1 Timoteo 6:1-21
6 Crito ĩjã panʉ nezocarãba ãdji borora waya ɓeaɗida panʉa. Mãwãra dewararãba Ãcõrẽda, dadjia jaradia panʉ siɗa biẽ́ jaraɗaẽ́a.
2 Ãdjirã boroba Critoda ĩjã ɓʉbʉrʉ, crĩchaɗiẽ́ panʉa djaba bẽrã wayaɗaẽ́da. Ãtebʉrʉ idji itea biara trajaɗida panʉa. Ãdji trajuɗeba Crito ĩjã ɓʉba parata edabari bẽrã quĩrĩãneba idji itea trajaɗida panʉa. Maʉ̃gʉra jaradia ɓadua. Idjaɓa mãwã oɗamãrẽã ãdjirãa jaradua.
Parata awua ɓea
3 6:3-4 Aɓaʉba quĩrã awara jaradia ɓaibʉrʉ, dadjirã Boro Jesucritoba jipa jaradiaɗada ãĩ ɓʉaɗa aibʉrʉ, idjaɓa dadji jipa nĩbaɗiɗebema siɗa quĩrã awara jaradia ɓaibʉrʉ, jũma cawa ɓʉda crĩcha ɓʉmĩna wãrãda adua ɓʉa. Sobiẽ́ ɓʉɗeba ijara beɗea ɓebaria. Baridua beɗea carea caicaya ɓebaria. Maʉ̃gʉɗeba zebaria djãrãba eroɓʉ carea biẽ́ ɓaida, djãrã ume quĩrũbi jʉrʉ ɓaida, djãrã ẽcarraare biẽ́ beɗea ɓaida, idjaɓa djãrã ume biẽ́ crĩcha ɓaida.
4 –
5 Maʉ̃ ẽberã crĩcha ãrĩ ɓeara, wãrã beɗea adua ɓea siɗa baridua ijara beɗeabadaa. Ãdjirãba crĩchabadaa Ãcõrẽ ĩjã ɓʉɗeba parata edaɗida.*
6 Wãrãda Ãcõrẽ ĩjã ɓʉɗeba nebia waiɓʉada eropanʉa. Baribʉrʉ ara dadjia naʉ̃ ẽjũãne eropanʉba necai ɓeaɗida panʉa.
7 Tosiɗaɗe dadjirãba naʉ̃ ẽjũãnaa ni cãrẽ siɗa enenaẽ́ basía. Beubʉdaɗe ni cãrẽ siɗa edeɗaẽ́a.
8 Maʉ̃ bẽrã coɗida eropanʉbʉrʉ, cacuaɗe jʉ̃nida eropanʉbʉrʉ, ara maʉ̃ba necai ɓeaɗida panʉa.
9 Baribʉrʉ parata bara ɓa quĩrĩã ɓeaba ne jũma awua panʉneba cadjiruaɗe ɓaebadaa. Maʉ̃ne ne siriẽ́ ɓea awua panʉneba, dadji ãrĩda ɓea awua panʉneba biɗa cadjiruaɗe panebadaa animarã jʉ̃caraba jidaɗa quĩrãca. Maʉ̃ne ãdjirãra bio ãrĩnapeɗa bio biẽ́ ɓeabaria.
10 Ne jũma cadjiruara parata awua ɓʉɗeba zebaria. Ara maʉ̃ awua panʉneba ʉ̃cʉrʉba Crito ĩjã pananara igarasiɗaa. Mãwã ãdjira bio biẽ́ara panesiɗaa.
Pauloba Timoteoa obiɗa
11 Baribʉrʉ bʉa Critora ĩjã ɓʉ bẽrã jũma maʉ̃gʉɗebemada ãĩ nĩbadua.* Jipa nĩbadua. Ãcõrẽra ẽpẽdua. Soɗeba wãrãda Critora ĩjã ɓadua. Jũmarãda quĩrĩã ɓadua. Jũma droadua. Jũmarã ume aduá ɓadua.
