2 Corinto 5:1-21
5 Naʉ̃ ẽjũãne naʉ̃ cacuara dãrã droaca bẽrã wua de quĩrãca ɓʉa.* Dadjirãba cawa panʉa naʉ̃ cacua beuɗacarea Ãcõrẽba dadjirãa cacua beucada bajãne diaida. Maʉ̃ cacuara ẽberãba oɗaẽ́a.
2 Maʉ̃ carea naʉ̃ cacuaɗe panʉne dadjirãba cacua bajãnebemada bio eda quĩrĩã panʉa.
3 Maʉ̃ cacuara dadjirãba bajãne eropanania. Bajãne cacua neẽ́ ɓeaɗaẽ́a.
4 Wãrãda dadjirã naʉ̃ cacuaɗe panʉne bia mĩgabadaa idjaɓa mĩã sopua beɗeabadaa. Baribʉrʉ mʉ̃a jaraẽ́ ɓʉa dadjirãra beu quĩrĩã panʉda naʉ̃ cacua eroɓeaɗa amaaba. Ãtebʉrʉ bajãnebema cacuada eda quĩrĩã panʉa. Mãwã dadji cacua beuida ɓʉra jõpeɗa dadji cacua beucadrʉ ɓeya.
5 Wãrãda Ãcõrẽba dadjirãra maʉ̃ carea osia. Idji Jaurera dadjirãa diasia cawaɗamãrẽã jũma idjia diai jaraɗara wãrãda edaɗida.
6 Maʉ̃ bẽrã dadjirã crĩchara Ãcõrẽmaa wãrãda ɓʉcãrĩnaa. Dadjirãba cawa panʉa naʉ̃ cacuaɗe panʉne dadjirã Boro ɓʉma panʉẽ́da.
7 Dadji dauba unu panʉneba nĩnaẽ́a, ãtebʉrʉ Ãcõrẽ ĩjã panʉneba nĩnaa.
8 Maʉ̃ carea dadjirã crĩchara Ãcõrẽmaa wãrãda ɓʉcãrĩnaa. Dadjirãra biara naʉ̃ cacuaɗebemada ẽdrʉ quĩrĩã panʉa dadjirã Boro ume ãbaa ɓeaɗi carea.
9 Maʉ̃ carea naʉ̃ cacuaɗe panʉne wa beusiɗara, dadjirãba jũma o quĩrĩã panʉa Ãcõrẽba bia unumãrẽã.
10 Wãrãda Critoba jũma dadjirãra cawa oya. Idjia dadjiza diaya dadjia naʉ̃ cacuaɗe o ɓaɗa quĩrãca. Bia o ɓasibʉrʉ, ara maʉ̃ quĩrãca diaya. Biẽ́ o ɓasibʉrʉ, ara maʉ̃ quĩrãca diaya.
Ãcõrẽ ume ibiaɗiɗebema
11 Dadjirã Borora waya panʉ bẽrã daiba ẽberãrãa jara panʉa idjida ĩjãnamãrẽã. Ãcõrẽba cawa ɓʉa daiba crĩcha biaɗeba jaradia nĩnada. Mʉ̃a crĩcha ɓʉa bãrã biɗa cawa panʉda.
12 Wayacusa daiɗebemada bãrãa bia beɗea panʉẽ́a, ãtebʉrʉ quĩrĩã panʉa bãrãba daiɗebemada poya bia crĩchaɗida. Mãwã ʉ̃cʉrʉba dai biẽ́ jarabʉdaɗe bãrãba daiɗebemada poya bia jaraɗia. Maʉ̃gʉrãba ãdji dauba bia unu ɓʉda biara crĩchabadaa. Soɗebemada crĩchaɗacaa.
13 Ʉ̃cʉrʉba jara panʉa daira quĩrãẽ́ panʉda. Daida mãwã panʉbʉrʉ, Ãcõrẽba jara ɓʉ oɗi carea mãwã panʉa. Daida quĩrã biabʉrʉ, bãrã carebaɗi carea mãwã panʉa.
