2 Corinto 10:1-18
10 Mʉ̃ra Pauloa. Crito quĩrĩãneba, idji biaɗeba biɗa mʉ̃a bãrãa beɗea djuburiaya jipa oɗamãrẽã. Ʉ̃cʉrʉba jara panʉa bãrã ume ɓʉɗe bãrã quẽãi carea mʉ̃a waya ɓabarida, baribʉrʉ bãrã ume ɓʉẽ́ne cartaɗeba quẽãi carea wayacada.
2 Mãwã jara panʉmĩna bãrãma jũẽbʉrʉɗe dai biẽ́ jara panʉra mʉ̃a wãrãda quẽãya. Ãdjia jara panʉa daira naʉ̃ djaraba quĩrĩã ɓʉ quĩrãca nĩnada. Maʉ̃ bẽrã bãrã siɗa quẽã amaaba mʉ̃a beɗea djuburiaya jipa oɗamãrẽã.
3 Daira naʉ̃ djaraɗe panʉa baribʉrʉ cadjirua poyaɗi carea naʉ̃ djaraɗeba djõ panʉẽ́a.
4 Daiba djõni carea eropanʉra naʉ̃ ẽjũãnebemaẽ́a, ãtebʉrʉ Ãcõrẽ ʉɓʉaɗeba jũma idjiɗebema idu cawabiɗacara daiba poyabadaa.
5 Jũma crĩcha ãĩ ɓeara, jũma Ãcõrẽnebema idu cawabiɗaca crĩcha droma ɓea siɗa daiba sewada cawabibadaa. Preso jidabʉda quĩrãca daiba mãwã crĩcha ɓeara jipa crĩchabibadaa Crito ĩjãnamãrẽã.
6 Daiba djabarã cʉwʉrʉ zarea ɓeara quẽãni carea panʉa. Baribʉrʉ naãrã jʉ̃ã panʉa bãrãba ne jũmane ĩjã oɗamãrẽã.
7 Bãrãba ʉ̃rʉ̃bemada acʉ panʉa. Bariduada wãrãda Critoɗeda crĩcha ɓʉbʉrʉ, cawa ɓaida ɓʉa dai siɗa Critoɗerãda.
8 Ãcõrẽba daia obi ɓʉɗebemada mʉ̃a ãĩbẽrã jũmawãyã beɗea ɓʉmĩna maʉ̃gʉ carea quĩrã pera ɓʉẽ́a. Dadjirã Boroba daia mãwã obi ɓʉa bãrãba biara ĩjãnamãrẽã. Idjia daira ɓʉẽ́ basía bãrã biẽ́ ɓeaɗamãrẽã.
9 Mʉ̃a quĩrĩãẽ́a bãrãba crĩchaɗida mʉ̃ cartaɗeba bãrãra dauperabi quĩrĩã ɓʉda.
10 Ʉ̃cʉrʉba jara panʉa cartaɗeba mʉ̃a bio quẽãbarida idjaɓa jũmawãyã obibarida. Baribʉrʉ bãrã ume ɓʉɗe mʉ̃ra, mʉ̃ beɗea siɗa mãcuaẽ́ ɓʉaɗa abadaa.
11 Mãwã jara panʉba cawaɗida panʉa daiba tʉmʉba cartaɗeba jara panʉ quĩrãca bãrã ume panʉne oɗida.
12 Ʉ̃cʉrʉba ara ãdjiɗebemada bia beɗeabadaa. Ãdjirãra crĩcha neẽ́ ɓeaa. Ara ãdjida acʉbadaa cãrẽda biara ɓʉ cawaya. Baribʉrʉ daiba jara quĩrĩãnaẽ́a ãdji quĩrãca panʉda wa ãdji cãyãbara biara panʉda.
13 Ara daiɗebemada jũmawãyã beɗeaɗaẽ́a, ãtebʉrʉ Ãcõrẽba daia obi ɓʉɗebemada bia beɗeaɗia. Idjia obi ɓʉra jũma o panʉ bẽrã daiba bãrãa biɗa jaradiabadaa.
14 Daibʉrʉ bãrãa naãrã beɗea bia Critoɗebemada jaradiaɗe wãsiɗaa. Mãwãnaẽ́bara iɗira bãrãa jaradiabʉdaɗe Ãcõrẽba diabueɗaẽ́ma jaradia panacasiɗaa.
15 Djãrãba opeɗaɗa carea ara daiɗebemada bia beɗeaɗacaa daibʉrʉ opeɗaɗa quĩrãca. Ãtebʉrʉ daiba quĩrĩã panʉa bãrãba Critora biara ĩjãnida. Mãwã daiba bãrã druaɗe poya biara jaradiaɗia ara Ãcõrẽba obi ɓʉ quĩrãca.
16 Maʉ̃be beɗea bia Critoɗebemara dewara druaɗe biɗa jaradiaɗia. Baribʉrʉ djãrãba jaradiapeɗaɗamaa wãnaẽ́a dewaraba oɗara daibʉrʉ osiɗaaɗa aɗa amaaba.
17 Ãcõrẽ Beɗeaɗe ɓʉ́ ɓʉa: “Aɓaʉda bia beɗeaibʉrʉ, dadji Boroɗebemada bia beɗeaida ɓʉa.”*
18 Aɓaʉba ara idjida bia jaraibʉrʉ, maʉ̃ba jara ɓʉẽ́a Ãcõrẽba maʉ̃ ẽberãra bia unu ɓʉda. Ãtebʉrʉ Ãcõrẽba bia jara ɓʉ ẽberãdrʉ bia unu ɓʉa.
Beɗea eɗaare
^ 10:17. Jeremia 9:24.
