1 Timoteo 5:1-25
5 Drõãrãra quẽãrãdua, ãtebʉrʉ bʉ zeza ume beɗeabari quĩrãca ãdji ume biaɗeba beɗeadua ĩjãnamãrẽã. Cũdrarãa beɗeadua bʉ djabarã ume beɗeabari quĩrãca.
2 Djorarãa beɗeadua bʉ papa ume beɗeabari quĩrãca. Awẽrãrãa crĩcha biaɗeba beɗeadua bʉ djabawẽrã ume beɗeabari quĩrãca.
3 Pẽdra wẽrãrã dji carebaɗi neẽ́ ɓeara carebadua.
4 Baribʉrʉ pẽdra wẽrãba warrarãda eroɓʉbʉrʉ, wiuzaquerãda eroɓʉbʉrʉ, maʉ̃gʉrãba carebaɗida panʉa. Ãdjirãba bio cawaɗida panʉa sãwã ãdji ẽberãrãra carebaɗida panʉda. Ãdji djibarirãa ne diaɗida panʉa djibarirãba ãdjirãa dia panana quĩrãca. Maʉ̃gʉra Ãcõrẽ quĩrãpita jipa ɓʉa.
5 Pẽdra wẽrã wãrãda iduɓa ɓʉba bio cawa ɓʉa jũma idjia eroɓaida ɓʉra Ãcõrẽbʉrʉ diaida. Ãsa, diamasi biɗa Ãcõrẽa iwiɗibaria carebamãrẽã.
6 Baribʉrʉ pẽdra wẽrãba aɓabe ɓʉsriɗada jʉrʉ ɓaibʉrʉ, zocai ɓʉmĩna beuɗaca ɓʉa. Maʉ̃ pẽdra wẽrãra djabarãba carebaɗiẽ́ panʉa.
7 Jũma maʉ̃gʉra djabarãa obidua pẽdra wẽrãrã carea biẽ́ jaraɗiẽ́ neẽ́ ɓeaɗamãrẽã.
8 Aɓaʉba ara idji ẽberãrãda, idji deɗebemarã siɗa carebaca baibʉrʉ, Ãcõrẽ beɗeara igara ɓʉa. Idjia Crito ĩjãẽ́ ɓea cãyãbara biẽ́ara o ɓʉa.
9 Djabarãba baridua pẽdra wẽrã trʉ̃da cartaɗe ɓʉɗiẽ́ panʉa carebaɗi carea. Ãtebʉrʉ nãwã ɓeadrʉ ɓʉɗida panʉa: sesenta poa auɗu ɓeada, umaquĩrã aɓabe eroɓeaɗada.
10 Ãdjia bia opeɗaɗa carea trʉ̃ ɓʉga ɓeaɗida panʉa. Ãdji warrarãda bia daupẽbadjiɗabʉrʉ, ãdji deɗe zepeɗaɗara bia edabadjiɗabʉrʉ, djabarã jĩrũra sʉgʉbadjiɗabʉrʉ, bia mĩga ɓeara carebabadjiɗabʉrʉ, idjaɓa ne jũma biada obadjiɗabʉrʉ, maʉ̃ pẽdra wẽrã trʉ̃ra cartaɗe ɓʉɗida panʉa.*
11 Baribʉrʉ pẽdra wẽrã waɗi warrada ɓea trʉ̃ra cartaɗe ɓʉrãnadua. Ãdji cacuaba o quĩrĩã ɓʉɗeba wayacusa quima eda quĩrĩãbadaa. Mãwã ãdjia Crito traju oɗi carea waa quima edaɗaẽ́ana apeɗaɗara igarabadaa.
12 Ãdjia naãrã beɗea ɓʉpeɗaɗa quĩrãca ɓeaɗaca bẽrã beɗeaɗe panebaria.
