2 Corinto 11:1-33
11 Mʉ̃ra crĩcha neẽ́ ɓʉ quĩrãca beɗea ɓʉmĩna quĩrĩã ɓʉa bãrãba droaɗida. Mʉ̃ djuburia mʉ̃a jara ɓʉra ũrĩnadua.
2 Ãcõrẽba wagabi ɓʉ quĩrãca mʉ̃a bãrãra bio waga quĩrĩã ɓʉa. Ẽberãba idji cau quima diabʉrʉ quĩrãca mʉ̃a bãrãra Critoa dia quĩrĩã ɓʉa aɓabe idjiɗerãda ɓeaɗamãrẽã. Mʉ̃a quĩrĩã ɓʉa bãrãra idji itea bio bia ɓeaɗida awẽrã umaquĩrã adua quiru quĩrãca.
3 Baribʉrʉ mʉ̃a waya ɓʉa ʉ̃cʉrʉba bãrãra cũrũgaɗida damaba crĩcha cawaaɗeba Eva cũrũgaɗa quĩrãca.* Mãwãra bãrãba Crito wãrãda soɗeba ĩjã panʉra igaraɗia.
4 Ãĩba zeɗaba Jesuɗebemada daiba jaradiapeɗaɗa awara jaradiabʉrʉɗe bãrãba iduaribibadaa. Idjaɓa Ãcõrẽ Jaure bãrãba edapeɗaɗaɗebemada awara jaradiabʉrʉɗe bãrãba iduaribibadaa. Idjaɓa beɗea bia bãrãba ĩjãpeɗaɗa awara jaradiabʉrʉɗe bãrãba iduaribibadaa.
5 Mãwã jaradia ɓeara ¿bãrãmaarã Jesucritoba diabueɗa dji dromarãca? Mʉ̃maarã ãdjirã cãyãbara mʉ̃ra ni maãrĩ biɗa eɗaara ɓʉẽ́a.
6 Mʉ̃ra beɗea biya quiruɗeba beɗeacamĩna wãrã beɗeara bio cawa ɓʉa. Maʉ̃ wãrã beɗeara daiba ne jũmaneba bãrãa ebuɗa cawabisiɗaa.
7 Mʉ̃a beɗea bia Ãcõrẽnebemada bãrãa bari jaradiaɗa bẽrã mʉ̃ra bãrã quĩrãpita eɗaara ɓesia Ãcõrẽ ume bia ɓeaɗamãrẽã. ¿Mãwãra cadjirua osica?
8 Dewara djabarãba paratada mʉ̃́a diasiɗaa bãrãa poya bio jaradia ɓamãrẽã.
9 Mʉ̃ bãrãma ɓasiɗe ne jũma eroɓaɗaẽ́mĩna bãrãa ne iwiɗiẽ́ basía. Ãtebʉrʉ mʉ̃a neẽ́ ɓaɗara djabarã Macedonianebema zepeɗaɗaba jũma diasiɗaa. Mʉ̃a ni maãrĩ biɗa bãrãa iwiɗiẽ́ basía idjaɓa iwiɗiẽ́ ɓaya.
10 Wãrã beɗea Critoɗebemada mʉ̃ soɗe ɓʉ bẽrã wãrãneba jaraya: bãrã drua Acayaɗe mʉ̃a ni aɓaʉa paratada iwiɗiẽ́a. Mãwã bãrãneba parata edaẽ́ ɓʉaɗa abʉrʉɗe ni aɓaʉba poya jaraɗaẽ́a maʉ̃ra jaracara ɓʉda.
11 ¿Mʉ̃ra cãrẽ cãrẽã mãwã beɗea ɓʉ? ¿Bãrãda quĩrĩãẽ́ ɓʉ bẽrã mãwã beɗea ɓʉca? Ãcõrẽba cawa ɓʉa mʉ̃a bãrãra quĩrĩã ɓʉda.
