1 Timoteo 3:1-16
3 Naʉ̃ beɗeara wãrã araa: aɓaʉda djabarã wagabarida ɓa quĩrĩã ɓʉbʉrʉ, biada o quĩrĩã ɓʉa.*
2 Maʉ̃ bẽrã djabarã wagabarira biẽ́ jaraɗi neẽ́ ɓaida ɓʉa, quima aɓa eroɓaida ɓʉa, jũmawãyã ɓaiẽ́ ɓʉa, crĩcha biaɗeba ɓaida ɓʉa, quĩrãipa ɓaida ɓʉa, idji deɗe jũẽbʉdara bia edaida ɓʉa, idjaɓa jaradia cawa ɓaida ɓʉa.
3 Idjira beu nĩbaiẽ́ ɓʉa. Quĩrũbi jʉrʉya ɓaiẽ́ ɓʉa, ãtebʉrʉ aduá ɓaida ɓʉa. Jũmarã ume necai ɓaida ɓʉa. Paratada awua ɓaiẽ́ ɓʉa.
4 Idji deɗebemarãra bio waga cawa ɓaida ɓʉa, idji warrarãra cʉwʉrʉ ĩjã eroɓaida ɓʉa, idjaɓa ãdjirãba idjira wayaɗida panʉa.
5 Ara idji deɗebemarãda waga adua ɓʉbʉrʉ, ¿sãwã Ãcõrẽ ẽberãrãda bia wagai?
6 3:6-7 Crito ĩjãẽ́ ɓea biɗa idjiɗebemada bia crĩchaɗida panʉa. Mãwã ẽberãrãba idjiɗebemada biẽ́ beɗeaɗaẽ́a idjaɓa diauruba idjira ẽberãrã quĩrãpita biẽ́ ɓʉẽ́a. Ãcõrẽ beɗea ĩjãna djiwiɗi ɓʉra djabarã wagabarida ɓaiẽ́ ɓʉa dji dromada crĩcharãmãrẽã. Mãwã crĩchasira Ãcõrẽba idjira cawa oya diauru cawa oɗa quĩrãca.
7 –
Djabarã carebabari sãwã ɓaida ɓʉ
8 Ara maʉ̃ quĩrãca djabarã carebabada siɗa jipa nĩbaɗida panʉa ẽberãrãba wayaɗamãrẽã.* Ãdjirãba sewada o ɓeaɗiẽ́ panʉa, beu nĩbaɗiẽ́ panʉa, idjaɓa paratada awua ɓeaɗiẽ́ panʉa.
9 Dadjia ĩjã panʉ beɗea Ãcõrẽba cawabiɗara crĩcha biaɗeba bio wagaɗida panʉa.
10 Djabarã carebabada ɓʉɗi naẽna bio quĩrãcuita acʉɗida panʉa. Maʉ̃be biẽ́ jaraɗi neẽ́ ɓeabʉrʉ, djabarã carebabadada ɓeaɗida panʉa.
11 Aɓari quĩrãca ãdji quima siɗa jipa nĩbaɗida panʉa ẽberãrãba wayaɗamãrẽã.* Nẽbʉra o ɓeaɗiẽ́ panʉa. Jũmawãyã ɓeaɗiẽ́ panʉa ãtebʉrʉ ne jũmane jipa ɓeaɗida panʉa.
12 Djabarã carebabariba wẽrãda aɓa eroɓaida ɓʉa. Idji warrarãra, idji deɗebemarã siɗa bio waga cawa ɓaida ɓʉa.
13 Djabarã carebabadaba oɗida panʉra jipa oɗibʉrʉ, jũmarãba ãdjirãnebemada bia beɗeaɗia. Mãwã ne wayaa neẽ́ ãdjirãba Jesucrito ĩjã panʉnebemada poya beɗeaɗia.
Wãrã beɗea Ãcõrẽba cawabiɗa
14 3:14-15 Mʉ̃ra isabe bʉ acʉɗe wã quĩrĩã ɓʉa. Mãwãmĩna mʉ̃ra dãrãisicada. Maʉ̃ bẽrã naʉ̃ cartara bʉ itea ɓʉbʉrʉa Ãcõrẽ ẽberãrãra sãwã ãbaa ɓeaɗida panʉda cawamãrẽã. Dadjirãra Ãcõrẽ zocai ɓʉ ẽberãrãa. Idji wãrã beɗeara quĩrãcuita jaradiabadaa ni aɓaʉba quĩrã awara jaradiarãnamãrẽã.*
16 Wãrãda Ãcõrẽba naʉ̃ beɗea cawabiɗara bio bia ɓʉa:
Critora naʉ̃ djaraɗe zesia.
Ãcõrẽ Jaureba cawabisia idjira jipa ɓʉda.
Bajãnebema nezocarãba idjira unusiɗaa.
Djabarãba idjiɗebemada judiorãẽ́ma jaradiasiɗaa.
Zocãrãba naʉ̃ ẽjũãne idjira ĩjãsiɗaa.
Ãcõrẽba idjira bajã bia quiruɗe wayacusa edasia.
Beɗea eɗaare
^ 3:1. Djabarã wagabari. Griego beɗeaɗe ɓʉ́ ɓʉa “dji acʉbari.” Cãpũrĩã beɗeaɗe biara “pastor” jarabadaa.
^ 3:8. Djabarã carebada. Griego beɗeaɗe ɓʉ́ ɓʉa “nezoca.” Cãpũrĩã beɗeaɗe biara “diacono” jarabadaa.
^ 3:11. Ãdji quima. Griego beɗeaɗe ɓʉ́ ɓʉa “wẽrãrã.” Ʉ̃cʉrʉmaarã djabarã carebabada quimarãda jara ɓʉa idjaɓa ʉ̃cʉrʉmaarã djabarã carebabada dji wẽrãrãda jara ɓʉa.
^ 3:14-15. Wãrã beɗeara quĩrãcuita jaradiabadaa. Griego beɗeaɗe nãwã ɓʉ́ ɓʉa: “Dadjirãra wãrã beɗea de jĩrũa, de edrebemaa.”
