1 Timoteo 4:1-16
4 Ãcõrẽ Jaureba ebuɗa jara ɓʉa naʉ̃ jĩrũarebema ewariɗe ʉ̃cʉrʉba Crito ĩjã pananara igaraɗapeɗa jai cũrũgaya ɓeada, ãdjia jaradiabi panʉ siɗa ẽpẽnida.
2 Maʉ̃ jairãba jaradiabi panʉra ẽberãrã dji biaca ɓea sewaiɗa ɓeaba jaradiabadaa. Cadjirua obadaɗeba maʉ̃ ẽberãrã crĩchara jũma ãrĩ ɓeaa.
3 Ãdjirãba idu quima edabiɗacaa. Ne jũma coɗi siɗa idu cobiɗacaa. Baribʉrʉ Ãcõrẽba jũma diasia idji ĩjã ɓeaba, wãrã beɗea cawa ɓeaba idjía bia ɓʉaɗa aɗapeɗa coɗamãrẽã.
4 Ne jũma Ãcõrẽba ocuaɗara bia ɓʉa. Maʉ̃ bẽrã Ãcõrẽa bia ɓʉaɗa asiɗara ni aɓaʉ coɗiɗebemara igaraɗiẽ́ panʉa.
5 Maʉ̃ coɗira Ãcõrẽ quĩrãpita bia ɓʉa Ãcõrẽ beɗeaba mãwã jara ɓʉ bẽrã idjaɓa idjía bia ɓʉaɗa abada bẽrã.
Jesucrito nezoca bia
6 Bʉa jũma maʉ̃gʉda djabarãa jaradia ɓaibʉrʉ, Jesucrito nezoca biada ɓaya. Ãcõrẽ wãrã beɗea dadjia ĩjã panʉ ẽpẽ ɓʉɗeba bʉ jaurera ʉɓʉa wari ɓaya bia ne co ɓʉ quĩrãca.
7 Drõã naẽnabema nẽbʉrʉbada biẽ́ ɓeara igaradua. Ãcõrẽba quĩrĩã ɓʉ quĩrãca nĩbai carea cawa wãdua.
8 Wãrãda naʉ̃ cacuara zarea o pananibʉrʉ, ara dadji cacuada carebaɗia. Baribʉrʉ Ãcõrẽ ume nĩbaɗi carea cawa wãnibʉrʉ, maʉ̃ba dadjira ne jũmane carebaya. Iɗibema ewariɗe, tẽãbema ewariɗe biɗa carebaya.
9 Maʉ̃ beɗeara wãrã araa. Jũmarãba maʉ̃ra ĩjãnida panʉa.
10 Maʉ̃ carea dadjira traja panʉa idjaɓa bia mĩga panʉa. Ãcõrẽ zocai ɓʉba ẽdrʉ edamãrẽã jʉ̃ã panʉa. Idjia jũmarãda ẽdrʉ edabaria. Biara jaraibʉrʉ, idji ĩjãbʉdadrʉ ẽdrʉ edabaria.
11 Jũma maʉ̃gʉra jaradiadua idjaɓa ĩjã oɗamãrẽã jaradua.
12 Bʉra cũdramĩna ni aɓaʉa idu igarabirãdua. Ãtebʉrʉ bʉa beɗeabʉrʉɗeba, ne o ɓʉɗeba, wãrã quĩrĩãneba, quĩrãipa ɓʉɗeba, idjaɓa Crito ĩjã ɓʉɗeba djabarãa unubidua sãwã ɓeaɗida panʉda.
13 Jũmarã quĩrãpita Ãcõrẽ Beɗeara jĩgua ledua, jaradia ɓadua, idjaɓa djabarãra careba ɓadua biara ĩjãnamãrẽã aɓa mʉ̃ jũẽbʉrʉɗaa.
14 Ãcõrẽba bʉa omãrẽã diaɗara quĩrãdoarãdua. Djabarã wagabadaba ãdji jʉwa bʉ ʉ̃rʉ̃ ɓʉsiɗaɗe Ãcõrẽneba jarasiɗaa idjia maʉ̃ra diabʉrʉda.
15 Jũma maʉ̃gʉra quĩrãipa o ɓadua jũmarãba cawaɗamãrẽã bʉa ewariza biara o wãda.
16 Ara bʉdjiɗebemada, bʉa jaradia ɓʉ siɗa quĩrãcuita ɓadua. Jũma maʉ̃gʉra jipa o nĩbadua. Mãwã o ɓaibʉrʉ bʉra ẽdrʉya. Bʉa jaradia ɓʉ ũrĩ ɓea siɗa ẽdrʉɗia.