12 Ara mʉ̃djia obari quĩrãca o ɓaya. Mãwã dai quĩrãca o panʉana abadaba ni maãrĩ biɗa poya jaraɗaẽ́a dai quĩrãca o panʉda.
13 Ãdjira Critoba diabueɗarãẽ́a, ãtebʉrʉ djãrã cũrũgabadarãa. Sewaɗeba ãdjia crĩchabibadaa ãdjira Critoba diabueɗarãda.
14 Baribʉrʉ bãrãba crĩchaɗiẽ́ panʉa ãdjira mãwã zeɗaẽ́da. Diauru siɗa bajãnebema nezoca ʉ̃naanebema quĩrãca zebaria.
15 Maʉ̃ bẽrã idji nezocarã biɗa jipa o panʉ quĩrãca zeɗibʉrʉ bãrãba crĩchaɗiẽ́ panʉa sãwã jãwã zebʉdada. Baribʉrʉ ãdjirã beubʉda ewariɗe ãdjia cadjirua opeɗaɗa quĩrãca edaɗia.
Paulo bia mĩga ɓʉ carea ɓʉsriɗaɗa
16 Mʉ̃a wayacusa jaraya: ni aɓaʉba crĩchaiẽ́ ɓʉa mʉ̃ra crĩcha neẽ́ ɓʉda. Baribʉrʉ mãwã crĩchaɗibʉrʉ, mʉ̃ra crĩcha neẽ́ ɓʉ quĩrãca idu beɗeabiɗadua mʉ̃a biɗa ara mʉ̃djiɗebemada maãrĩ bia beɗeai carea.
17 Ara mʉ̃djiɗebemada bia beɗea ɓʉɗe dadjirã Boroba mãwã beɗeabiẽ́ ɓʉa, ãtebʉrʉ mʉ̃ra crĩcha neẽ́ ɓʉ quĩrãca beɗea ɓʉa.
18 Zocãrãba ara ãdjiɗebemada bia beɗeabadaa naʉ̃ ẽjũãnebemarãba obada quĩrãca. Maʉ̃ bẽrã mʉ̃a biɗa ara mʉ̃djiɗebemada bia beɗeaya.
19 Bãrãmaarã bãrãra crĩcha bara ɓeaa. Baribʉrʉ crĩcha neẽ́ ɓeaba jaradia panʉra bãrãba bia ũrĩbadaa.
20 Ara ãdji beɗeada õgo ĩjã obibʉdaɗe, bãrã orroɗeba ne cobʉdaɗe, bãrã cũrũgabʉdaɗe, bãrã igarabʉdaɗe, bãrã uridarraɗe ubʉdaɗe biɗa bãrãba iduaribibadaa.
21 Mʉ̃a jaraya: jãʉ̃ ẽberãrãba jãcua bia o panʉ bẽrã ãdjidrʉ dji dromaca ɓeaa. Mãwãra mʉ̃ra pera ɓʉa daira ʉɓʉaẽ́ queɗea bẽrã. Maʉ̃ carea ãdjia obada quĩrãca poya oɗaẽ́ca ɓʉa.
Aɓaʉba ara idjiɗebemada poya bia beɗeaibʉrʉ, mʉ̃a biɗa ara mʉ̃djiɗebemada poya bia beɗeaya. Baribʉrʉ mãwã beɗeaira crĩcha neẽ́ ɓʉ quĩrãca beɗeaida ɓʉa.
22 Ãdjira hebreorãana a panʉa. ¿Mʉ̃ siɗa aɓariẽ́ca? Ãdjira israelerãana a panʉa. ¿Mʉ̃ siɗa aɓariẽ́ca? Ãdjira Abrahaʉ̃ warrarãana a panʉa. ¿Mʉ̃ siɗa aɓariẽ́ca?
