2 Corinto 1:1-24
1 Mʉ̃ra Pauloa. Ãcõrẽba quĩrĩãna bẽrã mʉ̃ra Jesucritoba diabueɗaa. Dadjirã djaba Timoteora mʉ̃ ume ɓʉa. Naʉ̃ cartara ɓʉbʉrʉa Ãcõrẽ ẽberãrã Corinto puruɗebema itea, jũma idji ẽberãrã Acaya druaɗe ɓea itea biɗa.
2 Mʉ̃a quĩrĩã ɓʉa dadjirã Zeza Ãcõrẽba, dadjirã Boro Jesucrito biɗa ãdji biaɗeba bãrãra careba pananida idjaɓa necai ɓaira bãrãa dia pananida.
Paulo mĩgaɗa
3 Dadjirã Boro Jesucrito Zeza Ãcõrẽa bia beɗeaɗida panʉa. Idjira dadjirã quĩrã djuburiabari Zezaa, dadjirã sobiabibari Ãcõrẽa.
4 Ne jũmane bia mĩga panʉne idjia daira sobiabibaria dewara bia mĩga ɓeada sobiabiɗamãrẽã idjia dai sobiabiɗa quĩrãca.*
5 Wãrãda Crito carea daira bio bia mĩgabadamĩna idjiɗeba ne jũmane sobiabadaa.
6 Baribʉrʉ daira mãwã bia mĩga panʉa bãrã sobiaɗamãrẽã idjaɓa cadjiruaɗebemada ẽdrʉɗamãrẽã. Ãcõrẽba dai sobiabibʉrʉɗe bãrã siɗa daiɗeba sobiabadaa. Mãwã bãrãra dai quĩrãca bia mĩgabʉdaɗe poya droaɗia.
7 Daiba cawa panʉa bãrãba Ãcõrẽra wãrãda bio ĩjã panʉda. Cawa panʉa bãrãra dai quĩrãca bia mĩgabadamĩna Ãcõrẽba bãrãra dai quĩrãca sobiabibarida.
8 Djabarã, daiba quĩrĩã panʉa bãrãba cawaɗida daira Asia druaɗe wãrãda bia mĩga panasiɗada. Jãcua mĩga panana bẽrã waa poya droaɗaẽ́da crĩchasiɗaa. Aɓeɗa poya zocai ẽdrʉɗaẽ́da crĩchasiɗaa.
9 Wãrãda daira beaɗida crĩchasiɗaa. Baribʉrʉ jũma mãwãsia ara daduɓa poya ẽdrʉɗida crĩcharãnamãrẽã ãtebʉrʉ beupeɗaɗa ʉ̃rẽbabibari Ãcõrẽba ẽdrʉ ɓʉida ĩjãnamãrẽã.
10 Idjia dai beaɗiɗebemada ẽdrʉ ɓʉsia idjaɓa wayacusa beaɗida crĩchasiɗara ẽdrʉ ɓʉya. Daiba wãrãda ĩjã panʉa idjia dai beaɗiɗebemada ẽdrʉ ɓʉ ɓaida.
11 Bãrã biɗa dai carea Ãcõrẽ iwiɗi panʉneba careba panʉa. Zocãrãba mãwã iwiɗi panʉ bẽrã zocãrãba Ãcõrẽa bia ɓʉaɗa aɗia idji biaɗeba dai careba ɓʉ carea.
Paulo Corintoɗaa wãi baɗa
12 Naʉ̃ carea ɓʉsriɗa panʉa: daiba cawa panʉa so jipa panʉneba, crĩcha biaɗeba naʉ̃ ẽjũãnebemarã tãẽna, bãrã tãẽna biɗa bia nĩnada. Maʉ̃ so jipa ɓaira, crĩcha bia siɗa Ãcõrẽbʉrʉ diabaria. Daira naʉ̃ ẽjũãnebema necawaaɗeba mãwã nĩnaẽ́a, ãtebʉrʉ Ãcõrẽba idji biaɗeba careba ɓʉ bẽrã mãwã nĩnaa.
13 1:13-14 Daiba cartaɗe ɓʉɗacaa bãrãba poya cawaɗaẽ́da. Mʉ̃a crĩcha ɓʉa bãrãba maãrĩ cawapeɗaɗara biara cawa wãnida. Mãwã bãrãra dai carea ɓʉsriɗaɗia idjaɓa dadjirã Boro Jesu zebʉrʉɗe daira bãrã carea ɓʉsriɗaɗia.
15 Bãrãra mʉ̃ carea wãrãda ɓʉsriɗaɗida crĩcha ɓʉ bẽrã, naãrã mʉ̃a crĩcha ɓasia ɓarima umé bãrã acʉɗe wãida biara carebai carea.*
16 Mʉ̃a crĩcha ɓasia Macedonia druaɗaa wãbʉrʉɗe naãrã bãrãda acʉɗe wãida. Maʉ̃be Macedonianaa wãpeɗa jẽda bãrã acʉɗe wãida crĩcha ɓasia. Mãwã Judea druaɗaa wãbʉrʉɗe bãrãba mʉ̃ra poya carebaɗida crĩcha ɓasia.
17 Baribʉrʉ mʉ̃a crĩcha ɓaɗa quĩrãca oɗaẽ́ bẽrã ¿bãrãmaarã mʉ̃a wariwaria jarasica? ¿Bãrãmaarã mʉ̃a oyaɗa aɗara waya oẽ́ana abarica mʉ̃djia o quĩrĩã ɓʉ quĩrãca oi carea?
18 Ãcõrẽra beɗea aɓa ɓʉa. Idjia cawa ɓʉa daiba jarapeɗaɗara wãrã basida. Daiba bãrãmaa wãniana aɗapeɗa ara maʉ̃ne wãnaẽ́ana aɗaẽ́ basía.
19 Silvanoba, Timoteoba, mʉ̃a biɗa bãrãa Ãcõrẽ Warra Jesucritoɗebemada jaradia panasiɗaa. Jesucritoba oyaɗa aɗara waya oẽ́ana acaa. Idjia oyaɗa aɗara jũma obaria. (Ara maʉ̃ quĩrãca daira panʉa.)
20 Wãrãda Ãcõrẽba oi jaraɗara jũma Critoɗeba obaria. Maʉ̃ carea dadjia Ãcõrẽa iwiɗibʉdaɗe Critoɗeba wãrãana abadaa.* Mãwã idjida bia jara panʉa.
21 Ãcõrẽbʉrʉ daira, bãrã siɗa Crito ume bio waga eroɓʉa. Idjia dadjirãra edasia.
22 Idji Jaureda dadjirãza diasia sẽyãda ɓamãrẽã. Mãwã cawabi ɓʉa dadjirãra idjiɗeda. Idjaɓa dadjirã soɗe ɓʉsia cawaɗamãrẽã jũma idjia diai jaraɗara wãrãda edaɗida.
23 Mʉ̃a Ãcõrẽ quĩrãpita jaraya: Corintoɗaa waɗi wãẽ́ ɓʉa bãrã quẽã ɓʉɗeba sopuabi amaaba.
24 Bãrãba Critora bio ĩjã panʉ bẽrã daiba jara panʉra õgo obiɗaẽ́a. Aɓabe bãrãra careba quĩrĩã panʉa ɓʉsriɗa pananamãrẽã.
