɗeba Ãcõrẽa iwiɗiɗida. Maʉ̃ne quĩrũ ɓeaɗiẽ́ panʉa, caicaya ɓeaɗiẽ́ panʉa.*
9 Mʉ̃a quĩrĩã ɓʉa wẽrãrãra quĩrãipa, ariɗe djioɗida. Ãdji buɗara jũmawãyã biya eruɗiẽ́ panʉa. Oroda wa neta nẽbʉa ɓeada jũmawãyã pẽũniẽ́ panʉa.* Djio nẽbʉa ɓʉ siɗa jʉ̃niẽ́ panʉa.
10 Ãtebʉrʉ Ãcõrẽ waya ɓea bẽrã wẽrãrãba bia o panʉneba bio djio panʉ quĩrãca ɓeaɗida panʉa.
11 Djabarã ãbaa dji jʉre panʉne wẽrãrãba chupea ũrĩnida panʉa idjaɓa dji bororãda waya ɓeaɗida panʉa.
12 Ãbaa dji jʉrebʉdaɗe mʉ̃a iduaribicaa wẽrãba jaradia ɓaida wa umaquĩrãda idji jʉwaeɗa eroɓaida. Ãtebʉrʉ wẽrãba chupea ũrĩ ɓaida ɓʉa.
13 Mãwã ɓaida ɓʉa Ãcõrẽba Adaʉ̃da naãrã oɗa bẽrã. Mãwãnacarea Evada osia.
14 Maʉ̃ awara diauruba Adaʉ̃ra cũrũgaẽ́ basía, ãtebʉrʉ wẽrãda cũrũgasia. Cũrũgasiɗe wẽrãba cadjiruada osia.
15 Baribʉrʉ warra to panʉneba wẽrãrãra ẽdrʉɗia Critoda ĩjã pananibʉrʉ, wãrã quĩrĩãda eropananibʉrʉ, idjaɓa Ãcõrẽ itea bia pananibʉrʉ. Jũma maʉ̃gʉra quĩrãipa ẽpẽnida panʉa.*
Beɗea eɗaare
^ 2:7. Mʉ̃a wãrã beɗeada jara ɓʉa. Griego beɗeaɗe ʉ̃cʉrʉ cartaɗe nãwã ɓʉ́ ɓʉa: “Mʉ̃ra Critoɗe bẽrã wãrã beɗeada jara ɓʉa.”
^ 2:8. Ãcõrẽa iwiɗiɗida. Griego beɗeaɗe ɓʉ́ ɓʉa: “Jʉwa ʉ̃taa waɗida.” Maʉ̃ ewariɗe ẽberãrãba jʉwa ʉ̃taa wabadjiɗaa Ãcõrẽa iwiɗibʉdaɗe. Maʉ̃ bẽrã eɗauɗe Ãcõrẽa iwiɗiɗiaɗa aɗi cãyãbara jarabadjiɗaa: “Jʉwa ʉ̃taa waɗia.”
^ 2:9. Neta nẽbʉa ɓea. Griego beɗeaɗe ɓʉ́ ɓʉa “perla.”
^ 2:15. Maʉ̃ versículoba jara ɓʉra ebuɗa ɓʉẽ́a. Ãcõrẽ Beɗea bio cawa ɓeamaarã Pauloba cawabi ɓasia wẽrãrãda dji bororãẽḿĩna bia ɓeada. Idjia jaraẽ́ basía warrarãda toɗida panʉda ẽdrʉɗi carea.