23 Ãdjira Crito nezocaaɗa a panʉa. Baribʉrʉ ãdjirã cãyãbara mʉ̃a biara Critoba quĩrĩã ɓʉda obaria. Mãwã beɗea ɓʉɗe crĩcha neẽ́ ɓʉ quĩrãca beɗea ɓʉa. Wãrãda ãdjirã cãyãbara mʉ̃a Ãcõrẽ trajura auɗuara obaria. Ãdjirã cãyãbara ẽberãrãba mʉ̃ra ɓarima zocãrã usiɗaa. Ãdjirã cãyãbara mʉ̃ra ɓarima zocãrã preso ɓʉsiɗaa. Ɓarima zocãrã mʉ̃ra beuidia ɓasia.
24 Ɓarima juesuma judiorãba mʉ̃ra jidasiɗaa. Jidabʉdaza soaba ɓarima 39 usiɗaa.
25 Ɓarima ũbea mʉ̃ra jidaɗapeɗa bacuruba usiɗaa. Ɓarima aɓa mʉ̃ra mõgaraba taɓari jidasiɗaa beaɗi carea. Ɓarima ũbea mʉ̃ra pusaɗe ɓarrusia. Maʉ̃ne ɓarima aɓa ãsa, diamasi biɗa mʉ̃ra pusaɗe ũmasia.
26 Mʉ̃ra pi ɓaca basía, ãtebʉrʉ baridua pʉrrʉa nĩbabadjia. Do minijĩchiaɗe nĩbabadjia idjaɓa ne drʉabada barama minijĩchiaɗe nĩbabadjia. Ara mʉ̃ ẽberãrã judiorã tãẽna, judiorãẽ́ tãẽna biɗa mʉ̃ra minijĩchiaɗe ɓasia. Puruɗe, puru jĩga biɗa mʉ̃ra minijĩchiaɗe ɓasia. Pusaɗe biɗa minijĩchiaɗe ɓasia. Wãrãẽ́ djabarãma biɗa mʉ̃ra minijĩchiaɗe ɓasia.
27 Traja ɓʉɗe mʉ̃ra bia mĩgabadjia. Ɓarima zocãrã cãĩẽ́ ɓabadjia, jarra ɓabadjia, opichia ɓabadjia, ne coẽ́ ɓabadjia. Cũrãsaba mʉ̃ra jĩsua ɓabadjia, idjaɓa jʉ̃i carea neẽ́ ɓabadjia.
28 Maʉ̃ awara ewariza jũma djabarã druazabema carea mʉ̃a bio crĩcha ɓabaria.
29 Aɓa cacua biẽ́ ɓʉbʉrʉ, mʉ̃ siɗa cacua biẽ́ ɓʉca ɓabaria. Aɓaʉba dewara djabada cadjiruaɗe ɓaebibʉrʉ, mʉ̃ra maʉ̃ ẽberã ume quĩrũbaria.
30 Ara mʉ̃djiɗebemada bia beɗeaibʉrʉ, mʉ̃ ʉɓʉaẽ́ ɓʉɗebemada bia beɗeaya.
31 Dadjirã Boro Jesucrito Zeza Ãcõrẽa ewariza bia beɗeaɗida panʉa. Idjia cawa ɓʉa mʉ̃ra sewa oẽ́ ɓʉda.
32 Damasco puruɗe ɓasiɗe dji nocoba idji zarrarãa mʉ̃ra jʉrʉbisia preso ɓʉi carea. Dji nocora dji druaɗebema boro Aretaba ɓʉɗa basía.
33 Purura mõgaraba auɗu jũrã ca ɓasia. Maʉ̃ne dajadaa acʉbadada ʉ̃tʉ ɓasia. Djabarãba mʉ̃ra ẽ waiɓʉaɗe ɓʉɗapeɗa maʉ̃gʉɗeba uɗaa ʉraɓari ɓʉsiɗaa puru dajada. Mãwã mʉ̃ra dji noco jʉwaɗebemada ẽdrʉsia.*
