2 Corinto 12:1-21
12 Waya ara mʉ̃djiɗebemada bia beɗeaya, maʉ̃ba djãrãra carebacamĩna. Dadjirã Boroba mʉ̃́a cãĩmocara quĩrãca unubiɗada idjaɓa cawabiɗa siɗa mʉ̃a jaraya.
2 Mʉ̃a ẽberãda unubaria Crito ĩjã ɓʉda.* Catorce poa babʉrʉa Ãcõrẽba maʉ̃ djabara bajãnaa idji ɓʉmaa ede ɓaɗada.* Mʉ̃a adua ɓʉa Ãcõrẽba idji cacuada ede ɓasida wa aɓabe idji jaureda ede ɓasida. Ãcõrẽbʉrʉ cawa ɓʉa.
3 12:3-4 Baribʉrʉ mʉ̃a cawa ɓʉa Ãcõrẽba maʉ̃ djabara idji bajã biya quirumaa ede ɓasida. Mama maʉ̃ djababa ũrĩsia beɗea biya quiru dadjia poya cawa jaraɗaẽ́da idjaɓa naʉ̃ ẽjũãne jaracara panʉda. Wãrãda mʉ̃a adua ɓʉa Ãcõrẽba idji cacuada ede ɓasida wa aɓabe idji jaureda ede ɓasida. Ãcõrẽbʉrʉ cawa ɓʉa.
4 –
5 Maʉ̃ djabaɗebemada mʉ̃a bia beɗeaya, baribʉrʉ ara mʉ̃djiɗebemada bia beɗeaẽ́a. Aɓabe mʉ̃ ʉɓʉaẽ́ ɓʉɗebemada bia beɗeaya.
6 Wãrãda ara mʉ̃djiɗebemada bia beɗea quĩrĩã ɓʉbara mʉ̃ra crĩcha neẽ́ ɓʉ quĩrãca beɗeaẽ́ bacasia, wãrã beɗeada beɗea ɓʉ bẽrã. Baribʉrʉ mʉ̃ra mãwã beɗeaẽ́a ni aɓaʉba crĩcharãnamãrẽã mʉ̃ra biara ɓʉda. Ãtebʉrʉ mʉ̃a quĩrĩã ɓʉa bãrãba mʉ̃nebemada ariɗe crĩchaɗida mʉ̃a o ɓʉda unu panʉ bẽrã idjaɓa mʉ̃a jaradia ɓʉda ũrĩ panʉ bẽrã.
7 Ãcõrẽba mʉ̃́a bajãne unubiɗara bio biya querasia. Mãwãmĩna ara mʉ̃djiɗebemada jũmawãyã bia crĩcharãmãrẽã Ãcõrẽba mʉ̃́a puada idu unubi ɓʉa. Maʉ̃ puara ʉrʉba su nũmʉ quĩrãca ɓʉa. Diauru nezocaba mãwã o ɓʉa.
8 Mʉ̃a ɓarima ũbea dadjirã Boro Jesucritoa beɗea djuburiasia maʉ̃ puara jõbimãrẽã.
9 Baribʉrʉ idjia jarasia: “Mʉ̃ biaɗeba bʉra carebaya jũma droa ɓamãrẽã. Bʉ ʉɓʉaẽ́ ɓʉɗe mʉ̃ ʉɓʉara bʉɗeba biara unubi ɓʉa.” Mʉ̃ ʉɓʉaẽ́ ɓʉɗe Crito ʉɓʉara eroɓabari bẽrã mʉ̃ ʉɓʉaẽ́ ɓʉɗebemada ɓʉsriɗaba bia beɗeaya.
10 Crito carea bia mĩga ɓʉɗe, ʉɓʉaẽ́ ɓʉɗe, ne neẽ́ ɓʉɗe, ẽberãrãba biẽ́ jara panʉne idjaɓa biẽ́ oɗi carea ẽpẽ panʉne mʉ̃ra ɓʉsriɗa ɓʉa. Wãrãda mʉ̃ ʉɓʉaẽ́ ɓʉɗe Critoɗeba ʉɓʉa ɓʉa.
Corintoɗebema djabarã Pauloba crĩcha ɓaɗa
11 Mʉ̃ra crĩcha neẽ́ ɓʉ quĩrãca ara mʉ̃djiɗebemada bia beɗea ɓʉa, baribʉrʉ bãrãbʉrʉ mʉ̃ra mãwã beɗeabisiɗaa. Bãrãba mʉ̃nebemada bia beɗeaɗida panʉmĩna bia beɗeaɗaẽ́ panʉa. Crĩcha panʉa bãrãba ẽpẽ panʉ ẽberãrãra Jesucritoba diabueɗarã dji dromarãda. Mʉ̃ra dji dromaẽ́mĩna ãdjirã cãyãbara eɗaara ɓʉẽ́a.
