2 Corinto 2:1-17
2 Maʉ̃ carea mʉ̃a crĩchasia bãrãra acʉɗe wãẽ́da. Wayacusa bãrã quẽã ɓʉɗeba sopuabi quĩrĩãẽ́ basía.
2 Mʉ̃a bãrãda sopuabibʉrʉ ¿caiba mʉ̃ra ɓʉsriɗabi? ¿Bãrã sopua ɓeaba mʉ̃ra ɓʉsriɗabiɗica?
3 Maʉ̃ carea bãrã acʉɗe wãi cãyãbara cartada diabuesia. Mãwã mʉ̃ wãbʉrʉɗe bãrãba mʉ̃ra sopuabiɗaẽ́a. Bãrãba mʉ̃ra ɓʉsriɗabiɗida panʉa. Mʉ̃a cawa ɓʉa bãrãba mãwã oɗi bẽrã mʉ̃ ume ãbaa ɓʉsriɗa pananida.
4 Wãrãda maʉ̃ cartara ɓʉsia bãrã quẽãi carea. Baribʉrʉ mãwã ɓʉẽ́ basía bãrã sopuaɗamãrẽã, ãtebʉrʉ cawaɗamãrẽã mʉ̃a bãrãra wãrãda quĩrĩã ɓʉda. Maʉ̃ carea mʉ̃a sopuaɗeba, jũmawãyã crĩcha ɓʉɗeba, idjaɓa jĩã ɓʉɗeba maʉ̃ cartara ɓʉ́ ɓasia.
Aɓaʉba cadjirua oɗada Pauloba quĩrãdoaɗa
5 Wãrãda aɓaʉba cadjirua o ɓʉɗeba mʉ̃ra sopuabisia. Baribʉrʉ aɓabe mʉ̃drʉ sopuabiẽ́ basía, ãtebʉrʉ berara jũma bãrã siɗa sopuabisia. (Berara jũma bãrãda jara ɓʉa, idjia oɗara jũmawãyã cadjirua ɓʉaɗa a quĩrĩãẽ́ bẽrã.)
6 Berara jũmarãba maʉ̃ ẽberã cadjirua oɗara quẽãnapeɗa ãĩ ɓʉsiɗaa. Ara maʉ̃ba bia ɓʉa.
7 Maʉ̃ bẽrã idjia oɗara quĩrãdoaɗida panʉa idjaɓa sobiabiɗida panʉa jũmawãyã sopua ɓʉba biẽ́ ɓerãmãrẽã.
8 Maʉ̃ carea mʉ̃a bãrãa beɗea djuburiaya wayacusa cawabiɗamãrẽã bãrãba idjira quĩrĩã panʉda.
9 Mʉ̃a naẽna maʉ̃nebemada ɓʉsia bãrãba wãrãda jũma mʉ̃a jaraɗada ĩjã oɗi cawaya.
10 Aɓaʉba cadjirua oɗada bãrãba quĩrãdoasiɗara mʉ̃a biɗa quĩrãdoaya. Cadjirua mʉ̃a quĩrãdoaida ɓʉda wãrãda ɓasibʉrʉ, maʉ̃ cadjiruara Crito quĩrãpita jũma quĩrãdoasia bãrã bia duananamãrẽã.
11 Mãwã quĩrãdoasia diauruba dadjirãra cũrũgarãmãrẽã. Idjia sãwã obarida dadjirãba bio cawa panʉa.
Critoɗeba dadjirãba ne jũma poya panʉ
12 Mʉ̃ra Troa puruɗaa wãsia beɗea bia Critoɗebemada jaradiai carea. Mama dadjirã Boroba eɗa wãbadara ewabʉrʉ quĩrãca osia ẽberãrãba ũrĩ quĩrĩãnamãrẽã.
13 Baribʉrʉ mʉ̃ djaba Titoda unuẽ́ bẽrã soɗe necai ɓaẽ́ basía. Maʉ̃ carea djabarã ume dji jʉrepeɗa mʉ̃ra wãyaana asia. Ara maʉ̃da Macedonia druaɗaa Tito jʉrʉɗe wãsia.
14 2:14-15 Baribʉrʉ Ãcõrẽa bia ɓʉaɗa aɗida panʉa. Jesucritoba jũma poyapeɗa daira jũmarã quĩrãpita nocoɗaa edebʉrʉa idjaɓa daiɗeba druaza idjiɗebemada cawabi ɓʉa. Critoɗebema jaradia panʉne Ãcõrẽ quĩrãpita daira quera quĩrãca tũãpa panʉa. Idjaɓa idjiɗebema cawaira quera quĩrãca ɓʉa. Maʉ̃ querara dji ẽdrʉɗi ẽberãrãba, dji aduaɗi ẽberãrã biɗa ʉ̃badaa.
16 Dji aduaɗimaarã maʉ̃ querara ẽberã beuɗa mĩguiaca ɓʉa, Jesu ĩjãnaẽ́ panʉneba beuɗi bẽrã. Baribʉrʉ dji ẽdrʉɗimaarã maʉ̃ querara bio tũãpa ɓʉa, Jesu ĩjã panʉneba zocai panani bẽrã. ¿Caiba ara idji ʉɓʉaɗeba Ãcõrẽ beɗeara poya jaradiai?
17 Daiba parata edaɗi carea Ãcõrẽ beɗeara jaradia nĩnaẽ́a zocãrãba obada quĩrãca. Ãtebʉrʉ Crito ume panʉ bẽrã Ãcõrẽba daira diabuesia. Maʉ̃ne idji quĩrãpita crĩcha biaɗeba jaradiabadaa.
