2 Corinto 13:1-14
13 Ãcõrẽ Beɗeaba nãwã jara ɓʉa: “Aɓaʉba biẽ́ oɗa cawa obʉdaɗe ẽberãda umé wa ũbea arima pananida panʉa. Maʉ̃ne idjia biẽ́ oɗaɗebemada aɓarida jaraɗibʉrʉ, cawaɗia wãrãda biẽ́ osida.”* Naʉ̃ba ɓarima ũbea mʉ̃ra bãrãmaa wãbʉrʉ bẽrã cawa oya Ãcõrẽ Beɗeaba jara ɓʉ quĩrãca.
2 Ɓarima umé bãrãmaa wãsiɗe mʉ̃a cadjirua o ɓearãa jarasia waa orãnamãrẽã. Mãwã oɗaẽ́bʉrʉ, wayacusa zebʉrʉɗe mʉ̃a ãdjirãra quĩrã djuburiaẽ́ana asia. Idjaɓa ara nawena mʉ̃ra bãrã ume ɓʉẽ́mĩna aɓarida jaraya: cadjirua o ɓearãba igaraɗaẽ́bʉrʉ, mʉ̃ wayacusa wãbʉrʉɗe ãdjirãra quĩrã djuburiaẽ́a.
3 Mãwã mʉ̃a unubiya Critora wãrãda mʉ̃neba beɗea ɓʉda. Bãrãba maʉ̃da cawa quĩrĩã panʉa. Critoba ara idjida ʉɓʉaẽ́ ɓʉda bãrãa unubicaa, ãtebʉrʉ ʉɓʉa ɓʉda unubi ɓʉa.
4 Idjira ʉɓʉaẽ́ ɓʉ quĩrãca cruɗe cachipeɗaɗamĩna Ãcõrẽ ʉɓʉaɗeba zocai ɓʉa. Dai siɗa ʉɓʉaẽ́ panʉa idji ʉɓʉaẽ́ ɓaɗa quĩrãca, baribʉrʉ idji ume daira Ãcõrẽ ʉɓʉaɗeba panania bãrã carebaɗi carea.
5 Ara bãdjiza bio crĩchaɗadua wãrãda Jesura ĩjã panʉ cawaya. Ara bãdjiza bio acʉɗadua jipa nĩna cawaya. ¿Bãrãba adua panʉca Jesucritora bãrã soɗe ɓʉda? Bãrã soɗe ɓʉẽ́bʉrʉ idjiɗerãẽ́a.
6 Baribʉrʉ bãrã soɗe ɓʉda cawasiɗara mʉ̃a crĩcha ɓʉa bãrãba cawaɗida daira wãrãda Jesucritoba diabueɗarãda.
7 Daiba Ãcõrẽa iwiɗi panʉa bãrãba cadjirua orãnamãrẽã. Baribʉrʉ mãwã iwiɗi panʉẽ́a acʉbiɗi carea daira Jesucritoba diabueɗarãda. Ãtebʉrʉ iwiɗi panʉa bãrãba jũma biada oɗamãrẽã, daira Jesucritoba diabueɗarãda crĩchaɗaẽ́ panʉ siɗa.
8 Daiba wãrã beɗeara poya quĩrã awara oɗaẽ́a, ãtebʉrʉ wãrã beɗeara jũma ĩjã oɗida panʉa.
9 Bãrãba bio ĩjã pananibʉrʉ daira ʉɓʉaẽ́ panʉmĩna ɓʉsriɗa panʉa. Maʉ̃ awara daiba Ãcõrẽa iwiɗi panʉa bãrãba jipaara o pananamãrẽã.
10 Maʉ̃ carea bãrãmaa wãi naẽna mʉ̃a naʉ̃ cartara ɓʉ́ diabuebʉrʉa. Bãrãba ĩjãsiɗara bãrãma jũẽbʉrʉɗe mʉ̃a quẽãẽ́a. Wãrãda dadjirã Boro Jesuba mʉ̃ra ɓʉẽ́ basía bãrãra biẽ́ ɓeaɗamãrẽã, ãtebʉrʉ mʉ̃ra ɓʉsia bãrãba biara ĩjãnamãrẽã.
11 Djabarã, jĩrũare mʉ̃a nãwã ɓʉya: ɓʉsriɗa ɓeaɗadua, wayacusa jipa o pananadua, mʉ̃a jara ɓʉra ĩjã o pananadua, aɓari crĩchada eroɓeaɗadua, idjaɓa ãbaa necai ɓeaɗadua. Mãwãra Ãcõrẽra bãrã ume ɓaya. Idjiɗeba quĩrĩãda, necai ɓai siɗa ze ɓʉa.
12 Wãrã quĩrĩãneba dji bia edaɗadua.*
13 Jũma namabema djabarãba quĩrĩã panʉa bãrãra bia duananida.
14 Mʉ̃a quĩrĩã ɓʉa dadjirã Boro Jesucritoba idji biaɗeba bãrãra careba ɓaida, Ãcõrẽba bio quĩrĩã ɓaida, idjaɓa ewariza Ãcõrẽ Jaureba ãbaa bia eroɓaida.
