2 Corinto 4:1-18
4 Ãcõrẽba quĩrã djuburiaɗeba idji beɗeara idu jaradiabi ɓʉ bẽrã daiba poyaɗaẽ́da crĩchaɗacaa.
2 Ne jũma cadjirua ẽberãrãba mẽrã obadada, mĩã pera obada siɗa daiba igarasiɗaa. Djãrãra cũrũgaɗacaa. Ãcõrẽ beɗeara ãĩ jaradiaɗacaa, ãtebʉrʉ wãrã beɗeara ebuɗa jaradiabadaa. Mãwã Ãcõrẽ quĩrãpita daiba jũmarãa cawabibadaa jipa o panʉda.
3 Baribʉrʉ beɗea bia Critoɗebema daiba jaradia panʉda waɗibiɗa ebuɗa ɓʉẽ́bʉrʉ, aɓabe dji aduaɗimaarã mãwã ɓʉa.
4 Jipa jaraibʉrʉ, Ãcõrẽ ĩjãẽ́ ɓeamaarã ebuɗa ɓʉẽ́a. Naʉ̃ ẽjũãne diauruda ãdjirã boroa. Diauruba ãdjirãa wãrã beɗea bia Critoɗebemada idu cawabiẽ́ ɓʉa dauɓerrea o ɓʉ quĩrãca.* Mãwã ãdjirãba Crito bia quiruɗebemada poya cawaɗaẽ́a. Critora Ãcõrẽ bẽrã mãwã bia quirua.
5 Ara daiɗebemada jaradia panʉẽ́a, ãtebʉrʉ jaradia panʉa Jesucritora jũmarã Boroda. Idjaɓa daiba jara panʉa Jesura quĩrĩã panʉ bẽrã daira bãrã nezocada.
6 Naʉ̃ ẽjũãra jũma pãĩma ɓaɗada Ãcõrẽba ʉ̃nabisia.* Ara maʉ̃ quĩrãca idji ʉ̃naada dadjirã soɗe ʉ̃nabisia. Maʉ̃ba jara ɓʉa idji biya quiruɗebemada Critoɗeba dadjirãa cawabisida.
Crito ĩjã ɓʉɗeba nĩbaɗi
7 Critoɗebema beɗea biya quirura daiba eropanʉa. Mãwãmĩna naʉ̃ cacuara ʉɓʉaẽ́ ɓʉa idjaɓa ãrĩcha ɓʉa zoco quĩrãca. Maʉ̃ bẽrã jũmarãba cawa panʉa dai ʉɓʉaɗeba maʉ̃ beɗeara jaradia panʉẽ́da, ãtebʉrʉ Ãcõrẽ ʉɓʉa waiɓʉa ɓʉɗeba jaradia panʉda.
8 Daira ne jũmane bia mĩga panʉmĩna poya ẽdrʉɗaẽ́da crĩchaɗacaa. Sãwã oɗida cawaɗaẽ́ panʉne poya oɗaẽ́da crĩchaɗacaa.
9 Ẽberãrãba daira biẽ́ o panʉmĩna Ãcõrẽba igaraẽ́ ɓʉa. Ãdjirãba daira bia mĩgabi panʉmĩna poya beaɗaẽ́a.
10 Dai wãbʉdaza ẽberãrãba daira bea quĩrĩã panʉa Jesu beapeɗaɗa quĩrãca. Baribʉrʉ Jesuba daira careba ɓʉ bẽrã ãdjia daiɗeba Jesu zocai ɓʉda unubadaa.
11 Wãrãda dai waɗi zocai panʉne Jesu carea ẽberãrãba daira bea quĩrĩã panania. Mãwã dai cacua beuida ɓʉɗeba jũmarãba Jesu zocai ɓʉda ununia.
12 Wãrãda ẽberãrãba daira bea quĩrĩã panʉmĩna daiba jaradia panʉra bãrãba ĩjãsiɗaa. Maʉ̃ bẽrã ewariza Ãcõrẽ ume zocai panania.
13 Ãcõrẽ Beɗeaɗe ɓʉ́ ɓʉa: “Mʉ̃a Ãcõrẽra ĩjãna bẽrã beɗeasia.”* Aɓari quĩrãca daiba Ãcõrẽra wãrãda ĩjã panʉ bẽrã idjiɗebemada beɗea panʉa.
14 Ãcõrẽba dadjirã Boro Jesura ʉ̃rẽbabisia. Daiba cawa panʉa ara maʉ̃ Ãcõrẽba dai siɗa Jesu quĩrãca ʉ̃rẽbabida. Maʉ̃be daira bãrã ume ãbaa idji quĩrãpita ɓʉya.
15 Daira bia mĩga panʉa bãrã bia ɓeaɗamãrẽã. Maʉ̃ne Ãcõrẽba idji biaɗeba ẽberãrãda zocãrã ẽdrʉ edabʉrʉa. Mãwã zocãrãba idjía bia ɓʉaɗa aɗia idjaɓa idjida bia jaraɗia.
16 Maʉ̃ bẽrã daiba waa jaradiaɗaẽ́da crĩchaɗacaa. Daira ewariza cacua ʉɓʉaẽ́ara wãnamĩna Ãcõrẽba careba ɓʉa dai soɗe ʉɓʉara ɓeaɗamãrẽã.*
17 Dai ara nawena bia mĩgabadara dãrãẽ́ne jõya. Baribʉrʉ daiba bajãnebema crĩcha panʉne jũma maʉ̃gʉ droa panʉra mãcua zarea ɓʉẽ́a. Wãrãda dai bia mĩga panʉ carea bajãne bio bia panania. Maʉ̃ bia pananira ewariza ɓaya.
18 Maʉ̃ carea dauba unubadara daiba crĩcha panʉẽ́a, ãtebʉrʉ dauba ununacada crĩcha panʉa. Dadji dauba unubadara isabe jõbaria, baribʉrʉ dauba ununacara jõcaa.