14 Critoba daira quĩrĩã ɓʉ bẽrã idjia quĩrĩã ɓʉdrʉ daiba o panʉa. Daiba cawa panʉa Ẽberã Aɓa beusida jũmarã carea. Maʉ̃ bẽrã Ãcõrẽ quĩrãpita jũmarãda beusiɗaa.
15 Wãrãda Critora jũmarã carea beupeɗa ʉ̃rẽbasia dadji zocai ɓeaba ara dadjia o quĩrĩã panʉ quĩrãca waa orãnamãrẽã, ãtebʉrʉ idjia quĩrĩã ɓʉ quĩrãca o pananamãrẽã.
16 Maʉ̃ carea naʉ̃ ẽjũãnebemarãba djãrã acʉbada quĩrãca iɗira daiba ni aɓaʉda acʉɗacaa. Naẽna daiba Critoɗebemada mãwã crĩcha pananamĩna iɗira mãwã oɗacaa.
17 Wãrãda aɓaʉda Crito ume ɓʉbʉrʉ, idjira ẽberã djiwiɗida mãwã ɓʉa. Idji naẽna ɓaɗa quĩrãca ɓʉẽ́a ãtebʉrʉ ẽberã djiwiɗia.
18 Jũma maʉ̃gʉra Ãcõrẽba osia. Critoɗeba dadjirãra idji ume bia ɓʉsia idjaɓa daira ɓʉsia maʉ̃gʉɗebemada ẽberãrãa jaradiaɗamãrẽã.
19 Wãrãda Critoɗeba Ãcõrẽba naʉ̃ ẽjũãnebemarãra idji ume bia ɓʉsia. Dadjia cadjirua opeɗaɗara jũma quĩrãdoasia. Idjaɓa maʉ̃ beɗea idji ume bia ɓaiɗebemada daia diasia jaradiaɗamãrẽã.
20 Maʉ̃ bẽrã daira Critoba diabueɗarãa. Daiɗeba Ãcõrẽba bãrãa beɗea djuburia ɓʉa idji ume ibiaɗamãrẽã. Daiba Crito trʉ̃neba bãrãa beɗea djuburiabʉdaa: Ãcõrẽ ume ibiaɗadua.
21 Critoba cadjiruada oca basía. Baribʉrʉ dadjirã carea Ãcõrẽba idjira dji cadjirua quĩrãca unusia. Mãwã Critoɗeba Ãcõrẽba dadjirãra jipa unu ɓʉa.
Beɗea eɗaare
^ 5:1. Griego beɗeaɗe versículo 1-4 nãwã ɓʉ́ ɓʉa: “1 Naʉ̃ ẽjũãne dadjirãra wua deɗe panabadaa. Dadjirãba cawa panʉa maʉ̃ dera ãrĩbʉrʉ, Ãcõrẽba dadjirãa bajãne deda diaya. Maʉ̃ dera ãrĩcaa. Ẽberãba oɗa deẽ́a. 2 Baribʉrʉ naʉ̃ ẽjũãne panʉne dadjirãra ʉ̃yãba drasoa ʉ̃yãba panʉa, bajãnebema deda cacuaɗe jʉ̃ quĩrĩã panʉ bẽrã. 3 Maʉ̃ dera cacuaɗe jʉ̃siɗara ãcaɗaa pananaẽ́a. 4 Dadjirãra naʉ̃ wua deɗe panʉne bia mĩgabadaa idjaɓa mĩã sopua beɗeabadaa. Dadjirãba jʉ̃ panʉra ẽrã quĩrĩãnaẽ́a ãtebʉrʉ bajãnebema deda cacuaɗe jʉ̃ quĩrĩã panʉa. Mãwã dadji beuida ɓʉra zocai ɓaiba mĩbueya.”
