2 Juaʉ̃ 1:1-13
1 Mʉ̃ra djabarã wagabari drõãa.* Mʉ̃a naʉ̃ cartara ɓʉbʉrʉa wẽrã Ãcõrẽba ẽdrʉ edaɗa itea, idji warrarã itea biɗa. Mʉ̃a bãrãra wãrãda quĩrĩã ɓʉa. Baribʉrʉ aɓabe mʉ̃abʉrʉ bãrãra quĩrĩã ɓʉẽ́a, ãtebʉrʉ jũma wãrã beɗea cawa ɓeaba bãrãra quĩrĩã panʉa.
2 Mʉ̃a bãrãra quĩrĩã ɓʉa, wãrã beɗeara dadjirã soɗe ɓʉ bẽrã. Wãrã beɗeara dadjirã soɗe ewariza ɓaya.
3 Dadjirãba wãrã beɗeada ẽpẽ panʉ bẽrã idjaɓa dji quĩrĩã panʉ bẽrã, mʉ̃a quĩrĩã ɓʉa dadjirã Zeza Ãcõrẽba, dadjirã Zeza Warra Jesucrito ume ãdji biaɗeba bãrãra careba pananida, quĩrã djuburia pananida, ãdji necai ɓai siɗa bãrã soɗe ɓaida.*
Wãrã beɗea idjaɓa quĩrĩã
4 Mʉ̃a ʉ̃cʉrʉ bʉ warrarãnebemada ũrĩsia. Mʉ̃ra ɓʉsriɗasia ãdjirãra wãrãneba nĩna bẽrã dadjirã Zeza Ãcõrẽba jara ɓʉ quĩrãca.
5 Djabawẽrã, mʉ̃a beɗea djuburiaya dadjirãra dji quĩrĩãnamãrẽã. Maʉ̃gʉra Ãcõrẽba obi ɓʉ beɗea djiwiɗiẽ́a, ãtebʉrʉ maʉ̃ beɗeara dadjirãba naãrãeɗa ũrĩsiɗaa.*
6 Maʉ̃ wãrã quĩrĩãra naʉ̃gʉa: Ãcõrẽba obi ɓʉ beɗeara ĩjã o pananida. Maʉ̃ obi ɓʉ beɗeara bãrãba naãrãeɗa ũrĩsiɗaa. Maʉ̃ beɗeaba jara ɓʉa quĩrĩãneba nĩbaɗida panʉda.
Djãrã cũrũgabada
7 Djãrã cũrũgabadara naʉ̃ ẽjũãne zocãrã nĩnaa. Ãdjirãba ĩjãnacaa Jesucritora naʉ̃ djaraɗe dadjirã quĩrãca zesida. Dji mãwã ɓʉra djãrã cũrũgabaria idjaɓa Crito ume dji quĩrũa.
8 Quĩrãcuita ɓeaɗadua maʉ̃gʉrãba cũrũgarãnamãrẽã. Mãwã bãrãba Ãcõrẽ itea o panʉbari idjia diaira aduaɗaẽ́a, ãtebʉrʉ jũma daucha edaɗia.*
9 Bariduaba idji crĩchada Critoba jaradiaɗa auɗu jaradia nĩbaibʉrʉ, idjaɓa Critoba jaradiaɗada ĩjã ama ɓaibʉrʉ, maʉ̃ba Ãcõrẽra neẽ́ ɓʉa. Baribʉrʉ bariduaba Critoba jaradiaɗada ĩjã ɓaibʉrʉ, dji Zezara, dji Warra siɗa eroɓʉa.
10 Bariduada bãrãmaa wãbʉrʉɗe Critoba jaradiaɗa quĩrãca jaradiaẽ́bʉrʉ, maʉ̃gʉra bãrã deɗe edarãnadua idjaɓa “bia ɓʉa bʉra zesida” arãnadua.
11 “Bia ɓʉa bʉra zesida” a ɓʉba maʉ̃ ẽberãba cadjirua o ɓʉra idji ume ãbaa o ɓʉa.
Juaʉ̃ba naʉ̃ cartaɗe jĩrũare ɓʉɗa
12 Mʉ̃a ne quĩrãtanoa bãrãa jara quĩrĩã ɓʉa. Baribʉrʉ naʉ̃ cartaɗe jũma ɓʉẽ́a. Mʉ̃a bãrãra acʉɗe wã quĩrĩã ɓʉa. Maʉ̃ne bãrã ume ãbaa beɗeaɗia bio ɓʉsriɗaɗi carea.
13 Bʉ djabawẽrã warrarã Ãcõrẽba ẽdrʉ edaɗaba quĩrĩã panʉa bãrãra bia duananida.*
Beɗea eɗaare
^ 1:1. Djabarã wagabari drõã. Maʉ̃ beɗeaba jara ɓʉa djabarã boroda. Cãpũrĩã beɗeaɗe jara ɓʉa “anciano” wa “pastor.”
^ 1:3. Juaʉ̃ 1:14-18.
^ 1:5. Juaʉ̃ 13:34.
^ 1:8. Bãrãba Ãcõrẽ itea o panʉbari. Griego beɗeaɗe ʉ̃cʉrʉ cartaɗe ɓʉ́ ɓʉa: “Daiba Ãcõrẽ itea o panʉbari.”
^ 1:13. Griego beɗeaɗe ʉ̃cʉrʉ cartaɗe idjaɓa ɓʉ́ ɓʉa: “Amén.” Maʉ̃ba jara ɓʉa “bia ɓʉa mãwã ɓaida.”
