2 Corinto 6:1-18
6 Daiba Ãcõrẽ ume ãbaa idji trajuda o panʉa. Maʉ̃ bẽrã daiba bãrãa beɗea djuburiaɗia Ãcõrẽba idji biaɗeba careba ɓʉda igararãnamãrẽã.
2 Ãcõrẽ Beɗeaɗe nãwã jara ɓʉa:
Mʉ̃a carebai carea ɓʉɗa ewariɗe bʉa iwiɗiɗara mʉ̃a ũrĩsia.
Bʉ ẽdrʉ edaɗa ewariɗe mʉ̃a bʉra carebasia.*
Wãrã arada mʉ̃a jaraya: iɗi Ãcõrẽba idji biaɗeba careba ɓʉa. Iɗi Ãcõrẽba ẽdrʉ edabaria.
3 Ni cãrẽneba daiɗebemada biẽ́ unubiɗaẽ́ panʉa daiba jaradia panʉnebemada, ni aɓaʉba biẽ́ beɗearãnamãrẽã.
4 Ãtebʉrʉ ne jũmane unubi panʉa daira Ãcõrẽ nezocarãda. Bia mĩga panʉne, ne neẽ́ panʉne, minijĩchiaɗe panʉne biɗa jũma droa panʉneba mãwã unubi panʉa.
5 Ẽberãrãba u eropanʉne, jida eropanʉne, dai ume quĩrũbʉca duanʉne biɗa mãwã unubi panʉa. Jũmawãyã traja panʉne, cãĩnaẽ́ panʉne, ne coɗaẽ́ panʉne biɗa mãwã unubi panʉa.
6 6:6-7 Dai jipa nĩnaneba, wãrã crĩcha cawaaɗeba, jũma droa panʉneba, sobiaɗeba, Ãcõrẽ Jaure dai soɗe ɓʉɗeba, wãrã quĩrĩãneba, wãrã beɗea jaradia panʉneba, idjaɓa Ãcõrẽ ʉɓʉaɗeba biɗa mãwã unubi panʉa. Dai jipa panʉneba cadjiruara poyabadaa idjaɓa ara maʉ̃ba daida cadjiruaɗebemada jũãtrʉbadaa.
7 –
8 Eɗauɗe ʉ̃cʉrʉba daida bia jarabadaa. Eɗauɗe biẽ́ jarabadaa. Eɗauɗe daira biẽ́ trʉ̃ ɓʉgabibadaa. Eɗauɗe bia trʉ̃ ɓʉgabibadaa. Daiba wãrã beɗeada jara panʉmĩna ʉ̃cʉrʉba jara panʉa daira sewaiɗa panʉda.
9 Daira bio cawa panʉmĩna ãdjia ununaca ẽberãrã quĩrãca obadaa. Daira beuboɗoɗada crĩcha panʉmĩna waɗi zocai panʉa. Daira puobadamĩna beaɗacaa.
10 Daira sopuabadamĩna ewariza ɓʉsriɗa panʉa. Daira ne neẽ́ panʉa. Mãwãmĩna daiba zocãrã ẽberãrãa Ãcõrẽnebemada cawabibadaa ãdjirãra ne bara ɓea quĩrãca ɓeaɗamãrẽã. Daira ne neẽ́ panʉmĩna Ãcõrẽneba ne jũmada eropanʉa.
11 Djabarã Corintoɗebema, daiba soɗeba bãrãra bio quĩrĩã panʉ bẽrã ebuɗa mãwã jara panʉa.
12 Wãrãda daiba bãrãra soɗeba quĩrĩã panʉa, baribʉrʉ bãrãba daira soɗeba quĩrĩãẽ́ panʉa.
13 Maʉ̃ bẽrã mʉ̃a bãrãa beɗea djuburiaya zezaba idji warrarãa beɗea djuburiabari quĩrãca: daiba soɗeba bãrã quĩrĩã panʉ quĩrãca bãrã biɗa daira soɗeba quĩrĩã pananadua.
Crito ĩjãẽ́ ɓea ume beɗea ɓʉrãnadua
14 Crito ĩjãẽ́ ɓea ume beɗea ɓʉrãnadua. ¿Ẽberã jipa ɓʉda sãwã ẽberã cadjirua ume bia ɓai? ¿Ʉ̃naada sãwã pãĩma ume bia ɓai?
15 ¿Critoda sãwã diauru ume bia ɓai?* ¿Crito ĩjã ɓʉra sãwã Crito ĩjãẽ́ ɓʉ ume bia nĩbai?
16 ¿Jʉwaba oɗa ãcõrẽda Ãcõrẽ deɗe ɓaida ɓʉca? Wãrãda dadjirãra Ãcõrẽ zocai ɓʉ de dromaa. Maʉ̃ carea Ãcõrẽba idji beɗeaɗe nãwã jarasia:
Mʉ̃ra ãdjirã ume ɓaya. Ãdjirã tãẽna nĩbaya.
Mʉ̃ra ãdji Ãcõrẽ baya idjaɓa ãdjirãra mʉ̃ ẽberãrãda ɓeaɗia.*
17 Idjaɓa dadjirã Boroba nãwã jarasia:
Ãdjirãmabemada ãyã wãnadua. Ãdjirã ume ãbaa ɓearãnadua.
Mʉ̃a bia unucara igaraɗadua. Maʉ̃be mʉ̃a bãrãra bia edaya.*
18 Mʉ̃ra bãrã Zeza baya. Bãrãra mʉ̃ warrarãda ɓeaɗia idjaɓa mʉ̃ caurãda ɓeaɗia.
Dadjirã Boro jũma poya ɓʉba mãwã jara ɓʉa.*