13 Maʉ̃ awara ãdjirãra deza nĩbabadaa idjaɓa coa panebadaa. Coa ɓea awara nẽbʉrada o panebadaa, djãrã nẽbʉraɗe panebadaa, idjaɓa ne jaraiẽ́ ɓeada beɗea panebadaa.
14 Maʉ̃ carea mʉ̃a quĩrĩã ɓʉa pẽdra wẽrã waɗi warra ɓeara quima edaɗida, warra toɗida, idjaɓa ãdji de siɗa bia wagaɗida. Mãwãra dadjirã dji quĩrũba poya biẽ́ beɗeaẽ́a.
15 Mʉ̃a maʉ̃da jara ɓʉa ʉ̃cʉrʉ pẽdra wẽrãrãra ãĩ wãnapeɗa diauruda ẽpẽ panʉ bẽrã.
16 Crito ĩjã ɓʉ wẽrãba pẽdra wẽrã idji ẽberãrã tãẽna ɓeada carebaida ɓʉa.* Maʉ̃ pẽdra wẽrãra djabarãba carebaɗiẽ́ panʉa. Ãtebʉrʉ pẽdra wẽrã ẽberãrã neẽ́ ɓʉdrʉ carebaɗida panʉa.
Djabarã wagabadarã ume sãwã oɗida panʉ
17 Djabarã wagabadarãba bia o panʉ carea djabarãba crĩcha biaɗeba ãdjirãda carebaɗida panʉa ara jãwã ɓearãnamãrẽã. Biara Ãcõrẽ beɗea jaradiabadara, dadji sãwã nĩbaiɗebema jaradiabada siɗa carebaɗida panʉa.
18 Ãcõrẽ Beɗeaba nãwã jara ɓʉa: “Bʉa pacaa ne cʉradʉgabi ɓʉɗe idji itera jʉ̃rãdua.”* Idjaɓa nãwã jara ɓʉa: “Ne o ɓʉba paratada edaida ɓʉa idjia o ɓʉbari.”*
19 Aɓaʉba djabarã wagabarida biẽ́ jaraibʉrʉ, baribʉrʉ ẽberã uméba wa ũbeaba aɓarida jaraɗaẽ́bʉrʉ, maʉ̃ beɗeara ĩjãrãdua.
20 Baribʉrʉ djabarã wagabariba cadjiruada o ɓaibʉrʉ, jũmarã quĩrãpita quẽãdua waabemarãba wayaɗamãrẽã.
21 Ãcõrẽ quĩrãpita, Crito quĩrãpita, bajãnebema nezocarã quĩrãpita biɗa mʉ̃a bʉ́a jaraya: jũma mʉ̃a jaraɗara ĩjã odua. Ni aɓaʉare ɓarãdua, ãtebʉrʉ jũmarã ume quĩrãipa o ɓadua.
22 Quĩrãcuita crĩchaẽ́ne bʉ jʉwara ni aɓaʉ ʉ̃rʉ̃ ɓʉrãdua djabarã wagabarida ɓamãrẽã. Bʉa mãwã oibʉrʉ, idjia cadjiruada osira bʉ siɗa maʉ̃ cadjirua carea beɗeaɗe ɓaya. Jũma cadjiruaɗebemada ãĩ ɓadua.
23 Bʉra baridua cacua biẽ́ ɓabari bẽrã aɓabe baidoda dorãdua. Ãtebʉrʉ uva ɓa siɗa bʉ ɓi carea maãrĩ dodua.
24 Ãcõrẽba cawa oi naẽna ʉ̃cʉrʉba cadjirua o panʉra dadjia ebuɗa unubadaa baribʉrʉ dewararãba cadjirua o panʉra tẽãbe cawaɗia.
25 Ara maʉ̃ quĩrãca ʉ̃cʉrʉba bia o panʉra dadjia ebuɗa unubadaa, idjaɓa ʉ̃cʉrʉba bia o panʉra ebuɗa ununacamĩna mẽrã ɓeẽ́a.