12 Ne jũmane Critora ĩjã ɓadua bia djõ ɓʉ quĩrãca. Mãwã bʉra ewariza Ãcõrẽ ume zocai ɓaya. Bʉa Crito ĩjã ɓʉda zocãrã duanʉ quĩrãpita jarasiɗe Ãcõrẽba bʉra trʉ̃sia maʉ̃ zocai ɓaira eroɓamãrẽã.
13 6:13-14 Jũma zocai ɓeara Ãcõrẽneba zocai panʉa. Ara maʉ̃ Ãcõrẽ quĩrãpita mʉ̃a beɗeada jaraya bʉa ĩjã o ɓamãrẽã. Jesucrito quĩrãpita biɗa aɓari beɗeada jaraya idjia wãrã beɗeada Poncio Pilato quĩrãpita jaraɗa quĩrãca. Mʉ̃a naʉ̃gʉda jaraya: mʉ̃a jaradia ɓʉra quĩrãipa ĩjã o ɓadua biẽ́ jaraɗi neẽ́ aɓa dadjirã Boro Jesucrito zebʉrʉɗaa.
15 Ãcõrẽba ɓʉɗa ewariɗe idjira unubiya.
Ãcõrẽ biya quiruda jũmarã Boroa.
Idjira jũma bororã cãyãbara dji dromaara ɓʉa idjaɓa jũma dji droma ɓea Boroa.
16 Aɓabe idjida beucaa. Idji ɓʉma dorrodorroa nũmʉ bẽrã ni aɓaʉda caita poya wãnaẽ́a.
Idjira ni aɓaʉba ununaẽ́ panʉa idjaɓa poya ununacaa.
Mʉ̃a quĩrĩã ɓʉa ewariza jũmarãba idjía bia beɗea pananida idjaɓa jũmarãda poya eroɓaida.
Bia ɓʉa mãwã ɓaida.
Parata bara ɓeaba sãwã oɗida panʉ
17 Naʉ̃ ẽjũãne parata bara ɓearãa jaradua dji dromarãda crĩcharãnamãrẽã. Ãdjia ne eropanʉra dãrã droaca bẽrã jaradua maʉ̃neba bia ɓeaɗida crĩcharãnamãrẽã. Biara Ãcõrẽdrʉ crĩchaɗida panʉda.* Idjiabʉrʉ dadjirãa ne jũmada aɗuba dia ɓʉa necai ɓeaɗamãrẽã.
18 Dji ne bara ɓeaa jaradua jũmarã ume bia oɗamãrẽã. Idjaɓa jaradua ãdjia eropanʉnebemada sobiaɗeba dewararãa diaɗi carea ɓeaɗida panʉda.
19 Mãwã bia o panʉneba ne waga wãbʉrʉ quĩrãca o panʉa nocoarebema ewariɗe bia ɓeaɗi carea. Maʉ̃ne ãdjia wãrã zocai ɓaira eroɓeaɗia.
Pauloba naʉ̃ cartaɗe jĩrũare ɓʉɗa
20 Timoteo, jũma Ãcõrẽba jaraɗara bio wagadua. Ãcõrẽ quĩrãpita biẽ́ ɓea nẽbʉrʉbadara igaradua. Idjaɓa jũma crĩcha Ãcõrẽ beɗea ume quĩrã awara ɓeara igaradua. Ʉ̃cʉrʉba maʉ̃ crĩcha ɓeara necawaaɗa abadaa. Baribʉrʉ necawaẽ́a.
21 Ʉ̃cʉrʉba maʉ̃ necawaara eropanʉana abadaa. Maʉ̃ carea ãdjia Crito ĩjã pananara igarasiɗaa. Mʉ̃a quĩrĩã ɓʉa Ãcõrẽba idji biaɗeba bʉra careba ɓaida.*