12 Mʉ̃ bãrã tãẽna ɓasiɗe jũma droa ɓasia. Idjaɓa ne ununaca waiɓʉa ɓeada obadjia Jesucritoba diabueɗarãba obada quĩrãca. Mãwã cawabisia mʉ̃ra wãrãda Jesucritoba diabueɗada.
13 ¿Mʉ̃a cãrẽneba bãrãra dewara puruɗebema djabarã cãyãbara biẽ́ara osi? Aɓabe bãrãba mʉ̃ra carebaɗamãrẽã iwiɗiɗaẽ́ bẽrã biẽ́ osisicadame. Mãẽteara ¡maʉ̃ biẽ́ oɗara mʉ̃ quĩrã djuburia quĩrãdoaɗadua!
14 Mʉ̃ra bãrãmaa wãi carea ɓʉa. Naʉ̃ba ɓarima ũbea wãya. Baribʉrʉ mʉ̃a iwiɗiẽ́a bãrãba carebaɗamãrẽã. Bãrãba eroɓeara jʉrʉ ɓʉẽ́a, ãtebʉrʉ quĩrĩã ɓʉa bãrãba mʉ̃ra ẽpẽnida. Warra zaquerãba ne jʉrʉɗacaa ãdji djibarirãa ne diaɗi carea, ãtebʉrʉ djibarirãba ne jʉrʉbadaa ãdji warrarãa diaɗi carea.
15 Ara mʉ̃djida, jũma mʉ̃a eroɓʉ siɗa ɓʉsriɗa diaya bãrã carebai carea. Mʉ̃a bãrãra bio quĩrĩã ɓʉ bẽrã ¿bãrãba mʉ̃ra quĩrĩãẽ́ panebʉdaca? Mʉ̃maarã mãwãẽ́a.
16 Bãrãba cawa panʉa mʉ̃a bãrã paratara ni maãrĩ biɗa edaẽ́ basida. Mãwãmĩna ʉ̃cʉrʉ bãrãnebemaba jara panʉa mʉ̃ crĩcha cawaaɗeba bãrãra cũrũgasida parata edai carea.
17 Mʉ̃a djabarã diabuesiɗe ¿ãdjiɗeba bãrãra cũrũgasica parata edai carea?
18 Mʉ̃a Titoa beɗea djuburiasia bãrã acʉɗe wãmãrẽã. Dewara djaba siɗa idji ume diabuesia. Ãdji wãsiɗaɗe ¿Titoba bãrãra cũrũgasica parata edai carea? ¿Daiba aɓari crĩchada eropananaẽ́ basica? ¿Aɓari quĩrãca nĩbaɗaẽ́ basica?
19 ¿Bãrãmaarã daiba mãwã jara panʉca daiɗebemada biẽ́ crĩcharãnamãrẽã? Mãwãẽ́a. Djabarã, daira Critoɗe bẽrã Ãcõrẽ quĩrãpita jũma maʉ̃gʉra jara panʉa bãrãba biara ĩjãnamãrẽã.
20 Mʉ̃a waya ɓʉa bãrãma jũẽbʉrʉɗe bãrãba jipa o panʉda unune wãẽ́da mʉ̃a unu quĩrĩã ɓʉ quĩrãca. Maʉ̃ne bãrãba quĩrĩãnaẽ́mĩna mʉ̃a quẽãya. Wãrãda mʉ̃a waya ɓʉa unune wãida bãrãra caicaya duanʉda, djãrãba ne eroɓea carea biẽ́ duanʉda, quĩrũ duanʉda, ara bãdji bia panani carea jʉrʉ duanʉda, nẽbʉra o duanʉda, djãrã biẽ́ jara duanʉda, dji dromaca crĩcha duanʉda, idjaɓa quĩrãipa oɗaẽ́ duanʉda.
21 Mʉ̃a waya ɓʉa bãrãma jũẽbʉrʉɗe Ãcõrẽba mʉ̃ra bãrã carea wayacusa quĩrã perabida. Maʉ̃ne zocãrã bãrãba naẽna cadjirua o pananada waɗibiɗa o panʉ bẽrã mʉ̃ra jĩãya. Bãrãba cadjirua obadara, auɗua nĩbabadara, naʉ̃ cacuaba cadjirua o quĩrĩã ɓʉ obada siɗa waɗibiɗa igaraɗaẽ́ panʉ bẽrã jĩãya.
