2 Corinto 3:1-18
3 ¿Maʉ̃ jara panʉneba wayacusa ara daiɗebemada bia beɗea panʉca? ¿Dai bia nĩnanebema cartada bãrãa acʉbiɗida panʉca jaradiaɗi carea? ¿Daiba bãrãa cartada iwiɗiɗida panʉca jaradiaɗe wãni carea ʉ̃cʉrʉba obada quĩrãca?
2 Bãrãdrʉ carta dai soɗe ɓʉ́ ɓʉ quĩrãca panʉa. Jũmarãba maʉ̃ carta acʉɗapeɗa cawa panʉa daiba jipa jaradiabadada.
3 Daiɗeba bãrãba Crito ĩjãpeɗaɗa bẽrã bãrãra carta Critoba ɓʉ́ diaɗa quĩrãca panʉa. Idjia maʉ̃ cartara tintaba ɓʉẽ́ basía, ãtebʉrʉ zocai ɓʉ Ãcõrẽ Jaureɗeba ɓʉsia. Mõgara peweɗeaɗe ɓʉẽ́ basía, ãtebʉrʉ dadjirã soɗe ɓʉsia.*
4 Ãcõrẽ quĩrãpita daiba Critoɗeba cawa panʉa maʉ̃gʉra wãrãda.
5 Daiba poya jaraɗaẽ́a ara daduɓa Ãcõrẽ trajura poya oɗida. Ãtebʉrʉ cawa panʉa Ãcõrẽneba jũma poya oɗida.
6 Ãcõrẽba daira ɓʉsia idjia ẽberãrã ume beɗea ɓʉɗa djiwiɗida poya jaradiaɗamãrẽã. Maʉ̃ beɗea ɓʉɗa djiwiɗira Ãcõrẽba Moisea diaɗa ley quĩrãca jʉwaba ɓʉɗaẽ́a, ãtebʉrʉ Ãcõrẽ Jaureba cawabiɗaa. Ãcõrẽba Moisea diaɗa leyba cawabi ɓʉa cadjirua o panʉ carea ẽberãrãra beuɗida panʉda, baribʉrʉ Ãcõrẽ Jaureba dadjirãa zocai ɓaida diabaria.
7 3:7-8 Ãcõrẽba Moisea diaɗa leyra mõgara peweɗeaɗe ɓʉɗa basía.* Maʉ̃ leyba cawabisia cadjirua o panʉ carea ẽberãrãra beuɗida panʉda. Ãcõrẽba maʉ̃ ley diasiɗe idji dorrodorroaba Moise quĩrãra dorrodorroabisia. Maʉ̃ carea israelerãba Moise quĩrãra poya acʉɗaẽ́ basía. Maʉ̃ dorrodorroa ɓʉra pĩãca jõbʉrʉ baɗamĩna waɗibiɗa poya acʉɗaẽ́ panasiɗaa.* Wãrãda Ãcõrẽba idji dorrodorroaba unubisia maʉ̃ leyra bio bia ɓʉda. Baribʉrʉ idjia beɗea ɓʉɗa djiwiɗira idji Jaureba cawabi ɓʉ bẽrã ¿Moisea diaɗa ley cãyãbara biara ɓʉẽ́ca?
8 –
9 Wãrãda maʉ̃ leyba ẽberãrãra beuɗida panʉda jara ɓʉmĩna bio bia ɓʉa. Baribʉrʉ Ãcõrẽba beɗea ɓʉɗa djiwiɗira biara ɓʉa. Maʉ̃ba cawabi ɓʉa sãwã Ãcõrẽba dadjirãra jipa unubarida.
10 Ãcõrẽba Moisea diaɗa leyra bio bia ɓaɗamĩna iɗira mãcuaẽ́ ɓʉa idjia beɗea ɓʉɗa djiwiɗira biara ɓʉ bẽrã.
11 Ãcõrẽba Moisea diaɗa leyra naẽna bio bia ɓaɗamĩna ewariza ɓai careabemaẽ́ basía. Baribʉrʉ idjia beɗea ɓʉɗa djiwiɗira jõca bẽrã biara ɓʉa.
12 Maʉ̃ beɗea ɓʉɗa djiwiɗira wãrãda jõcada cawa panʉ bẽrã daiba maʉ̃gʉra ebuɗa jaradiabadaa.
13 Daiba ni cãrẽ siɗa mẽrãnacaa Moiseba idji quĩrã mẽrãna quĩrãca. Moiseba idji quĩrãra bʉrabadjia israelerãba idji quĩrã dorrodorroa jõbʉrʉda unurãnamãrẽã.
14 3:14-15 Baribʉrʉ ãdjirãba maʉ̃gʉɗebemada cawaɗaẽ́ basía. Ãdji crĩchara wuaba bʉrá eropanʉ quĩrãca ɓasia. Iɗi biɗa Ãcõrẽba Moisea diaɗa ley acʉbʉdaɗe judiorãba cawaɗacaa. Ãdji crĩchara waɗibiɗa wuaba bʉrá eropanʉ quĩrãca ɓʉa. Aɓabe Critoɗeba poya cawaɗia. Idjiabʉrʉ ãdji crĩcha wuaba bʉrá eropanʉra ẽrã ɓʉya.
16 Wãrãda aɓaʉba ĩjãbʉrʉɗe idji crĩcha wuaba bʉrá eroɓʉ quĩrãca ɓʉra dadjirã Boroba ẽrã ɓʉya.
17 Dadjirã Boro abʉrʉɗe Ãcõrẽ Jaureda jara ɓʉa. Dadjirã Boro Jaureɗeba nĩbabarira cadjiruaɗebemada, Ãcõrẽba Moisea diaɗa leyɗebema siɗa ẽdrʉsia.
18 Dadjirãba Critoda ĩjã panʉ bẽrã dadji quĩrãra wuaba bʉrá eropanʉ quĩrãca panʉẽ́a. Maʉ̃ bẽrã dadjirãneba dewararãba dadjirã Boro quĩrãwãrẽãra unu panʉa quĩrã acʉbadaɗe acʉ panʉ quĩrãca. Maʉ̃ne dadjirã Boro Jaureba dadjirãra ewariza biara o wãa dadjirã Boro quĩrãca pananamãrẽã.
